餐肉包

不經不覺已經星期四了，今個星期過得特別快，可能因為工作上輕鬆所以時間感覺過得快點。

這星期一至三都有course和seminar，到今天才真正開工，再多一天就要週末， 太好了! 如果每個星期都這樣，該有多好!

回家途中想起這星期還沒post麵包哩， 這是星期日焗的午餐肉包。每個包裏面都包了一小塊午餐肉，剩了少許切碎放在上面。

每星期想做甚麼麵包給囝囝帶返學就很頭痛，有芝士有菜甚至蒽花的他都不食，椰絲也不食。

看我做餐肉包就知道我真的已經江郎才盡，因為平常我是不讓家人食午餐肉，又肥又不健康。

可是越不健康的，他們就越喜歡。星期一囝囝帶返學校食，回來時我問他好吃嗎， 他用四萬的笑容來告訴我：Very very nice! 

可是喜歡也沒用，又要幾個月才會再有午餐肉出現在我家了。

香檳排骨，炒印尼黃豆餅

今晚Daddy不回家食飯，我是放工回家姐姐告訴我才知道，蚩有此理! 

其實我一點都不生氣，晚餐更食得很開懷哩。

因為他不回家吃飯時，姐姐就會特別有推動力去煮。

平常不能煮的，她可以趁機煮。她可以煮辣的，煮有骨的餸菜。

今天晚餐她試新食譜，煮了香檳排骨。 排骨要用牛油煎香再加香檳和調味來炆。我不會這麽豪氣開香檳來煮，所以姐姐用了紹興酒來代替，一樣很香很好吃。

第二道菜是辣椒江魚仔炒印尼黃豆餅，夠辣夠香口，食得好過癮!  

印尼黃豆餅我之前介紹過，是很經濟但有營養的食材。這菜的做法以前寫過了，只是今次加了炸過的江魚仔。

第三道菜是簡單的蜆芥扒小棠菜，姐姐加了急凍蜆肉勾芡淋面。

放工回家有熱騰騰的晚餐等着我，感覺很幸福。 所以我常常為了有個能幹的姐姐來感恩哩。

今晚又辣又有排骨，如果Daddy在家，大概要清菜配白飯吃了。

回鍋肉

從前提起回鍋肉，我只會想起罐頭，直至我去英國留學時才第一次吃到真正的回鍋肉。

記得是在一間新加坡人開的中餐館吃的，那中餐館的價錢對仍是學生的我們來說是蠻貴的， 只有想寵寵自己時才會與朋友去，而回鍋肉是每次必點的菜式。

後來自己從食譜書中學煮，不過自從回來新加坡後就英雄無用武之地，因為我妹妹和當時的男友(即現在的Daddy)都不喜歡吃辣。

星期日突然很想再吃，不管Daddy肯不肯吃都照煮。 買來一小塊豬腩肉，先烚熟，切薄片。之後燒紅鑊下油，將豬肉片炒至金黃色，再下椰菜，豆乾，辣豆辦醬和甜麵醬同炒。因為豬肉要先煮熟再回鍋炒，所以叫回鍋肉。

十個好味! 只嫌不夠辣，因為怕太辣Daddy吃不了，不過最後他也只食了很少。 除了辣外，他也不喜歡吃豬腩肉。還有豬肉下次要烚久一點，還有一點煙韌。

另外炒了一碟不辣的給囝囝們，只用蠔油和魚露調味。結果大佬寧願吃辣的那碟，還很自豪地說他能吃辣。 呵呵，其實根本就不辣!  下次我要重手點下多一點辣豆辦醬或者再加辣椒油。

抹茶豆腐布甸

為食細佬成日摷雪櫃揾嘢食，又成日嚷着要食啫喱，所以姐姐成日會整定啫喱喺雪櫃，而我就整定布甸。

今次整抹茶豆腐布甸，抹茶粉和豆腐中和淡忌廉的肥膩感，食起來感覺很清新。

很喜歡從香港帶回來的牛牛玻璃杯，有埋蓋，方便又美觀。

献詩

願主悅納。

主啊! 唯有你鑒察我， 唯有你認識我。

我需要你在我生命當中， 成為我的力量， 成為我的引導。

哦主， 求你保守我的心， 我的意念，

使我能夠遵行你旨意，

我願將你話語深藏在我心，

作路上的光， 成為我腳前的燈。

哦主， 求你堅固我信心， 我的力量，

使我得以勇敢向前行，

因我知道有時我仍會軟弱，

求你帶領我，使我不會再退縮。

我需要有你在我生命中，好讓我一生能學你的樣式，

使我能成為你所喜悅的兒女，使我的生命能夠彰顯你榮耀。

海南牛肉粉

前個星期五晚去ION Orchard買鞋, 本來想去板長食晚餐, 但公司有事趕遲了走, 去到時板長已經有條超長龍, 只好放棄, 轉去Food Opera (food court).

行了一圈, 被牛肉粉檔的招牌"Scotts beef noodle"吸引我目光. 

十幾歳初來時每週六宿舍都沒提供晚餐的, 我們一大班朋友就要自己出街食.  當時的Scotts Shopping Centre (已拆)樓下的food court是其中一個常去的地方, 那檔牛肉粉就是我最常光顧的一檔. 

上大學後就少去了, 後來那shopping centre拆了, 那攤就不知搬到那裏去.  今次居然給我遇去, 當然要幫襯來重温"兒"時滋味.

平時我都會叫湯麵的, 但以前是吃乾撈的, 為了回味以前的味道, 今次就例外叫了乾撈.

以前的我會取兩碟辣椒醬, 一碟直接倒入麵中一同吃, 另一碟用來蘸牛肉, 所以吃時麵是紅色的, 辣但很好吃.  或者就因為那辣椒害我得了胃病, 現在都不敢吃太辣了.

味道嘛...點講呢? 不是不好吃, 但就是和以前不一樣.  或者從前的味道給我在回憶裏美化, 又或者經營者不是同一人.  無論如何, 這乾撈牛肉粉我應該不會再吃了.

有些事有些人還是讓它/他活在回憶裏會比較好, 回憶永遠是最美好的.

四餸一湯

前車可鑑, 知道三餸一湯未必夠食, 我怕夜晚又要捱餓, 所以星期日晚餐就決定煮四餸一湯.

蘆筍炒帶子, 樣子夠吸引吧?  帶子從街市買的, S$5/kg, 連殼的, 要自己慢慢去清潔. 買了兩公斤, 全部去殼洗淨存到冰箱去. 滿懷期待的煮這道菜, 可惜帶子原來不太鮮甜, 白費一番功夫.

徒手脫模 - 南瓜戚風

星期日下晝用整南瓜麵包剩下的少少南瓜蓉, 焗了一個南瓜戚風.

普通戚風一個, 特別在於我第一次嘗試徒手脫模.

平時我都不想冒險嘗試, 怕整爛蛋糕.  不過今次例外, 因為我整時出了些意外,  以為戚風會失敗, 就索性用來實驗徒手脫模.

意外就是我忘了這個食譜的蛋黃糊因為加了南瓜蓉會比實杰身, 蛋白和麵粉要分次加入.  我因趕時間, 一手將所有麵粉篩入蛋黃糊中, 變成杰撻撻的一團, 之後戰戰兢兢的加入蛋白去攪拌, 沒下泡打粉, 又不敢攪太耐怕會消泡.  有心理準備個蛋糕裏面可能會有大窿窿, 哈哈, 居然出來還算ok. 

這戚風很受歡迎, 因為不太甜.  同事吃過後問我拿了食譜, 說要做給她不愛甜的媽媽試試.

食譜

南瓜腸仔包, 朱古力粒提子包

因為囝囝們今個星期又要返學, 我又要開工努力整包點給他們帶返學食.

星期日下晝食完午飯後開工, 焗了南瓜腸仔包和朱古力提子包.

南瓜包用直接法, 朱古力提子包用中種, 所以先預備中種, 等中種發酵時就搓南瓜包.

雖然落雨, 但麵糰出奇起發得很快, 南瓜包搓好後, 中種就已發好, 可以加入其他材料來搓. 搓好後一陣南瓜包麵糰又發好了, 可以分割做型.

南瓜包做型後, 另一麵糰又發好, 可以分割做型.  跟住南瓜包入爐, 趁着等中種包包第二輪發酵時的空檔, 快手焗了一個南瓜戚風. 南瓜戚風焗好後, 朱古力提子包剛剛可以入爐, 成個下晝完全一條龍操作, 哈哈!

麵糰加了南瓜, 包包是金黃色的.  囝囝即時啃了一個, 讚好食.  左下角的因為不夠腸仔, 包了無花果乾, 上面再放南瓜籽.

對比上面啲南瓜包, 啲朱古力提子包樣差啲, 因為當時已經開始攰.  我唔想食朱古力粒, 所以有幾個是包了無花果乾的.

第二輪包包出爐後, 我還和姐姐一齊剝白果準備煲糖水.  一直撐到五點幾, 已經攰到成身痛, 頂唔順最後都要瞓低休息一粒鐘先再煮晚飯.  我唔返工時真係比返工還忙.

Disney on Ice 和古早味茶點

放完一個星期term break, 兩個囝囝又要早起身番學嘞.

佢哋放一個星期假, 我有少少內疚冇請假帶佢哋去玩.  但我年頭已經用咗十日年假返香港, 家陣先三月, 啲年假都係慳住使好啲.

今次學校假期唯一的節目就係星期六去室內体育館(Indoor Stadium）睇Disney on Ice, Daddy公司買飛有特價, 可以平少少.

話明on Ice, 即係啲演員全部要溜冰, 當中有些少花式溜冰, 都唔錯, 但就當然唔可能有Michelle Kwan咁既standard啦.  不過囝囝們睇見美人魚凌空跳起轉兩圈已經嘩嘩聲.  即刻問我有冇帶相機, 我話有, 但唔用得閃光燈, 所以真係影唔到佢想我影低既嘢.

呢張係唯一一張影得算清的, 因為已經完場, 所以我用閃光燈.

小小北極熊

剛看到這則新聞, 當年曾哄動一時德國柏林動物園的小小北極熊在不明原因下死了, 才四歲, 很可惜.

from AFP News.

這隻北極熊Knut當年出生時給牠的媽媽遺棄, 由動物園職員撫養大的, 成了德國柏林動物園的明星, 很受歡迎.

我對牠印象幾深, 因為2009年去德國探好友時常在電視上看到可愛的Knut.  記得好友的三歲兒子在旁問: "點解熊仔媽媽唔湊佢呀?  係咪去咗行街買嘢呀?" 好好笑, 細路仔覺得媽咪行開就係去行街買嘢!  小朋友只識講德文, 而我只識少少簡單德文單字, 但佢講最尾嗰句我都聽得明, 無他, 女人對行街買嘢呢兩個動詞係特別敏感的.

諗起朋友囝囝都有啲掛住, 他們一家三口六月尾要過嚟玩, 我依家已經好期待了.

蕃茄牛展湯

噚日好想飲牛腩湯，但又懶得特登去Sheng Siong買牛腩，就求其在街市的馬拉凍肉檔買急凍牛展來煲，聊勝於無吧。

加入紅蘿蔔，蕃茄和洋蔥一齊煲，清甜又有營養。不過始終急凍肉和新鮮的還是有差別的，下次買新鮮牛腩來煲會更鮮味。

胡椒豬肚湯

今日睇新聞見到日本災民很有秩序咁排隊等攞水, 領食物, 令我深深佩服日本人的修養和公民意識. 如果是在其他國家, 啲人早就打晒交, 搶的搶, 偷的偷了. 他們的公民教育是很值得我們學習, 請嗰啲帶個細路去阻街就話係公民教育既好好反醒吓.

好似係兩個星期前煲的胡椒豬肚湯, 排到今日先post.

請唔好問我點洗豬肚, 因為我好多年前洗過一次後, 嫌太煩之後都冇再煮過嘞.  後尾請咗姐姐後, 原來姐姐識洗, 咁呢個神聖任務就由佢負責. 

Daddy 最鐘意飲豬肚湯, 以前返親奶奶度食飯都有得飲.  不過呢幾年奶奶身體差就冇再煮.  咁我呢個賢妻就間唔中煲一次俾佢嘆吓囉. 

就咁煲豬肚驚唔夠味, 所以次次都加埋雞一齊煲, 今次就用咗半隻春雞.  我一向鐘意加白果胡椒粒來煲, 但臨時買唔到白果, 唯有淨胡椒煲.  姐姐自己決定加埋原粒蒜頭, 出嚟效果好似外面啲潮式肉骨茶.

Green tea souffle swiss roll 綠茶紅豆忌廉卷蛋

每日新聞都不斸報導日本災情，災民真係好慘，再加上輻射危機，雪上加霜，請大家一同為佢哋禱告，願主施恩憐憫。

星期六整的第二條卷蛋叫green tea souffle swiss roll, 出自同一本食譜書 （"Okashi, sweet treats made with love" by Keiko Ishida).

蛋糕底係souffle roll sponge做法和平時做法唔同，步驟多少少，要先用牛油炒麵粉，跟住才慢慢加入蛋黃和牛奶，有啲似整白汁咁。書裏說先煮麵粉可以減低麵粉筋性，蛋糕出來會特別鬆軟。牛油麵粉糊炒完係好杰的，要好花耐性和手力才可以和蛋黃，牛奶混合均勻， 我中途已經攪到手軟，所以就求其啦，你哋見到上面啲綠色一點點就係因為攪唔勻嘞。 不過，蛋糕仍然是很鬆軟的。

中間夾的是打發的淡忌廉和罐裝紅豆粒，今次卷得靚過前一條卷蛋，因為忌廉打得起。

其實今次焗出來個面很平，又唔痴，可以用正卷法，但書裏是反卷我就反卷囉。

來個近鏡沙龍。

綠茶和紅茶永遠是絕配，這卷蛋超美味!  

今次終於成功了，yeah!  

Dark brown sugar swiss roll

上星期六比較悠閒，決定又再挑戰卷蛋。

一次過整夠兩款，過足手癮。

第一款是dark brown sugar swiss roll, 中文我想應該叫黃糖瑞士卷吧。食譜來自上年我生日時收到的蛋糕書"Okashi, sweet treats made with love" by Keiko Ishida. 

蛋糕部份有些少特別，低粉外還加上少量粘米粉，糖就從平時白糖換上dark brown sugar, 我用了light muscovado (原味庶糖）。

蛋糕用分蛋法，焗好後要脫模再移至一個大膠袋裏放涼，書裏說就這樣放在膠袋裏可放至第二日才卷。

影相時一手揭開膠袋，一手揸相機，好像和蛋糕玩peek-a-boo哩。

餡是白朱古力忌廉，要將忌廉煮滾，混合白朱古力再雪過夜才打發。我心急想快點整好，放在雪櫃兩個鐘就取出打發，但打了很久還是像水一樣， 結果倒在蛋糕面上時就像把完全沒打過的忌廉一樣全瀉出來。 嗚嗚。。。沒耐性的後果。。。

餡全流到外面去了。 還好今次表面尚算平滑，可能火力猛了點，有一條小裂痕。

蛋糕有很香的黃糖味也很鬆軟，可惜餡太少了點。下次我一定要有耐性點把這卷蛋做好！

蜂蜜提子乾包, focaccia

上星期整的包包, 是我的早餐和囝囝的茶點.

蜂蜜提子包, 全40克, 除了那條辮子是80克.  很久沒整辮子包, 做來玩玩當練習.  這款包很香蜂蜜味, 加上提子, 甜甜的好味道.

終於試了Mommy Dearest的focaccia, 真的很好吃, 很香的橄欖油和香草味.  因為我用手搓, 邊撻麵糰, 乾香草四處飛, 整個廚房的地上都是乾香草.  我以為鹹包囝囝會沒興趣, 但他居然很喜歡, 下次我試試加些煙肉和新鮮香草之類, 我想他會更愛吃.

每日返工我會帶一個提子包和一個focaccia, 一鹹一甜食完很滿足. 

是日晚餐 13 Mar 2011

今日姐姐放假，我可以獨覇廚房。

是日晚餐三餸一湯，但都居然唔多夠食!

粟米魚柳，好香港風味，好似茶餐廳食的味道。食第一啖時都不禁讚自己，真係好好味!  呢碟大部份給兩個囝囝搶晒，不停地話好食。

是日午餐：德國腸意粉

今朝突然心血來潮想食德國香腸，即刻去Cold Storage買。咁啱有減價，一盒六條才S$5.8，開心死我啦。

屋企有薯仔，諗住整bangers and mash做午餐，但大仔唔鐘意食薯蓉，整薯條又怕熱氣，最後決定grilled sausage配意粉。

意粉用橄欖油，蒜片和車厘茄來炒，加埋parsley 同  oregano，清清哋但好好味，配埋偏鹹的腸仔就啱啱好。簡簡單單又快趣的一餐，但全家都食得好開心，囝囝哋仲食得好快添。

烚意粉時最後兩分鐘先加入甜豆，所以甜豆又脆又甜。姐姐順手烚埋啲薯仔，一人分幾舊嚟食，呢隻印尼薯仔就咁白烚，乜都唔駛放都有少少甜味，兩個囝囝都鐘意。

其實腸仔呢啲加工食物都唔太健康，而且真係好鹹吓，所以我好耐先會買一次來滿足口腹之慾。

泰蝦

呢兩日開始條脷生痱滋，又有啲喉嚨痛頭痛，攪到個人都有乜心機。

但係諗起囝囝哋下個星期放假一個星期我就幾開心，佢哋放假即係我唔駛咁勤力陪讀，可以鬆一鬆。 不過姐姐就慘啲，要成日對住佢哋兩隻馬騮。

今日想介紹呢味姐姐自創的菜式，唔知點叫好，就叫佢做泰蝦啦。

好好味架，佢已經煮過幾次，不過今次我就𥄫住佢睇佢點煮，咁就可以同你哋分享吓。做法超簡單，但有好香檸檬葉味，而且蠔油外再加啲啲糖，所以好有泰菜風味。

材料：蝦，檸檬葉，蒜蓉，薑蓉

做法：

1。鑊下油燒熱，將蝦煎至半熟，盛起備用。

2。燒熱些少油，大火爆香檸檬葉，蒜蓉和薑蓉，下少量水，再加蠔油和少少糖，轉中火，最後將蝦倒入，兜勻煮至蝦熟即成。

水份量大概兩三湯匙左右，最後汁會幾乎全收乾。

泰式蒸魚

每次去泰國餐廳多數都會叫泰式蒸魚, 一條都要閒閒地廿幾三十蚊.  雖然好食, 但每次都食得有些少唔甘心, 因為街市自己買一條金目鱸都唔駛十蚊, 佢放啲香茅之類蒸一蒸就賣多成兩三倍價錢, 好似好唔抵.

望落都應該唔難整吖, 就試吓自己整.  哈哈, 自家製的效果不俗, 雖然味道和外面有啲唔同, 但都好好味.

姐姐主理的, 所以個款好家常.  怕細路和Daddy唔食得辣, 所以冇放辣椒一齊蒸.  一滴油都冇落, 感覺好健康. 

黨參淮杞桂圓烏雞湯 (附做法)

前陣前為了爸爸的事沒好好休息, 身體感覺好攰, 諗起係時候煲啲滋補湯水, 就煲了黨參淮杞桂圓烏雞湯. 

這湯裏的藥材都帶甜味, 所以煲出來的湯非常甜, 完全不用加鹽.

烏雞有滋陰作用, 好啱女人飲.  我媽咪話煲烏雞要連皮煲, 因為有豐富膠質可以養顏喎. 

材料: 烏雞, 黨參, 桂圓, 淮山, 杞子, 紅棗, 蜜棗, 薑片

做法:

1. 烏雞原隻(連皮)先汆水, 葯材洗淨.

2.  先煲滾水, 下藥材(杞子除外)和薑片, 待水再滾時才下烏雞, 大火煲十分鐘, 轉細火煲兩個鐘以上.

3. 收火前十分鐘才加入杞子.



藥材功效 (取自余仁生)
黨參

功能:	補中益氣，健脾益肺
主治:	用於脾肺虛弱，氣短心悸，食少便溏，虛喘咳嗽，內熱消渴

杞子

功能:	滋補肝腎，益精明目
主治:	用於虛勞精虧，腰膝酸痛，眩暈耳嗚，內熱消渴，血虛萎黃，目昏不明

淮山

功能:	補脾養胃，生津益肺，補腎澀精
主治:	用於脾虛食少，久瀉不止，肺虛喘咳，腎虛遺精，帶下，尿頻，虛熱消渴

桂圓

功能:	補益心脾，養血安神
主治:	用於氣血不足，心悸怔忡，健忘失眠，血虛萎黃

烏雞

功效:

溫中補脾，益氣養血，補腎益精，清虛熱。

天使蛋糕

為了整細佬的生日蛋糕和香蕉榛子朱古力蛋糕，買了一盒1L的淡忌廉，整完那兩個蛋糕仲剩好多，就試試整風行一時的美心天使蛋糕。

一個17cm戚風就可以用掉400克淡忌廉，真是個最好消滅淡忌廉的方法。食譜

呢個係實驗性質，所以有點求其。抆忌廉時已經幾乎晚上十點，所以懶得慢慢抆平 (抆得差，賴地硬 )。

第二日試做焦糖脆脆，方法簡單，但要撐握煮焦糖時間是有點難度。第一次整煮至金黃色，加梳打粉攪後就變成太燶了, 帶苦味, 全益了大口仔。第二次煮唔敢煮太耐，很淺顏色就加梳打粉，可能煮唔夠，所以倒出來時扁扁的。脆脆出來不夠脆，但尚可接受，我亦唔想再浪費糖去煮第三次。

像風一樣輕的戚風，配上忌廉和焦糖脆脆，實在太美味，怪不得美心出這蛋糕時咁受歡迎。 

囝囝們出奇的鐘意食，每晚食完飯都要食一件。

最後來個總結, 二月廿五和廿六日我焗了:

1. Charlotte Aux Fraises and ladyfingers (手指餅)

2. Banana hazelnut chocolate cake

3. Macaroons 馬卡龍

4. 榛子曲奇

二月廿八日：

5. 仿美心天使蛋糕

非常勤力哩. 

順便一提, 今次我在Phoon Huat買了這盒淡忌廉, 不錯, 顏色比平時在超市買到的白, 亦比其他牌子的易打起.  1L 賣S$7.x, 好抵用, 不過買一盒就要逼自己整好多蛋糕甜品.  今次用來整了三個蛋糕, 有剩的還做了五小杯士多啤梨布甸.

榛子曲奇

之前靚靚指揮在FB見到我整的腰果酥，說想試試，我爽快地答應她下次來新加坡時我送一些給她。

前個星期六她從沙巴飛來教指揮，就算很忙也給她弄了一點曲奇。腰果酥連續焗了兩次，開始悶了，就換成榛子曲奇，跟Vanlily的食譜。

這曲奇非常容易整，只是成本高一點。在新加坡買榛子和榛子粉都很貴，好彩上次返港買了一大包榛子粉才捨得做。

這款曲奇很香，很鬆，也不甜，最適合怕甜的人。

因為曲奇很鬆，幾乎一碰就碎，想了很久到底用甚麼來包裝呢？ 找遍全屋終於找到這個鐵罐。朋友送的朱古力，擱在雪櫃一整年，等到過期了，丟掉朱古力，留下美美的罐。

參考藍罐曲奇，用muffin case來裝曲奇才入盒就可以防止曲奇之間碰撞，減低撞碎的機會。

美女指揮收到了很開心，視為至寶，她說因為很珍貴，每天限自己只能吃兩塊。可能是客套話，但聽了還是開心的。 

因找不到Vanlily的新blog, 先把食譜post在這裏.

食譜(約20件)

牛油 125g

糖 35g
榛子粉 85g

高筋粉 150g

梳打粉 1g

原粒榛子

1) 牛油加糖用中速打發

2) 加入榛子粉, 篩入高筋粉及梳打粉
3) 切拌攪勻後, 捲成圓桶型放麵糰入雪櫃至實
4) 取出切好每件厚至均衡的曲奇, 放上原粒榛子, 180c焗12mins
chef bo的食譜糖粉偏甜, 這食譜糖的份量已減一半

原食譜的榛子粉是用原粒榛子再打磨的, 應該會更香口

我沒有把麵糰捲成圓桶型, 只是碌平再用圓模印出, 效果相約

原粒榛子放上曲奇上要按得實一點, 壓到曲奇底也可以, 這樣榛子才不易甩掉~

Almost there

始終都係要post埋啲甜嘢, 上個星期五, 六超勤力焗嘢 (希望Daddy收到今個月電費單唔好咋我型), 焗咗好幾樣嘢, 快手post埋佢哋啦, 呢篇之後仲有多一篇啫, 你哋就俾啲面睇埋佢啦.

為了裝飾那香蕉榛子朱古力蛋糕, 也為了消滅整蛋糕所剩的蛋白, 星期六就快快手焗了馬卡龍.

今次應該是第四或五次焗馬卡龍, 熟手了, 很快就唧好一盆.  本來想整baby pink, 但color paste下多了, 變了玫瑰紅.

次次都疊埋扮有餡, 今次真的有餡, 隨手夾上用剩的朱古力淋面. 

今次可以講係almost there, 馬卡龍面都算平滑, 但攪拌太久, 有點兒太瀉, 一直在消泡, 所以表面有細窿窿, 而且裙邊再出少少就更好.

有兩粒唧得太近, 黏在一起變成八字.

焗了幾次馬卡龍後, 可以說有點心得, 就算換了焗爐仍能焗出裙邊, 不過攪拌方面仍需多練習, 要攪幾耐真的要講經驗.

所謂心得就是: 要焗出裙邊最大要訣就是要等馬卡龍表面變乾才入爐焗.  原埋其實很簡單, 上層乾了結了皮, 焗時麵糊受熱會膨漲, 但因上面結了皮, 只能從下面溢出, 就形成了裙邊. 當然焗時爐温不能太大, 上面才不會裂開. 

很多食譜說放在室温靜置十分鐘或更長時間, 甚至唧好即刻入爐, 或許在外國濕度低的地方行得通, 但在新加坡高濕度之地就咁放外面大概半日都未必乾, 我亦沒耐性去等. 

所以我的方法是唧好後放在有風扇的焗爐裏, 開着40度左右一陣(只要稍暖便可)關掉, 待至馬卡龍表面乾了才取出. 然後才預熱焗爐至所需温度, 入焗爐便成. 

我自己都係實驗階段, 以上純粹個人經驗之談, 未必完全正確, 有講錯請儘管指正.