豬年快樂!

今日年三十, 先祝大家

豬年大吉大利! 

身壯力健! 

步步高陞!

今年Daddy公幹去了, 要過完年才回來. 所有過年前要預備的, 我都要一腳踢.

只得一對手, 所以只做了少少賀年食品應節就算了.

幾個星期前問奶奶要唔要蘿蔔糕, 芋頭糕, 佢話唔要要. 年年其實都係因為佢要我先整, 今年無Daddy喺度幫手食, 奶奶話唔要就梗係索性唔整.

點知星期六即年廿八, 打電話問奶奶仲有咩要拎俾佢, 佢突然話要蘿蔔糕!!! 本來已經去完街市買完餸, 又要臨時去買蘿蔔, 跟住快快就蒸兩底細的. 年糕就仔仔們order的, 今朝已經煎嚟做早餐了.

忘了從幾年前開始就每年都整鳯梨酥, 當時是Mommy Dearest教我整的. 細佬由細到大年年都會幫手, 已經成了熟手技工, 只要把饀和搓好的餅皮放他面前, 他便可以自動波整.

今年豬年應下節, 整了豬仔造型.  未入爐前好可愛的. 

多得Mommy Dearest 指教, 豬仔鳯梨酥尚算成功.  不過我放工後才開始整, 豬仔造型要好有耐性去整, 於是整了三排後決定放棄, 整返普通型, 因為當時已經成十點了.

焗好的樣子, 好彩臨時決定唔搽蛋汁, 搽了蛋汁的豬仔變了污糟豬.  焗好才發現有幾隻忘記督鼻窿.

簡單的聖誕晚餐

今年年尾特別忙, 卻是充滿感恩的.

教會詩班今年除了12月17日在教會門口辦了個戶外聖誕音樂會, 還有12月22日在烏節路報佳音, 再要在12月23日在教會的聖誕晚會獻詩, 所以自從由台灣旅行回來後就是一直練詩, 返工外還有做不完的家務(因未請到新姐姐).  每日都覺得攰到成身痛, 每晚躺在床上就大昏迷了, 但感恩有足夠精神體力去挨過.

12月17 日和12月22日的音樂會和報佳音都是傍晚時份在室外舉行的, 而正好每次開始前都落雨, 還要好大雨, 奇妙的是每次都在要開始時雨就停了, 讓我們可以如期獻唱, 真的體會到主的信實.

囝囝們1月2日開學, 要趕在之前找到新姐姐.  前星期找到了, 安排好22日飛來, 突然說出不了境. 後來新姐姐再買機票再試闖關, 第二次終於成功出境飛來了.  昨日27號來我家上班了, 大家都鬆一口氣.  原來第一次不能出境是因為枱底俾得太少錢, 第二次塞夠錢才放行.  其實姐姐們好可憐, 出外打工賺錢, 出境還被榨壓.

忙到聖誕過後, 終於Boxing Day煮了今年的聖誕晚餐.  日間還要出門買書買校服等, 沒多少時間煮, 又沒姐姐幫手, 一切從簡.

有用了button mushroom, shitake mushroom 和portobello mushroom 煮的mushroom soup. 前菜是prawn, avocado and mango salad, 配上honey lime dressing, 超級開胃.

另一個前菜是芝士煙肉釀細portobello mushrooms.  主菜是鬼嫁的無焗爐版燒牛肉, 配菜是Jamie Oliver 的roast potatoes, 還有求其的烚西蘭花. 

今次買了1kg的西冷來做燒牛肉, 照鬼嫁的做法, 每次都成功的, medium rare, 朋友大讚. 

娘惹賀年食品: Kuih Bangkit 茨粉餅/番婆餅

Daddy最鐘意食的賀年食品並非鳯梨酥, 腰果酥, 年糕, 蘿蔔糕之類, 而是一種叫kuih bangkit的娘惹食品.

每年我整賀年食品時, Daddy都會問點解唔整kuih bangkit.  原因係: 1. 我唔識整. 2. 我唔鐘意食.
當然原因2係主因啦, 無理由唔鐘意食又嘥功夫嚟整嘛.

不過, 見佢講咗咁多年, 我又逼佢食咗咁多年港式食品, 今年就試整.

Kuih bangkit的材料好簡單, 主要有木薯粉, 椰漿同糖.  味道就係微甜有椰香.  口感是入口即化但又有點粉粉的感覺.  其實好難去形容, 總之呢種口感我係唔鐘意的, 但偏偏就係這樣餅的特點亦是最難做到的.

做法又唔難, 只係有啲煩.  木薯粉原來係幾濕, 所以第一步要先用白鑊炒, 炒到啲粉乾身同夠鬆. 一路炒啲粉就一路飛, 好彩有姐姐幫手善後.  炒完後攤凍就可以加入打發的蛋黃和糖同埋椰漿.  我睇咗好多個食譜, 個個做法都大同小異但又有啲唔同, 最後粉糰的乾濕度就人人唔同.  第一次整唯有靠估.

登登登登....

成品就是這樣, 表面有裂痕的是較乾身的粉糰整的, 平滑的是濕一點的.  因為用曲奇模吸時, 粉糰慢慢會變乾啲, 途中會加少少椰漿, 所以有啲乾啲有啲會濕少少.  外面賣的通常會用食用色素在餅上加一個紅點做裝飾, 但我的是自己食就費事多此一舉.

一次過整了兩大盆, 168塊, 有排食.

今次的嘗試是半失敗的, 味道係無問題, 但做唔到應有的口感.  表面多裂痕的較近似, 表面平滑的就唔掂啦.  所以我估粉糰是要偏乾先可以達到應有的口感.

失敗乃成功之母, 以後再嘗試, 不過真係唔知幾時會再整.

過年就是不停吃

今年因為年三十是星期五, 仍然要返工, 加上奶奶不想出門(連來我家都不想), 所以團年飯就食打邊爐.  星馬兩地的華人(除廣東人外)通常團年飯都會打邊爐, 我未結婚前Daddy一家都是打邊爐團年的. 當晚將電磁爐和所有食材搬到奶奶家就可以開飯, 我只需事先醃肉, 方便快捷.  只是平常的打邊爐食材, 無咩特別, 無影相.  食剩好多料, 初一午餐去奶奶家拜年又再食打邊爐做午餐.

初一晚餐又是例牌臘味煲仔飯和南乳炆齋.  其實我到依家都唔明點解初一要食呢兩樣.  今年的臘味是十一月返香港時在安記買的, 好好味呀!  臘鴨脾勁大隻, 潤腸好香酒味, 正到暈.  我今年好懶, 無咩計劃, 連冬菇同枝竹都忘記浸, 所以炆齋似南乳雜菜煲多啲.

賀年食品

今日年三十, 先同大家拜年.

新年快樂!

萬事如意!

財源廣進!

身體健康!

心想事成!

步步高升!

今日仍然要返半日工, 所以團年飯一切從簡, 照新馬傳統食打邊爐算了. 

每年農曆新年前都好忙好忙, 淨係買餸都要走幾轉先買得齊.  年年都同自己講不如簡簡單單算啦, 唔好攪咁多. 但係最尾都係整呢樣整嗰樣, 都係晚晚唔夠瞓先安落.

今年我終於整好鳯梨酥過年了, 不過只整了一小罐, 只夠自用.  過咗年先再做來送人.  

炒菠蘿饀時, 開油鑊炒蝦片.  既然開了油鑊, 索性炸多樣嘢, 於是就整笑口棗.  第一次整, 都有爆開口, 都幾靚.  哥哥即日食讚好味, 不過隔咗夜就唔脆了.  我諗我加太多水來搓好粉糰, 下次再試.

網上見到Zoe的鹹蛋黃曲奇, 好易整, 又整了兩大盆.  做成細細塊的, 好好味, 可以一塊接一塊食唔停.

星期一晚上整的, 鋼琴老師教完囝囝們後, 貪得意用牙籤劃花, 又幾靚喎.

最後當然有蒸糕bell啦, 蘿蔔糕加芋頭糕, 年廿八晚蒸到成十一點先蒸好, 攰爆. 蘿蔔糕和芋頭糕都是自用和送奶奶的, 所以唔會加蔥, 芝麻等在上面裝飾.

仲差年糕未整, 晏啲有時間就整埋啦.

年初二: 撈魚生, 打邊爐+韓燒

今年年初二開年飯我不想煮大餐了, 打邊爐加上韓燒, 不用大費周章.

請了關顧的留學生來一齊食, 四個學生最後只有兩個能來, 男朋友們不是回國過年就是沒空. 本來打邊爐就夠了, 但Daddy提議加上韓燒, 於是邊爐料和韓燒料都要準備, 人少少會吃不完, 臨時找來朋友夫婦兩人來幫手食.

其中一個學生沒試過撈魚生, 所以特別為她預備了.  今年自己刨白蘿蔔, 青蘿蔔和紅蘿蔔絲, 加上煙三文魚和超市買的撈魚生料(就是甜蕎頭等的醃菜, 薄脆和梅醬, 油, 香料等), 份量不多, 撈撈來玩就算了, 撈魚生基本上是好玩多過好食嘛.

開飯前圍着一起撈呀撈, 真的又熱鬧又好玩.  大家拿着筷子準備開始撈時, 哥哥已經在夾煙三文魚了.

過年打邊爐材料就食好一點的, 所以有日本和牛片和黑豚腩肉片和五花肉片, 還有豬潤, 魷魚, 帶子, 大蝦, 魚片, 菜, 菇菇, 魚皮餃等等, 當時肉丸, 墨魚丸魚蛋豆腐粉絲等還未出場, 湯就簡單的海帶魚乾湯.  每樣材料少少其實都已經好多, 最後剩下很多.

打邊爐已經夠食有餘, 但Daddy覺得要加韓燒, 因為新買的無煙韓燒爐實在太好用. 本來Daddy是想團年飯打邊爐和韓燒, 因為奶奶未試過食韓燒.  不過奶奶行動不便, 打邊爐加韓燒食起來真的有點混亂(間中要行來行去), 而且奶奶易攰, 食飯要快, 慢慢烚下燒下奶奶應該頂唔順.

這爐上年年尾買的, 真的無煙無味, 在家裏玩韓燒也不怕成間屋油煙.  以後再出一篇來介紹這爐.  這爐極易操作, 所以這晚由兩個囝囝做大廚負責燒肉.

懶懶的年初一

往年新年我都會日日煮由團年飯煮至初二開年, 然後小組聚會又再煮.

但今年好懶, 只煮了團年飯一餐, 初一沒煮, 初二打邊爐, 小組也沒有聚餐.  今年也只蒸了兩小底蘿蔔糕和一底年糕, 焗了一盆鳯梨撻, 一切從簡哩.

其實初一我都有入廚房的, 不過只係煎糕做早餐.

其餘兩餐就去了痴餐, 午餐在奶奶家吃, 晚餐去好友(亦是哥哥的鋼琴老師)家吃.

所以哥哥今年年初一都要學琴, 學完琴老師才入廚房開始煮.

我也沒白白痴餐的, 囝囝學琴時我就到廚房裏做廚工幫手洗洗切切.

我們兩人在廚房邊煮邊笑, 好開心地煮好一餐.

朋友第一次煮生炒糯米飯, 炒到手軟不過好好味.  她切臘味時還切到手指, 這糯米飯真正是有血有汗的.

初一當然要有南乳炆齋

煎金蠔, 夠鹹香.

還有臘肉炒芥蘭和我帶去的冬菇炆海參(團年飯剩菜), 就是很豐富的一餐.

說說笑笑一個晚上, 今年年初一過得真開心.

團年飯2016 - 自製盆菜

今日已經初八了, 先來個遲來的拜年.

祝新春快樂! 猴年大吉! 心想事成! 身體健康! 財源廣進! 小朋友聽教聽話, 學業進步!

今年團年飯決定試整盆菜.  其實我只食過三次盆菜, 最後一次食好像是十年前, 所以對盆菜裏面的菜式沒什麽印象.  看了Moonmoon的blog和向Mommy Dearest請教過後, 胆粗粗買齊材料開始煮, 好緊張呀!

只有我們一家, 奶奶和兩位姐姐一共七人, 用24cm Fontignac 鑄鐡煲容量剛好, 但上層面積有點細, 不夠地方砌面層的食材.  如果用LC Marmite會更適合, 但我的媽咪鍋是32cm 太大了, 砌滿一煲不知道要食幾餐才食得完.

成品就是這樣, 還不錯吧? 奶奶食得好開心呀.

另一角度

自製豬肉乾 (附食譜)

新加坡的賀年食品和香港的很不同.

香港人食蘿蔔糕, 芋頭糕, 油角, 芋蝦...

新加坡人過年就一定會有豬肉乾, 黃梨撻, 蛋卷和各式的餅類(如腰果酥).  所以近過年期間出名的那些肉乾店都會大排長龍, 價格亦較平常貴好多.

我其實一向對豬肉乾興趣不大, 而且過年時又貴, 所以從來都不會買.

細佬今年小二, 最近的中文課文主題是農曆新年, 當中提及豬肉乾, 於是日日都叫我買豬肉乾, 更指明要美X香的(一定是看了很多電視廣告), 哥哥亦加把口說很久沒吃想吃.

經過美X香, 瞄了一下價錢, 嘩, S$52/kg!

還是自己做好了.  在超市買一盒300g的免治豬肉, 才S$3, 一下子就做好了一碟豬肉乾.  自家製真材實料, 又無添加, 食得經濟又放心.

囝囝們食得好滋味, 還讚比外面賣的好味 (其實他們有吃過外面的嗎?)

兩兄弟即日就KO了這碟豬肉乾.   無所謂, 做這個不費時, 想再食時再做, 現做現吃更好味.

原食譜是四年前Apelles給我的, 我稍微縮短了焗的時間.

材料:
免治豬肉 450 g (1 lb)
調味料：-
老抽 1 1/2 tbsp
魚露 1 1/2 tbsp
生抽 1 tbsp
酒 1 1/2 tbsp
糖 90 g
五香粉 少許 （optional）
蜜糖

適量
做法：-
1. 豬肉加入調味,攪至起膠
2. 將豬肉碎放在牛油紙/或錫紙上,用西式湯匙按壓成薄片(or cover with cling wrap and roll with a rolling pin),約2-3mm厚
3. 放入已預熱１７０度的焗爐，烤十二分鐘，翻另一面再烤十二分鐘
4. 塗上適量的蜜糖，將爐温轉至１５０度，再烤至上色即成

Remarks: 不要烤太久，塗蜜糖後每面再焗3分鐘就夠了。出爐放涼後，顏色會變深，肉乾也會變得硬一點。

聖誕晚餐

補祝大家聖誕快樂！

今年聖誕晚餐提早在12月18日吃，請來六年來關顧過的留學生來聚餐。

四個女生，三個連男朋友也一起來，總共七人，加上我們一家五口，我家的大飯枱已經坐不下，要換成自助餐方式了。

今年嘗試焗火雞，從來未煮過火雞，上網找了好幾個做法，最後試了楓糖烤火雞。很怕火雞太大隻吃不完，好彩在超市找到只有3.8kg的火雞，最後只吃剩一點點，第二日午餐就吃完了。

 

怕火雞太細不夠肉給男生們吃，於是炆了一小鍋的啤酒牛肉。這鍋很受歡迎，光速被KO。

 

 

配菜有香脆焗薯

楓糖漿焗蕃薯，這澳洲蕃薯又甜又腍，其實不用加糖漿都甜到漏。好味到食過番尋味，過了幾日又再買來煮。

清炒菠菜雜菌

 煙三文魚批

 牛油果大蝦沙律配mango vinaigrette.  今年學人整色整水，印了餐牌，加棵小小聖誕樹和紅色枱布，勁有節目氣氛。

飯後有兩樣甜品，都是傳統英式甜品，minced pie 和Christmas pudding.  其實我個人對這兩樣甜品都麻麻，純粹買來應節和給學生們體驗一下。

Christmas pudding 完全是個甜死人不償命的甜品，買它就只為了好玩，淋上brandy再點火，人人都拿着相機狂影。

初三小組團拜

初三小組來我家團拜, 其實就是聚餐.

因為是星期六, 又是初三, 很多組員都要陪家人食飯拜年等, 於是今年很少人來我家, 只有五大三小, 加上我們一家四口才七大五小. 

人少我也煮少一點, 不想有剩菜了. 簡單的六餸一湯, 白飯任裝.

初二開年

年初二又繼續悠悠閑地去拜年, 十點幾去大姑奶家拜年, 然後去二姑奶家, 之後就大功告成, 午餐還可以回家吃.

大姑奶和二姑奶都沒小孩, 但都愛養狗, 對她們來說, 狗狗就是她們的小孩吧.  當年我和Daddy結婚後, 奶奶都沒催過我們生小孩, 因為大小姑奶結婚多年都不肯生, 她已經不再抱任何抱孫的希望了. 

大姑奶的大牧羊狗, 很老了, 眼睛瞎了也不大想動.

 

二姑奶的狗仔, 是個很特別的品種, 我叫不出來.  家裏客廳放了個超大狗籠, 沒人在家時就把狗狗關進去, 以免它在家搗亂. 囝囝們見到狗籠, 居然覺得好玩, 爬入去覇住了, 狗狗只好在狗籠外無奈徘徊.

 下午大部份時間在家裏行行企企, 看看書, 陪囝囝們玩玩, 才慢慢煮開年飯.

今年開年飯請了新的學生(外國留學生事工所關顧的學生)來作客, 五個人的晚餐煮了五餸一湯, 簡簡單單的, 但對每天在外吃的學生來說已經很豐富了.  雖然廣東口味和她的家鄉口味(湖南)不一樣, 但能吃到住家飯也大概很感動了吧.

鮑貝扒生菜

XO醬西蘭花炒帶子, 帶子很鮮甜, 但我太重手落太多XO醬, 勁辣!

細細隻的豉油雞

燒腩肉, 今次買到少肥膏的靚腩肉, 但不知那裏出錯, 皮不夠鬆化.

學生想嘗我做的芋頭糕和蘿蔔糕, 於是煎了一小碟.

還有粟米魚肚羮, 不過我煮得像湯多一點, 因為菜式都是多肉的, 湯想清淡點.  拍照拍不出湯裏的料, 索性不拍了.

初一例牌

年三十之前要蒸糕, 整餅, 儲糧(新加坡街市年三十只開半日, 然後休市好多日才開的, 超市到初二都可能沒鮮肉和蔬菜賣)等等, 到年三十煮完團年飯就感覺可以鬆一口氣了.

人家新年忙拜年, 但我新年期間卻清閒得很, 因為娘家不在這邊, Daddy的親戚也很少.  年初一只需要去奶奶家拜年食午餐, 再去哥哥小時候的保姆家拜年就可以了.  Daddy的兩個姐姐都沒小孩, 利是也省了, 初一, 二兩日加起來所派的利是一隻手數得完呀, 都是給工人姐姐們和老人家!

悠悠閒拜完年, 回家就煮初一例牌了.  小時候家裏初一都一定是這兩樣的, 年年如是, 我自從結婚以來也是每年都跟足的.

南乳炆齋, 我喜歡多點湯汁的.

臘味煲仔飯, 今年沒買臘鴨, 只有臘腸, 膶腸和臘肉.  這煲飯是用最近買的鑄鐡鍋煮的, 比LC便宜一大截, 但so far so good, 蠻好用, 下次再介紹.

囝囝們最近口味又換了, 兩個都不愛吃臘腸了.  這餐要翻熱團年飯食剩的白切雞給他們送飯, 剩下的臘肉臘腸初二午餐時用來煮炒飯.

順便post我的肥猫近照, 初一時影的.  今年十四歲了, 所以大部份時間都趴在那裏休息, 囝囝們逗它玩也不大理睬了.

2015 團年飯 (附醉豬脷食譜)

今日年初六, 先祝各位

羊年快樂!　

吉祥如意！

心想事成！

身體健康！

今年初一剛好星期四，兩日公眾假期再加週末，連休了四日, 真開心.

雖然有四日假期, 但我由年廿九就開始日日煮到年初四. 

沒辦法, 作為唯一的新抱, 娘家又不在這邊, 煮飯任務只有我一個人做. 

今年團年飯八餸一湯, 我們一家加上奶奶和一個學生一起吃. 

發財好市, 今年煮得好味.

初三小組聚餐

初三踫巧是星期日, 大清早起來到教會去. 囝囝們最開心了, 因為收到好多利是, 當然我也派了不少啦.

那天晚上生命小組來我家聚餐, 今次由我一個人負責, 因為其他人要去團拜.另外兩個姐妹本來也會帶食物來, 但臨時有幾個組員病了不能來, 我看人不算多, 我預備的應該夠吃了, 所以叫她們不用帶來了.

十一個大人五個小孩, 吃完午餐後開始慢慢的準備, 很輕鬆的就攪定晚餐了.

沒買現成的魚生, 只是自己簡單的刨些紅蘿蔔絲和青瓜絲, 加上煙三文魚, 配上自製的油醋蜜糖芥末汁就是健康版的撈魚生了. 

年初二

年初二只需要去大姑奶家拜年就完成今年的拜年了, 親戚少也不錯, 很多自由時間.

中午去Great World City 食日本餐, 然後看Frozen.  好好看的迪士尼卡通片, 歌也好好聽.

睇完戲食麥噹噹做下午茶, 大人只喝飲品, 只有囝囝們一人個chicken burger加一杯雪糕.

年初一去拜年

奶奶是獨生女, 老爺的弟妹都不在新加坡, 所以Daddy的親戚很少, 年初一拜年很簡單, 只需去奶奶家就夠了.

香港人拜年會帶生果, 曲奇, 糖果等, 星球則很環保, 只需帶兩個柑就可以了. 拜年時把柑送給主人家,然後主人家會拿另外兩個柑來作回禮, 所以基本上過年只需要準備四個柑就夠了(兩個做後備, 以防主人家忘了回禮), 是不是很省錢又環保呢? 

囝囝們送兩個柑給奶奶, 送時要說賀詞的.