板長@Plaza Singapura

之前見AA話板長壽司好食, 成日心思思想去試, 終於上星期二俾我等到機會嘞.

放工後去做facial, Daddy話出嚟陪我食飯, 滿心歡喜可以去試响Plaza Singapura新開的板長.

做完facial, sms 問Daddy到未, 佢居然話啱啱離開公司.  有冇攪錯呀, 咁我即係要等幾孚成粒鐘!

算喇!  我自己去坐低食先, 去到前面得兩個人排隊, 好快就入到去, 揀咗counter位, 邊等可以睇啲師傅整嘢食.

先叫幾款試試.  嗰日冇帶相機, 用手機影, 矇矇哋, 實物靚好多.

最上面係燒豬肉壽司, 豬肉好腍好好味.  下面就係蝦同秋刀魚, 蝦夠新鮮, 秋刀魚刺身第一次試, 有啲油甘味, 幾好食.

迷你吞拿魚腩飯, 真的十分迷你, 只有一小球飯, 但超級美味!  啲魚腩好滑好鮮, 夾埋上面啲芝麻, 真係好正!  依家諗起都想再食.

淨食壽司等唔到成個鐘, 所以叫多個黑椒三文魚頭腩, 可以慢慢"鱗".  其實我唔太鐘意食三文魚, 但呢個都幾好, 不過我最鐘意都係上面啲洋葱, 啲黑椒汁味好近似港式快餐的黑椒汁味.

望穿秋水, Daddy終於到, 繼續叫嘢食.

食咗一半的帶子刺身.

油甘魚, 新鮮味美.

Daddy的綠茶冷麵, 冇問佢好唔好食, 佢冇話唔好即係ok既.

仲有幾他壽司但冇影相. 

見到個師傅卷緊啲好似越南春卷既壽司, 即刻開個菜牌揾嚟叫.

叫了鰻魚鮮春卷, 裏面有鰻魚, 玉子, 蟹柳同好多好靚既生菜青瓜, 配埋個微辣的mayonnaise汁, 一流!  未影相我已經夾咗一舊嚟食.

最後試試芝士蛋糕, 之前見Hanrik post好似好大兜, 乜原來咁鬼細兜, 但味道搭夠, 芝士味濃又好滑.

食完呢餐好滿足, 盛惠50大洋, 抵食!  Daddy話返香港都要去食板長喎.

順便一提, 嗰日見到一個靚仔師傅呀, 不過真係得一個咋.