教會生活營2011

我教會每兩年會舉行一次生活營，地點都是就近的馬來西亞。

今年生活營由6月5號至7號在馬來西亞Johor的Pulai Springs Resort舉行，如果沒塞車一個鐘頭車程就到.

出發前一日, 馬來西亞開始要所有入境遊客打指模, 新聞報話當日排隊過關要排成五個鐘頭, 我哋都好擔心.

感謝主, 我們出發那天馬來西亞決定只抽樣打指模, 我們過關時都不用落車, 在關卡只等了個半鐘.

下晝兩點鐘到, 但三點鐘才可以取room key.  先玩玩遊戲, 大人細路都玩得開心.

我組贏了, 穫奬一人一包迷你裝twisties, 細佬拎住一包自己食.  問佢攞少少都唔俾, 但呢位小妹妹直接伸手入去拎, 佢又俾喎, 仲好開心咁一包兩份分添.  你話啦, 以後大個識女朋友仲會記得阿媽咩?

分到room key後, 入房可以休息一陣.  嗰度全部都係套房(suites), 我哋一家連姐姐五個人住two-room suite.  Suite比想像中好, 有客廳, 飯廳同廚房, 不過廚房只有廚櫃和雪櫃, 唔煮得嘢.

主人房有張king bed, 好舒服.

浴室都好乾淨企理, 仲有間相連的衣帽間 (walk-in closet).

另一間房都相當大, 我哋將兩張床推埋, 因為仲要加多一張床, 咁姐姐同囝囝哋就可以一人瞓一張床.  呢間房都有相連的衣帽間和浴室.

今次成人的主要節目係聽四堂道, 講員分享信息, 主題是"讓家有真理相傳".  講員講得非常好, 好生動又講好多笑話, 真的穫益不淺.

小朋友亦有他們自己的兒童節目, 聽故事, 玩遊戲.

啲小朋友都好enjoy.

第一日下大雨, 後來回來新加坡先知那天大水浸, 幸好那resort沒受影響, 但自由時間時就只能留在室內, playroom就是小朋友的不二之選了.

第二日朝早都落了幾陣雨, 但到自由活動時間時就放晴, 剛好給囝囝們去泳池玩.  大佬捉住浮板來游, 細佬好細膽, 只肯在池邊玩水.

後來給我半氹半逼去玩滑梯, 佢滑下來時好開心, 但又怕, 就唔肯再玩第二次.  我自己都好耐冇游水, 今次着上泳衣, 發覺真的有必要減肥. 

游完水上spa度浸埋jacuzzi 同入埋steam bath, 正!

當晚聽第三場講道後, 去兒童房接囝囝們時, 見到細佬已經攰到趴喺度, 要抱佢番房.  跟住發覺唔對路, 細佬身體好似好熱, 應該係發燒, 可能游水時冷親.  我諗住只住兩晚, 就冇帶葯, 又冇探熱針.  Daddy話要即刻開車返新加坡, 我梗係反對啦, 夜晚成十點幾, 自已一家人開車, 又唔熟馬來西亞, 當地治安又唔好, 太危險啦.  感恩後來找到兩個家庭帶兒童退燒葯和探熱針, 可以留到天光先走.  我成晚都check住細佬, 都冇點瞓過, 所以番到嚟後幾日都殘爆.  細佬番到嚟即刻去睇醫生, 食咗抗生素同退燒葯, 嗰日夜晚就已經退晒燒.  今次買個教訓, 以後出門就算一晚都要帶齊葯同探熱針.

你哋係咪等緊睇嘢食呢?  你地要失望嘞, 我自己都好失望, 一張嘢食相都冇影, 因為全程啲嘢食都好唔掂.  除咗一餐中餐正常啲, 其餘都係自助餐, 但全部好睇唔好食, 好彩我哋自備杯麵零食.

今次生活營總括來說都好好, 雖然並未滿足肚腹之慾, 但心靈確實非常滿足, 謝謝主!