好彩被Mommy Dearest邀請去佢度食Christmas dinner, 終於有啲聖誕氣氛。不過，下篇先post今晚食乜。
囝囝們星期三下晝開始病，我就星期四請childcare sick leave留响屋企湊佢哋，順便可以預備聖誕蛋糕和一些曲奇做禮物。
諗住Christmas dinner之後一定好漏，所以揀了Vanlily的伯爵奶茶檸檬慕絲蛋糕。
星期四一邊整蛋糕，細佬就係咁要去廁所，所以整吓停吓，又洗成百次手之後，呢個蛋糕真係一鑊泡，杏仁蛋糕底都焗咗兩次，我以為唔出得門口添。後尾甩模後見個樣都OK，只係個奶茶啫哩層跣咗去一邊，旁邊唔靚。今日下晝就打啲意大利馬令嚟抆上面，再求其放啲裝飾上去。膽粗粗咁就將呢個蛋糕拎去送俾MD，希望佢唔好見笑啦。我都係第一次整呢款蛋糕，唔知咩味，頭先我又要早走番嚟睇啲囝囝，冇機會食到， 希望唔會太難食啦，最擔心中間啲脆脆會淋晒。
有剩馬令，用嚟玩吓flaming alaska。我無放火， 只係將啲馬令抆喺舊雪糕上面，再揾支火熗嚟燒吓佢啫， 都幾好玩。
怕曲奇會漏風，先放入保鮮袋才入盒。
原味，綠茶和朱古力雪球，我怕甜所以只滾上好薄的一層糖霜。
噚晚漏夜去Daiso買的禮盒和絲帶，希望收到的朋友會喜歡，食完啲餅餅個包裝可以recycle哩，唔怕嘥。
仲未到十二點，仲嚟得切再講多次
Merry Christmas!
F
ReplyDelete