是日晚餐 13 Mar 2011

今日姐姐放假，我可以獨覇廚房。

是日晚餐三餸一湯，但都居然唔多夠食!

粟米魚柳，好香港風味，好似茶餐廳食的味道。食第一啖時都不禁讚自己，真係好好味!  呢碟大部份給兩個囝囝搶晒，不停地話好食。

熟悉我的人都知我好少整煎炸嘢，因為怕油煙，又怕要處置炸完的油。 不過今日我為自己驕傲，因為魚柳炸得好脆好乾身，一啲都唔油。而且我用由宜家買來的迷你鍋，只需要用少少油就夠炸，只係要有耐性因為每次只可以炸四至五塊魚。仲有我怕炸時油會濺出來，所以先用廚房紙抹到好乾才醃，炸時一滴油都冇彈出來啊!  

第二味係為Daddy而設的，雪菜燴腐竹粉絲，很簡單清淡的一道菜，只需下少許鹽，糖，麻油即成。雖然簡單，但雪菜的鹹香令整道菜生色不少。Daddy一見到他的至愛腐竹即時兩眼發光，我諗再煮大碟啲都食得晒。可惜上次返香港買了黃色的雪菜，如果用青色的這道菜的賣相會更佳。

第三道菜只係簡單的油菜，冇影相。

蕃茄蛋花湯，湯底用江魚仔來熬，家裏一條蒽都冇，所以冇蒽花。

雖然三餸一湯，但我幾乎只係菜心和蕃茄蛋花湯送飯，因為其餘兩味都給Daddy和囝囝搶光了。不過我一啲都唔介意，咁我唔怕食肥，佢哋又難得咁捧場。

今日朝早去完教會就去探奶奶，和寄住奶奶家的肥猫。肥猫每見一次就覺得佢又肥啲，因為响我奶奶度好食好住，個個就晒佢，奶奶朋友仲送咗個新玩具俾佢玩。呢種scratching pole 以前佢細個時我都有買俾佢玩，以前一買返嚟就俾佢抓到爛晒，家陣懶到出汁，連出爪去抓都懶。

近境睇下佢幾好肉地。