餃子夜

2010.12.04

上星期四和host family program的兩個學生食完飯後, 約好星期六來我家包餃子, 因另一個學生已經去了中東field trip所以嚟唔到, 只有一個學生來. 

星期五下晝四點, Daddy又重施故技, sms: "聽日學生嚟食飯hor, 橫掂煮開, 我叫埋個美國同事嚟". 

本來平常一頓家常飯, 整多多餃子, 輕輕鬆鬆邊煮邊食.  但要請多個鬼佬嚟, 冇埋由就咁整碟餃子喺人面前就算架, 又要我臨急臨忙去張羅. 

星期五放工拿拿淋一個人去兩間超級市場入貨, 食完晚飯就即刻開工整醉雞.  我知, 又係醉雞, 我都煮到悶, 但咁last minute腦閉塞喇, 豉單啦.

星期六朝早陪完細佬去playgroup後就响廚房企足一日, 好彩學生下晝四點幾就嚟帮我手整餃子.

第一次搓咁多皮, 用了五杯粉, 搓麵糰都搓到手軟.  麵糰醒好後學生就啱啱到, 就由佢嚟負責碌一張張皮, 我就包餡. 

預備了西洋菜豬肉餡和韮菜豬肉餡.

總共包了六十幾隻餃子, 剩下的麵糰做了幾個葱油餅.

請客實在唔應該整餃子的, 如果整水餃一大堆放入水裏煮都還可, 但佢哋個個都鐘意香口的鍋貼, 搞到我晚飯時候一頭煙, 要慢慢分批去煎.

個鬼佬到時我仲煎緊第一批鍋貼, 先上頭盆 - 酸辣湯. 呢碗係最後剩下要入雪柜的, 奉客時係好樣好多的, 但當時忙到氹氹轉所以沒影相.  呢個湯好味架, 佢哋一人飲兩碗呀.

煎好第一碟鍋貼後就上主菜 - 五香牛肉麵.  牛腩星期五响sheng siong買的, 只有兩包好細包的beef brisket point end, 所以要買多包普通beef brisket才夠.  個人比較鐘意beef brisket point end, AA話即係崩沙腩喎, 多啲肥膏但炆完滑啲.  就咁beef brisket就比較嚡.  雖然係咁, 居然beef brisket point end比beef brisket平一倍, point end 賣10蚊左右一kg, beef brisket就要成20蚊一kg.  今次啲蘿蔔超靚, 一啲渣都冇, 我一邊切仲一邊生食, 又脆又甜. 

但你哋唔好以為呢碟麵好味呀, 啲蘿蔔牛腩就幾好, 敗筆在那些麵條.  我買了新鮮麵條, 以為會好味啲, 但當時我忙住煮湯和煎鍋貼, 姐姐煮麵煮太耐, 搞到啲麵太淋.

手忙腳亂之際, 差點忘了雪柜裏還有醉雞.

嗰晚又要煮又要應酬仲要記住影相嚟放blog, 攰死我喇!

食完飯, 學生和囝囝玩大富翁, 幾開心.

細佬就自己玩玩具.

飯後甜品 - mango hazelnut roulade, 上個月整過嘞, 但冇時間亦懶得諗, 於是又翻炒.

不過今次焗得透啲, 個皮係脆的, 用了thickened cream (non UHT) 杰啲, 所以卷得靚好多.  上桌時撒上少少糖霜做裝飾.

嗰晚個學生留响我屋企過夜, 佢話嚟咗呢邊咁耐第一次睇電視.

希望佢喺我屋企能感受到家的温暖, 囝囝們臨瞓前我們還和她一起禱告哩.

嗰晚我真係攰到唔識郁仲週身痛添, 多得Daddy咁好帶挈.