坐A380的蛋糕

坐A380去香港, Yeah!

可惜唔係我, 係呢盒蛋糕, 隨行的係Daddy.

Daddy星期日朝早飛去香港公幹, 撞啱嗰日係我媽咪的新曆生日, 所以預備蛋糕叫佢帶去.

諗來諗去, 有咩蛋糕可以經得起旅途上的顛簸, 又可以唔駛放雪柜呢?  Muffins 就合晒要求.

一次過整兩款 - 焦糖蘋果和藍莓金寶.

焦糖蘋果是照獨角仙的食譜, 藍莓金寶則是從朋友今年送給我的蛋糕書(Okashi, sweet treats made with love, by Keiko Ishida) 中找到的.

第一次炒蘋果, 邊炒邊問不停姐姐"咁算唔算金黃色?"

第一次煮焦糖漿, 食譜話"收細火煮成焦糖漿", 咁即係點? 焦糖漿係咩樣架? 要煮幾耐呀? 結果太杰, 加入麵糊唔多撈得勻.

第一次整金寶, 書裏面話用food processor, 我冇, 就用叉和手.

出爐攤凍後試了少少, 兩款都好好味, 唔太甜, 應該啱媽咪口味.

選了存貨中最硬淨的蛋糕盒, 因為怕Daddy唔小心拎會撞爛啲蛋糕.

媽咪話蛋糕好味, 佢好鐘意.  佢仲俾咗我細妹對仔女食, 佢哋一邊食一邊猛話"好好食呀!".

我大仔就身在福中不知福, 掂都唔掂.