Saturday 30 October 2010

囝囝幼稚園graduation concert (已加videos)

10月28日是我結婚十週年, 咁啱又係囝囝幼稚園畢業晚會, 所以就冇去慶祝.

成間幼稚園高班每班都要表演一個節目, 囝囝班表演跳舞. 

囝囝好認真去練, 平時在家裏都成日練, 有時細佬跟住一齊跳, 好攪笑架.

啲小朋友要下晝三點鐘到學校集合, 囝囝一早就好緊張咁換好晒衫等我返屋企接佢.

好型仔呀!


一到學校已經見到好多小朋友排隊等老師帮佢哋化粧.


Friday 29 October 2010

無敵到

網友無敵陪佢honey嚟呢邊, 星期二晚約埋愛美麗和Mommy Dearest出嚟食晚飯.

响網識咗咁耐, 終於見到盧山真面目.  原來無敵咁靚女喎, 唔怪得明哥一見到我哋就話係咪都係美女廚房啦.  阿明哥指既美女廚房咪無敵囉, 我哋係師奶廚房啫.

多謝愛美麗的安排, 訂了在North Bridge Road的Chili Padi Nonya Restaurant食娘惹自助餐. 

娘惹色彩的裝飾.


我哋到時只有另外兩個客人, 仲早, 啲嘢食仲未揭開.  有咖哩阿參魚 (curry assam fish), 娘惹雜菜 (Sayur Lodeh), 炆雞(ayam buah keluak) 和豆醬炆豬肉 (babi ponteh).


Wednesday 27 October 2010

semi-complete flour

九月時在Carrefour見到有bread flour 做特價, 個牌寫"Bread Flour", 係有機麵粉, 1kg只賣S$1.50.

嘩, 平過平時普通麵粉成倍, 師奶的我當然要買啦, 即時放三包在籃裏.

好彩諗諗吓check吓expiry date, 原來十一月中到期, 怪不得做特價啦.  三包一定用唔晒, 買一包試吓先.  撿到便宜貨, 滿心歡喜地回家去.


第二日整麵包, 一倒出嚟, 點解好似wholemeal咁既.  再望吓包裝上面, 法文, 一個字都唔識, 後面有張細細張既sticker, 上面寫住"semi-complete flour", 裏面有rye flour, oat, wheat germ... 唉, 貪平啦, 買嘢唔睇清楚.

啲粉望落好粗吓, 唯有和普通高粉混合用. 


Tuesday 26 October 2010

皮蛋豆腐

原來我是大鄉里, 從來冇聽過鏞記皮蛋, 只知道鏞記出名燒鵝.

Daddy去香港公幹, 回來給我一盒東西, 說特別給我的.

我以為是老婆餅之類, 原來是皮蛋.  打個突, "吓, 做咩買皮蛋返嚟? 呢邊都有啦"

Daddy: "鏞記皮蛋呀, 我同事話好出名架".

咁我真係孤陋寡聞嘞.

但查實鐘意食皮蛋嗰個係Daddy唔係我喎, 買比佢自己定買俾我呀?

後尾揭吓本飲食男女, 真係提到鏞記皮蛋喎, 原來真係好嘢嚟噃.

個盒都好靚架, 裏面有六隻, 仲附上一盒酸薑.  哈哈, 原來皮蛋都有禮盒裝喎.



Monday 25 October 2010

偷食

有好多嘢我鐘意食, 但Daddy唔鐘意.

我鐘意鱗骨, 食雞唔食已去皮去骨既, 豬皮, 魚皮, 排骨, 雞腳, 豬腳, 我都愛

Daddy唔識鱗骨, 食魚一定要去骨, 見到蒸排骨, 蒸雞件都會皺眉頭, 雞腳, 豬手, 魚皮, 豬皮全都唔食.

偏偏兩個囝囝同姐姐口味都同我近似, 於是每次Daddy出國, 我哋就急急去偷食, 雪柜就仲會出現一堆違禁品. 

偷食菜式包括豉油雞腳, 炆五花腩, 原隻豉油雞, 炆豬手, 等等.

上星期就煮了炆豬手, 只簡單用了豉油, 糖來炆, 姐姐煮得啱啱好, 唔會爛, 仲有少少煙韌.  支老抽唔係用開個牌子, 偏甜, 落多了又會有少少苦, 所以落好少, 顏色就咁淡囉.  但味道超好味.  今次隻豬手仲好瘦添, 食完都唔驚肥.








Friday 22 October 2010

落雪?

由office望出窗外, 落雪?




你哋唔駛去揾眼鏡, 唔係你哋眼矇, 窗外真係咁樣, 我覺得好似落緊雪.

好鄰居印尼又開始燒森林, 攪到新馬都煙霧迷漫, 噚日傍晚psi超過去100, 逹不健康水平.  我眼睛喉嚨都覺得好乾, 兩個囝囝啲濕疹又發作, 細佬不停地R, 係咁嗌itchy.

今朝聽電台新聞, 有個印尼高官回應話: "我哋印尼一年供應你哋咁多氧氣又唔見你哋嘈, 家陣俾你哋幾日二氧化碳你哋就咁多complaint".

咁都得, 佢噏晒啦!

香港有鮎魚, 呢邊就有煙霧 (haze), 希望鮎魚快啲游走, 煙霧又快啲俾風和雨沖走.



飛越迷霧, 把生命看清楚...

金蒜蒸帶子, 雞絲粉皮

兩個星期六前在街市見到帶子, 雖然細細粒, 但貪平就買了半公斤.

本來我以為唔可以自己揀, 就對魚販話要半公斤.  原來可以自己揀, 咁我自己落手揀, 揀完一稱, 居然不多不少剛好500g, 魚販都讚我準. 

簡簡單單用金蒜蒸.


蒜蓉先用油爆香成金蒜, 記得用慢火.  油和蒜盛起, 下鹽調味.  切記要待金蒜和油放涼後才加在帶子上, 如果唔係啲帶子會變枚.  跟住大火蒸幾分鐘就攪掂.  我懶, 連葱都費事切, 所以賣相麻麻.  啲帶子雖然細細粒又平, 但都幾鮮甜.  如果加埋豆豉和辣椒會更好味.  咁多隻帶子, 才兩蚊, 係咪好抵呢?

同一晚又整了涼拌雞絲, 因為Daddy和囝囝都話上次佢哋食得少唔夠喉.


呢碟超樣衰, 因為原本啲粉皮係要放响帶子底一齊蒸, 但啲粉皮浸完後又好似幾淋吓, 怕再蒸會變糊, 就索性變成雞絲粉皮.  但雞絲己經擺好喺青瓜面, 冇理由逐條拎番出嚟架, 咪將粉皮放上面算囉, 橫掂都係自己食啫. 

其實我從未真正食過粉皮, 所以唔知真正係點.  我啲粉皮係响裕華買的, 上面好似寫住綠豆粉皮, 只需用熱水浸軟就食得, 唔駛煮.



Thursday 21 October 2010

迷你菠蘿包

返香港時在心甜買了一瓶臭粉, 放了半年仍未開封, 於是上星期就焗了迷你菠蘿包.

多謝愛美麗給我的食譜, 她的食譜是沒有臭粉的, 我將脆皮份量改了, 加入臭粉.


加了臭粉真的不一樣, 皮很鬆脆, 亦爆得好靚. 

包包是很軟熟的, 皮又酥脆, 真的很好吃.

同事試了還說比外面買到的好食, 不過要知道在新加坡的菠蘿包水準和香港的是有一定距離的.

當日我還焗了前一篇的南瓜戚風, 晚飯後我留了一個菠蘿包和一小片戚風在飯桌上給Daddy做宵夜的, 但兩個囝囝經過見到, 一人一聲yeah! 就一人拎一件來吃, Daddy的宵夜泡湯了.

兩個囝囝口味剛好相反, 大佬最愛脆的, 細佬喜歡軟的, 所以大佬拿了菠蘿包, 細佬拿了蛋糕, 大口大口地吃.


學人看報紙, 看得懂嗎?

以前覺得臭粉係化學品, 還是不放好些.  原來臭粉即ammonium bicarbonate, 遇熱會分解變成ammonia 和二氧化碳, 所以並不會殘留於食物內, 可以放心使用.


NH4HCO3 → NH3 + H2O + CO2

所以臭粉放耐如果冇密封會自動消失.

Wednesday 20 October 2010

南瓜戚風 (附食譜)

某日在超市見到下面呢個butternut squash (招紙上寫butternut pumpkin), 好吸引, 一定要買返屋企.


返到屋企望住舊瓜, 心諗顏色咁靚, 一定好甜, 我直頭想一啖就咬落去.

最尾決定用來整戚風, 先要蒸熟南瓜再搓爛成南瓜泥, 原來只係好睇但唔算甜, 下次都係買返普通南瓜好了. 

不過個戚風出來顏色好靚, 味道都幾好, 如果南瓜再甜啲就更正.

第二日的早餐 - 南瓜戚風配黑咖啡一杯, yummy!


Tuesday 19 October 2010

奶奶來食飯

九月廿五日Daddy請了奶奶和姑奶們來新屋食飯, 算是housewarming.

奶奶身子弱, 很少出門, 要請她來吃晚飯都要特別早, 夜了她會好攰.  所以約了六點半開始. 不過大姑奶和老公秉承新加坡人的優良傳統, 當然例遲, 虧我和姐姐一早煮好晒.

Daddy 一家對食沒甚研究, 無論煮咩佢哋都好似冇興趣, 所以每次都要好頭痛去諗煮乜.  今次我都冇咩心機去預備, 隨便煮幾樣小菜算了, 份量亦預少一點.

叉燒和泰式燒豬肉, 因為枱太長, 分開兩碟, 呢碟係細碟的, 還有另一碟大的.


蝦仁冬菇炆魚肚, 奶奶最鐘意呢味, 食好多魚肚哩.


Monday 18 October 2010

Daddy 返嚟喇

Daddy噚晚終於返嚟喇!

禮物人人有份. 

我的手袋和杯麵.  我冇叫佢買杯麵架, 不過我話過日本啲杯麵好食過呢邊賣既, 佢行過見到就買俾我囉, 真抵錫.


大仔有迷你遙控火車, 幾鬼開心.


Saturday 16 October 2010

快活

趁Daddy還未返, 我今日決定要去風流快活一下, 做一樣Daddy喺度好少機會會做的事.

我去偷食!

還帶了兩個囝囝一齊去.

目的地係West Coast Food Centre, 即係熟食中心(hawker centre).  Daddy好少會帶囝囝去hawker centre, 因為冇冷氣會好熱.

細路仔熱吓冇所謂啦, 俾佢哋体驗吓食平嘢都好, 唔係佢哋以為次次都食有冷氣的餐廳.

之前食過一次, 今次一到就向目標進發.  呢檔我覺得好好味, 衛生評價有A級的.


叫了一碟粿汁(滷豬雜)和一碟滷豬手, 兩碗類似河粉的湯粉和一碗白飯.  細佬最鐘意隻滷水蛋.  碟豬手超正, 唔算肥, 啲肉仲好爽添.


Friday 15 October 2010

揾自己笨

話說幾個星期前買了一包芝士碎, 裏面有Mozzarella和cheddar, 打算用來做麵包的. 

只整了下面呢兩個腸仔芝士包就冇再用過, 因為囝囝話唔鐘意食啲芝士喎. 


為了在包芝士變壞之前消化佢, 幾個星期前的星期六早上就決定試吓整pizza.  家裏有好幾個pizza底的食譜, 最後決定跟一本好舊的BBC Good Food magazine裏的食譜.

個食譜係一個意大利廚師寫的, 所以諗住實掂. 

個食譜有啲似老麵或中種做法, 要先整個麵種的.  要用500g麵粉, 食譜話要搓到麵糰表面滑到好似BB pat pat 咁喎.  500g 粉搓到手都軟, 都唔覺得有BB pat pat 咁滑, 但已經無力繼續. 

因為是即興的, 所以要挖雪柜揾料放上pizza 面, 結果放了煙肉, 腸仔, 鮮蘑菇和車厘茄, 還有自製的番茄醬.


Thursday 14 October 2010

飛來的大閘蟹

想不到今年有大閘蟹食, 實在很意外.

三個星期前, 大姑奶(Daddy的姐姐)問我識唔識煮大閘蟹, 我話識, 咁第二朝雪柜就多了四隻大閘蟹.

原來是大姑奶夫家的親戚從大陸帶回來的, 但大姑奶的老公(我唔知點稱呼)唔食海鮮的, 所以就送給我們.

上年Daddy去大陸公幹時都有買回來, 貴到屎, 但好細隻, 又冇膏. 

今次呢四隻大隻好多, 三隻公一隻母.


好多膏, 呢度只show到少部份, 因為我已經急不乃待去吮啲膏了.


兩個囝囝勁識食, 兩個分咗一隻, 不過要我剝俾佢哋食. 

Daddy和姐姐就邊食邊話"都係斯里蘭卡蟹好食啲, 大閘蟹咁細隻, 要花咁多功夫先食到咁少少肉", 俾佢哋激奀, 如果我唔係感冒唔舒服, 我自己食埋唔俾佢哋食添呀, 有好嘢都唔識欣賞.

Daddy問我係咪食得好爽好開心呢? 我話係好食, 不過我個頭痛到要裂啫. 

Wednesday 13 October 2010

Daddy 不在的星期日

今個月是Daddy的公幹月, 上星期去了香港, 今個星期在日本, 下個星期去泰國.

Daddy唔喺度, 我就要自己攪掂.  兩個囝囝似孚好開心, 因為冇王管.

星期日我就要帶兩個囝囝去剪頭髪, 平時都係Daddy開車去SUNTEC 的, 要我開車去, 我都有啲戰戰兢兢.  冇Daddy喺度喝住兩隻馬騮, 我同姐姐好辛苦一人mark一個.


有啲小朋友未剪就喊到飛起, 我呢兩個都不知幾輕鬆, 仲熟到識自己去揀碟睇, 只要有電視睇就乜都得.


Tuesday 12 October 2010

蜜糖排骨

見Mommy Dearest post 咗蜜糖排骨, 我都唔執輸.

呢碟係姐姐上星期日晚煮的, 參考方太的食譜, 好好好好食.  兩個囝囝爭住食.

姐姐趁我帶大仔去上游水堂時慢慢煮的, 好好心機煮到個汁夠杰, 連啲薑絲都索晒蜜糖味.  可惜煮得咁少, 我都係分到一條咋. 

姐姐話啲排骨好貴喎, 所以只煮半包, 真係好慳唔慳.


其實我自己都煮過, 不過我趕時間, 就變咗下面呢碟水潦潦既version嘞, 味道同上面嗰碟差唔多, 只係少咗啲香味啫.


點解我話"參考"方太的食譜呢? 因為佢個食譜係用好多蜜糖的, 我大量減蜜糖份量都己經夠晒甜, 如果照足原食譜, 我諗會甜到食唔落.



Monday 11 October 2010

酵素 (士多啤梨, 提子)

有人話整酵素會上癮, 似乎係真既.

自從第一樽薑酵素後, 到蘋果梨, 之後蘋果梨紅蘿蔔, 到下面的士多啤梨提子.




今日啱啱收成, 隔出來的提子仍然很甜, 我拾不得打爛佢, 索性一粒粒咁食.




呢樽酵素我仍未試, 不過姐姐話好甜好味.

其實上癮既係姐姐, 唔係我, 只有最初兩樽係我整的, 其他都係姐姐整. 

而且幾孚全部的收成都是姐姐飲, 因為第一樽收成以來我就病咁耐, 唔敢亂飲.

我亦懷疑我唔受得酵素, 每次飲完就好似又喉嚨痛.  本來已經冇再喉嚨痛, 但今日下晝試飲咗啲蘋果梨紅蘿蔔同食咗上面嗰樽的兩粒提子, 幾分鐘內就又喉嚨痛. 

但姐姐連啲薑酵素都飲晒都冇事喎, 係咪唔關酵素事呢?

呢樽酵素咁大樽, 我決定聽晚送少少去俾奶奶試吓, 希望飲咗對佢有帮助, 又唔會好似我咁有"副作用"啦.

Friday 8 October 2010

公司週年晚宴 (加相)

上星期五是我公司的週年晚宴, 主題是上海之夜, 在Harbourfront Centre 的一間酒樓舉行.

泊好車後, 就見到日落, 好靚.


會場佈置好懷舊feel.


Thursday 7 October 2010

泰式牛肉沙律

病了幾乎三個星期, 喉嚨痛和咳一直都無法斷尾, 食西葯食到渾渾沌沌. 

星期日決定轉睇中醫, 原來我係寒底, 佢話我脈相弱, 血壓低, 貧血, 總之就係身子弱.  開咗一個星期葯, 食完一日, 第二日起身已經覺得有改善, 喉嚨唔痛.  現在已經好少咳, 成個人都精神番.  原來中醫都幾有效的.

我同媽咪講話中醫話我身子弱, 佢好好笑咁答: "吓, 你食咁多嘢都會身子弱架咩?" 

Daddy生日時食剩一塊牛扒, 當時姐姐話點算, 我隨口講"不如用嚟整泰式牛肉沙律啦, 不過屋企好似無生菜之類喎"

第二晚放工返到屋企, 飯枱上就出現呢碟嘢.



哈, 姐姐真醒目, 我隨口噏佢又真係整到, 冇生菜但响雪柜挖出最後兩個蕃茄. 

原來我其中一本食譜書中有泰式牛肉沙律的食譜, 佢逐本揾俾佢揾到.

呢碟嘢係好正好開胃的, 一定要再encore.



Wednesday 6 October 2010

坐A380的蛋糕

坐A380去香港, Yeah!

可惜唔係我, 係呢盒蛋糕, 隨行的係Daddy.


Daddy星期日朝早飛去香港公幹, 撞啱嗰日係我媽咪的新曆生日, 所以預備蛋糕叫佢帶去.

諗來諗去, 有咩蛋糕可以經得起旅途上的顛簸, 又可以唔駛放雪柜呢?  Muffins 就合晒要求.

一次過整兩款 - 焦糖蘋果和藍莓金寶.

焦糖蘋果是照獨角仙的食譜, 藍莓金寶則是從朋友今年送給我的蛋糕書(Okashi, sweet treats made with love, by Keiko Ishida) 中找到的.

第一次炒蘋果, 邊炒邊問不停姐姐"咁算唔算金黃色?"

第一次煮焦糖漿, 食譜話"收細火煮成焦糖漿", 咁即係點? 焦糖漿係咩樣架? 要煮幾耐呀? 結果太杰, 加入麵糊唔多撈得勻.

第一次整金寶, 書裏面話用food processor, 我冇, 就用叉和手.

出爐攤凍後試了少少, 兩款都好好味, 唔太甜, 應該啱媽咪口味.

選了存貨中最硬淨的蛋糕盒, 因為怕Daddy唔小心拎會撞爛啲蛋糕.


媽咪話蛋糕好味, 佢好鐘意.  佢仲俾咗我細妹對仔女食, 佢哋一邊食一邊猛話"好好食呀!".

我大仔就身在福中不知福, 掂都唔掂.



Tuesday 5 October 2010

HK trip Sep 2010 (3)

九月十三日

之前一日已經和家人慶祝了, 正日就約了朋友食晚飯.

不過當日最好味的, 亦是最正的生日飯是我爸爸煮的即食麵.

朝早遲起身遲食早餐, 所以午餐唔想食多, 只想食即食麵. 

要煮的時候, 爸爸"搶"住要帮我煮, 還加了幾片生菜, 那碗麵煮得啱啱好, 啱啱熟又彈牙.  呢碗麵令我好感動, 爸爸身體唔好都堅持煮俾我食, 諗起我都會眼濕濕.

晚飯在元郎的一間茶樓食, 三個小菜, 好味夠鑊氣.  兩個人三個餸加一支啤酒, 唔駛食飯.

咕嚕肉, 蜜糖豆炒雙蚌, 西芹牛柳粒.



Monday 4 October 2010

HK trip Sep 2010 (2)

九月十二日, 即我生日前一日, 上晝去完金鐘買嘢食嘢後, 下晝就返屋企樓下會所唱k當慶祝我生日.
唱k前姨甥女和姨甥仔响兒童房內擺pose影相.




好耐冇唱k了, 發覺新歌都唔識唱.  不過全家一齊唱k, 都幾好玩.  之後蛋糕師傳細佬就送來我的生日蛋糕, 好正的朱古力蛋糕, 中間有金莎醬朱古力夾心. 


Friday 1 October 2010

HK trip Sep 2010 (1)

終於的起心肝去寫九月香港行.

返香港最主要目的並非食嘢, 買嘢, 而係陪爸爸媽媽.  十七歲己經離開香港, 所以每年只有機會見他們兩三次, 一定要珍惜見面時間.

由英國公幹返新加坡停一晚, 等二日 (九月十日)就飛返香港, 到香港屋企己經八點幾了.  其實在機上都已食飽, 不過都要媽咪陪我去食宵夜.

腸粉, 好味道.


Happy Children's Day

今日香港人因為國慶放假, 我囝囝就因為新加坡兒童節一樣有假放, 可惜大人仍然要返工.

駕車上班途中, 電台播了這首歌, 很久以前梁文福的歌, 也只有他寫得出這樣的歌詞.  大家不妨聽聽, 相信香港人一定都沒聽過, 歌詞一次過帮你重温當年中史課. 

曾經中史是我最愛的科本, 直至中三時讀到近代民國, 毛澤東, 大躍進, 太亂了, 把我對讀中史的興趣完全消滅, 所以我對最後一句歌詞好有同感.



歌詞:

如果秦始皇燒書都燒完 我不必讀到三點半
如果周公真的忙著治天下 何必不斷催我入夢鄉

三閭大夫不投汨羅江 賣粽子老王生活怎麼辦
如果楚霸王當年不到烏江 隔壁班劉邦不會這麼囂張

西施不浣紗 昭君不和番 現代的古典美人做何打算
如果劉備哭不出諸葛亮 會不會鬧出一陣劇本荒

只看過薛丁山 偏要考安祿山 知道馮寶寶她演過楊玉環
若非十二金牌將岳飛來調返 今天還吃不吃到油條香

我吃過月餅當然知道朱元璋 吃榴槤知道鄭和下西洋
胡金銓的戲裡聽過東西廠 看金庸小說知道袁崇煥

只嘆林則徐燒鴉片燒不完 西太后偏偏相信義和團
珍妃不該嫁給那個光緒皇 幾千年等到一個孫中山

萬里長城長 沒有歷史長 考試題目比那絲路還彎
五胡亂華亂 我的腦筋更亂 心情比那個八國聯軍慌

多少年的改變已經很習慣 多少次革命總是革不完
謝天謝地近代史老師講不完 下一代歷史考試不敢想像
Related Posts Plugin for WordPress, Blogger...