Daddy 不在的星期日

今個月是Daddy的公幹月, 上星期去了香港, 今個星期在日本, 下個星期去泰國.

Daddy唔喺度, 我就要自己攪掂.  兩個囝囝似孚好開心, 因為冇王管.

星期日我就要帶兩個囝囝去剪頭髪, 平時都係Daddy開車去SUNTEC 的, 要我開車去, 我都有啲戰戰兢兢.  冇Daddy喺度喝住兩隻馬騮, 我同姐姐好辛苦一人mark一個.

有啲小朋友未剪就喊到飛起, 我呢兩個都不知幾輕鬆, 仲熟到識自己去揀碟睇, 只要有電視睇就乜都得.

剪完頭髪問佢哋午餐要食乜, 大仔毫不猶豫話foodcourt, 要食雞飯.

只有雞飯能令佢兩個坐定定大羮大羮咁自己食, 大仔一個人食咗一碟半雞飯, 如果喺屋企有咁開胃就好嘞.

食完後食糖水, 買了"清湯"給他們分, 兩個都只飲糖水, 啲料就俾晒姐姐食.

食完午餐返屋企休息, 五點左右要帶大仔去學游水.  平時都係Daddy帶的, 呢個月都要我帶, 唔可以留响屋企煮嘢食.

其實我同Daddy都識游水, Daddy以前仲係救生員添, 但自己細路都係要俾人教, 佢對住我哋連落水都驚, 但對住教練同啲同學仔佢又唔驚喎.

囝囝上緊堂時, 突然有個家長行到池邊喪鬧個教練, 話個教練鬧佢個仔鬧到喊, 仲話因為咁佢決定唔再俾個仔嚟學游水.  佢個仔係响我囝囝上堂之前個時段上堂的, 我當時都在場(我哋早到要等上一班落堂), 個教練係大聲咗啲, 但其實都唔係真係鬧個細路, 只係矯正佢唔啱既地方啫.  而且個家長當時並不在場, 佢話其他師奶話佢知, 我諗啲八卦師奶可能有啲加鹽加醋啦.

我覺得細路既然俾得人教就要放手俾人管, 俾人語氣重啲教訓吓都咁大反應, 係咪太過保護呢? 個細路前面仲有好長路, 一定有更難堪, 更大的挫折, 做家長的有可能處處保護嗎?  況且如果個家長覺得個教練喺咁多人面前去教訓佢個仔會傷佢自尊心, 咁點解佢又喺咁多學生家長面前咁鬧人呢?  個教練個EQ都幾高, 只答咗一句, 就冇出過聲, 亦冇同佢埋論, 跟住就若無其事繼續上堂.

我每次帶囝囝去上堂都會坐喺池邊度睇, 一個教練對住咁多個細路, 而且仲喺腳唔到地的大池度上堂, 要顧及每個細路的安全都唔容易, 有啲細路(我囝囝係其中之一)真係好挑皮, 睇少一眼都唔得, 個教練有時都會有啲掹, 但真係可以埋解的.

我好同情個教練, 因為嗰日係佢最後一日喺嗰度教, 落堂時佢仲分禮物俾啲小朋友添.  囝囝攞完禮物後, 我仲特登叫囝囝講多兩聲多謝, 我自己都有講, 至少令佢覺得有人欣賞啦.