Monday 31 May 2010

美好的一天

上星期五公眾假期, 約了教會小組中的兩個家庭到East Coast踩單車.

多得媒體對油污的廣泛報導, 平時假期都會人山人海的東海岸, 居然到中午十二點都仍有車位泊車.

其實當日已經冇咩味, 聞上去比在油站的油味還要淡得多.

但近海的沙被油污染, 所以小朋友只在樹下玩沙.


朋友剛買了大機, 影啲相特別靚, 用來給小朋友影大特寫簡直一流, 攪到我好想即刻去買部來用, 不過Daddy强烈反對. 



Thursday 27 May 2010

開心包包日

星期六同事來我家裏學整包包, 本來打算午餐後開始, 或者可以趕及下午茶食.

但她有事要四點才到, 於是我自己先動手做了鮮奶球給大仔去學琴前做下午茶.

懷疑層脆皮我量錯份量, 一係牛油少咗, 一係粉多咗, 個表面咁唔平既.  不過都好味, 最緊要裏面鬆軟.


同事到後就開工整南瓜包, 大家一邊搓一邊有傾有講, 好開心.

最後成品, 圓形的包南瓜餡, 三角形的包肉鬆, 長形的包腸仔.

南瓜包放在雪柜下格三日都仲好軟熟.


Wednesday 26 May 2010

自製燻蹄

小時侯到茶樓最開心吃到海蜇燻蹄, 還一定要蘸那碟蒜蓉醋.

到了新加坡, 吃燻蹄的機會少之又少, 所以常渴望可以自己整.

網上燻蹄做法很多都要用硝, 化學品一來對身體無益, 二來亦不知道去那裏買.

最近看到T&P的做法, 很簡單又不需用硝, 急不及待買隻豬手來試.

到街市買豬手時, 肉販快手地打直界了一刀, 深至入骨, 還幾孚要斬開一件件, 我不停叫他不要斬, 他都好像沒聽到, 好彩另一肉販聽到及時阻止, 不然, 我整燻蹄大計就要改成炆豬手了.

正因為豬手被界開了, 煮好後很難卷.  不過味道很好, 很像小時候吃到的.


當然也照樣預備了蒜蓉醋, 兩個囝囝都吃得很開心. 大仔一邊蘸醋汁, 一邊說辣 (因為蒜蓉), 但一樣繼續蘸, 只叫我下次不要放蒜蓉.

原本是作為side dish, 打算分兩餐食, 但兩個囝囝不停食, 最後只剩幾片. 第二晚囝囝就快快手全清掉.

Daddy 對有皮有肥肉的都沒興趣, 只意思意思吃了一點, 難以明白為何我和兩個囝囝可以吃得那麼滋味.

Monday 24 May 2010

24 May 2010 晚餐精選

今日係我留在家裏湊仔的最後一天, 明天開始要返工去攪所有一拖再拖的工作.

今晚又係三餸一湯.

"豬皮"蘿蔔魚蛋, "豬皮"其實係砂爆魚肚.  今次買到的蘿蔔好靚, 又甜又冇渣.


冬菇金針雲耳炆蛋角, 蛋角裏包的是豬肉.


Friday 21 May 2010

21May2010 晚餐精選

今朝唔知點解, 全家除了daddy外都變了懶瞓豬.

當我仍熟睡時, 突然大仔叫:"Mommy, it's 9.50!". 

即刻彈起身, 唔係呃我呀, 再睇鐘, 真係九點五十分. 

Oh no!  大仔十點十五分要上校車, 剩番二十分鐘要全部人擦牙洗面食早餐.  不停咁叫 "快啲快啲....", 好彩趕得切上校車. 

大仔返學, 我就吸塵抹地, 細佬自己睇電視, 但突然好靜喎, 睇吓佢做咩先.

原來喺度帮我抺窗, 真乖!  我冇叫佢架, 佢自己拎張濕紙巾來抺.


Thursday 20 May 2010

Terriyaki chicken burger

囝囝一直嚷着要我弄漢堡包, 拖了幾個星期, 今日終於成事.

朝早趁囝囝返學, 跟愛美麗的食譜烘了包包.  再到超市買雞脾肉, 用terriyaki sauce醃, 烘包包時順便一齊入爐.

囝囝放學後包包剛攤凍, 雞脾肉仍在爐中等上色.  可惜忘了買生菜, 包內就只雞肉和沙律醬.  少了生菜, 賣相麻麻, 但包包夠軟熟, 都好好味.


Wednesday 19 May 2010

叉燒包, 椰檳

每個週末都要為囝囝預備之後一個星期的下午茶包包, 每次都要煩惱要整咩包.

包包不可以有葱, 洋葱, 菜之類的餡料, 來來去去都是火腿包, 腸仔包, 吃多了會厭, 而且這類加工食品始終不大健康.

上次囝囝晚餐要食叉燒飯, 正好剩下的叉燒可以用來做叉燒包, 自家製叉燒保證安全乾淨.

有圓形和三角形, 細路仔食的麵包一定要有少少唔同樣佢哋先有興趣, 囝囝就特別鐘意三角形, 因為我第一次整呢款做型嘛.  包得唔好, 右上角嗰個爆餡添.


Monday 17 May 2010

自製腸粉, 炸両

最近在家照顧兩個囝囝, 每日要為他準備早餐, 但沒埋由日日都食麵包, 偶而要攪攪新意, 於是上星期某日就整腸粉.

對上一次整腸粉已經是三年前了, 自從教識姐姐整之後, 我就冇整過.

太耐冇同腸粉打交道, 整得好慢, 腸粉有厚有薄, 有長有短.

知道自己手腳慢, 早一晚整定, 朝早只需蒸熱.


囝囝喜歡配甜醬, 我還特地去買甜醬來給他點.  家裏沒芝麻醬, 改用花生醬加麻油, 味道尚可接受, 至少囝囝覺得好味.


Saturday 15 May 2010

西洋菜陳腎排骨湯

上次返香港媽咪給我一些陳腎, 只煮過一次. 

今朝買了西洋菜, 就用來煲陳腎, 加排骨, 南北杏, 蜜棗一齊煲.

煲了兩個半鐘, 加了陳腎湯比平常的多了一點咸香, 完全不需加鹽已經夠味.  大仔唔鐘意飲湯都飲了一碗.


Wednesday 12 May 2010

A貨白玉葡萄

昨日輪到我留在家裏, 好忙好忙, 成日睇住個鐘做人.

趕趕趕, "快啲食早餐", " 沖涼啦", "校車到喇", "要接放學喇".....

在忙碌中都要揾啲嘢令自已開心吓, 咁先可以maintain my sanity.

於是就整個心機菜 - A貨白玉葡萄.

蒸前, 砌得肉肉酸酸咁.  個冬瓜好老, 塊皮硬到我驚切埋自己隻手.


蒸後, 開罐頭雞湯埋芡. 


想睇正貨白玉葡萄, 請到大少奶度, 佢整得靚過我十倍有多, 不過佢整時應該冇兩隻馬騮响個廳度爭嘢玩啩. 

同事見到張相, 以為係罐頭荔枝或龍眼, 哼!



Monday 10 May 2010

墨西哥包, 蜂蜜西梅包

上星期一烘的包包.

給囝囝們當日做下午茶的墨西哥包.


一出爐囝囝已急不及待要食, 墨西哥包加果汁, 囝囝還要求影低包包的內心世界.


Sunday 9 May 2010

Happy Mother's Day

Happy Mother's Day!

上星期為我媽咪整的母親節禮物 - 榛子雪球和伯爵茶小餅乾.  特地用粉紅色包裝, 托教會傳道返香港時替我帶給我媽咪. 


今日午餐和奶奶和daddy的家人吃飯慶祝, 又係去Guild House的秀才(The Scholars).  奶奶話要食小菜, 唔食點心.  叫了北京填鴨, 銀魚金蒜莧菜, 黃金蟹棗, 烏欖肉碎扒豆腐.  食到一半先醒起要影相. 


Thursday 6 May 2010

變魔術

今個星期daddy負責留在家裏湊仔, 我就返工.

為了七點前可以開飯, 我每朝都要提早一個鐘頭起身.

早啲返工就可以早啲放工, 所以每日都好攰好眼瞓.

今晚daddy有事要出門, 我就更早少少返到屋企. 

既然只有我和兩個囝囝, 不如煮炒烏冬啦.  正要去樓下超市買烏冬時, 大少爺話唔要炒烏冬, 要食叉燒飯. 

叉燒飯!  臨時臨急去邊揾叉燒呀? 

但大少爺要的, 為奴的又怎可不遵呢?

好, 我變, 我變, 我變變變.....

兩個鐘後.....


雪柜裏沒五花肉, 只有瘦肉, 大少爺要叉燒, 瘦肉都照用.  用叉燒醬醃, 平時醃過夜, 但今日只有個幾鐘, 用竹籤拼命的刺啲豬肉, 希望可以入味啲.

結果都ok噃, 唔會太乾, 亦都夠味, 大少爺好滿意.

依家要去為兩位少爺沖涼了, 但我好想瞓覺呀! 

Wednesday 5 May 2010

勞動@Labour day

上星期六勞動日, 係名符其實既勞動.

姐姐返鄉下, 我就變咗阿四, 要擔起服待老爺大小少既重任.

一早起身煮早餐, 前一日整肉醬剩低三片煙肉, 煎埋俾老爺同大少食, 加煎蛋, 大少就食得好開心嘞.


老爺既就加個蕃茄, 略煎再洒上basil 碎, 健康啲.  屋企無bratwurst 和鮮button mushroom, 整唔到full English breakfast, 不過就咁佢哋都已經幾滿足, 我冇幾何會晨早流流開火煎嘢, 最怕朕油煙味.


Tuesday 4 May 2010

30Apr2010 兩餸一湯一甜品

今個月都會好忙好忙, 忙到無氣透呀.

姐姐返鄉下一個月, 我同daddy要輪流請假留响屋企湊兩個囝囝.  今個月乜私人時間都冇晒喇.

上星期五姐姐搭早機走, 我就留响屋企.  原來湊住兩個係好難做到家務的, 實在佩服姐姐平時點樣一腳踢.

第一日喺屋企, 仲要時間去適應, 好多嘢想做但時間分配好有問題, 結果晚餐只好草草解決.

青瓜炒魷魚


Related Posts Plugin for WordPress, Blogger...