Daddy去香港公幹, 回來給我一盒東西, 說特別給我的.
我以為是老婆餅之類, 原來是皮蛋. 打個突, "吓, 做咩買皮蛋返嚟? 呢邊都有啦"
Daddy: "鏞記皮蛋呀, 我同事話好出名架".
咁我真係孤陋寡聞嘞.
但查實鐘意食皮蛋嗰個係Daddy唔係我喎, 買比佢自己定買俾我呀?
後尾揭吓本飲食男女, 真係提到鏞記皮蛋喎, 原來真係好嘢嚟噃.
個盒都好靚架, 裏面有六隻, 仲附上一盒酸薑. 哈哈, 原來皮蛋都有禮盒裝喎.
一直唔知點整啲皮蛋, 咁靚用嚟煲粥好似嘥咗佢.
星期六諗唔到煮咩, 突然諗起某本雜誌提過皮蛋豆腐, 就咁整啦.
小心翼翼剝開兩隻皮蛋, 係冇松花紋既, 但比平常的軟身, 顏色淺啲.
切開後, 居然係溏心的, 咁大個女第一次見過溏心皮蛋哩.
切丁, 放在豆腐塊上, 加蔥花, 淋上麻油豉油和少少淅醋. 豆腐仍冰涷, 皮蛋甘香, 十級好味.
平時我很怕皮蛋黃, 通常要混在粥裏面一口氣吞落肚, 但呢兩隻溏心皮蛋, 蛋黃蛋白都咁好味.
剩下四隻, 要慢慢去享用. Daddy話下次番香港帶我去買喎, 睇吓幾大鄉里呀, 要個新加坡人帶我去香港買嘢.
wow.. this is one of my favourite... yummy
ReplyDelete[版主回覆10/26/2010 11:10:00]It's really yummy and it's so easy to make.
其實我都不知道鏞記的皮蛋如此好吃呢﹗
ReplyDelete[版主回覆10/26/2010 15:02:00]我都係幾日前先知, 真係好正!
我都去品嚐過, 真係好正的皮蛋...
ReplyDelete[版主回覆10/26/2010 15:02:00]慘啦食過咁正既皮蛋, 我唔想食普通嗰啲啦.
哈哈哈....有我伴你, 都係我星洲同事講我知鏞記皮蛋~正正正! 可惜我仲未嘗過, 有次在裕華買到無沿溏沁皮蛋, 甘香可口, 頂住癮先........
ReplyDelete[版主回覆10/26/2010 15:04:00]佢都係星州同事同佢講架, 連我媽咪都係唔知呀. 裕華有得賣溏心皮蛋呀? 我下次要去買.
鏞記的皮蛋我都係食過一次咋..仲要係家姐大人係HK買返來,我先知道有呢樣咁正既野,所以唔只你一個大鄉里,分分鐘好多HK人都唔知呀,真的!
ReplyDelete話時話,又真係好鬼好味架..下次返HK真太多野想買呀..
[版主回覆10/26/2010 15:04:00]哈哈, 連我爸爸媽媽都唔知呀. 但係真係好好味.
我係鏞記飲茶時食過, 不過我就唔知有禮盒,
ReplyDelete我都好鍾意食呢個餸架, 不過豆腐要蒸完再放番雪櫃, 我無耐性, 通常會煎咗嚟食先!
[版主回覆10/26/2010 16:07:00]唔駛蒸架噃, 買盒裝的就咁食就得啦, 好似食盒裝豆花咁之嘛. 如果喺街市買一磚磚啲豆腐就要先蒸熟.
唔講都唔知有鏞記皮蛋。。。
ReplyDelete下次回香都要買番一盒黎試下先至得！
[版主回覆10/27/2010 11:20:00]真係唔錯, 可以買嚟試試.
鏞記皮蛋我在香港時食過一次。不過我都唔知點叫做靚定唔靚。你們那邊買得貴唔貴呀?在法國賣得好貴, 所以我來了呢邊好耐都未食過呀!
ReplyDelete[版主回覆10/27/2010 11:20:00]唔知幾錢呢? 我老公同事唔肯收番錢.
唔知有咁豪華既禮盒裝 我都是吃飯才吃一塊起兩塊止，我未到沉迷，可能係成日比啲過多健康資訊充斥頭腦...
ReplyDelete[版主回覆10/27/2010 11:19:00]我都係啱啱先知. 其實我都唔會沉迷既, 都係食幾塊啫.
hahahaa...大香里,我都係呀...不過我係唔食皮蛋既...但睇相,望落去個樣又真係幾靚仔咁喎!!
ReplyDelete[版主回覆10/27/2010 16:19:00]真係好味架, 我都麻麻鐘意食皮蛋, 但呢隻好都話好食.
我係佢間舖入面食過咋, 都唔知有禮盒裝....
ReplyDelete[版主回覆10/28/2010 16:14:00]我連鏞記都未入過呀, 喺邊我都唔知.
我都唔知幾錢。因為我上次食係人地請我去食飯。所以我都唔知價錢。我想佢好出名,應該都唔平掛。
ReplyDelete[版主回覆10/29/2010 09:34:00]我諗都唔會平, 名牌貨嘛.
鏞記皮蛋我都未聽過
ReplyDelete[版主回覆10/30/2010 20:48:00]我都係啱啱先知.
我都係大鄉里..
ReplyDelete[版主回覆10/30/2010 20:49:00]好彩有咁多人陪我.