香港行(1）

十二月十日坐SQ2返香港，到埗已經夜晚。

樟宜機場好多聖誕裝飾。

十二月十一日

返香港例牌要飲茶，去屋企對面的一品。

哥哥同公公婆婆影相，公公婆婆見到啲孫仔幾開心。

食咗一半的沙薑雞腳，好味。

囝囝們吮雞腳吮得好滋味哩。

鹹菜胡椒豬肚煲，呢個煲我次次都要叫的。

脆卜卜燒腩仔，38蚊碟，超抵食。

滷水鵝掌翼

海鮮魚湯米線，好鮮味，細佬一碗接一碗咁食。

為食豬飽到唔識郁！

仲有蝦餃，燒賣，叉燒包，庶蝦，腸粉，牛肉球等等, 我覺得呢餐係我平時一日三餐加埋的份量，飽到上心口。

夜晚我諗住煮餐好嘅俾屋企人食，下晝專程行去遠啲的旺角街市買餸，買了一條白鱔，一條多寶魚，花甲，牛展, 雞脾，雞脾菇，生菜之類。

咁大個女第一次煮白鱔，由膠袋倒條白鱔出嚟時，明明個頭都已經斬開咗，但佢仲郁緊，嚇屎我嘞。好彩咁啱細妹返到嚟，佢戴對手套幇我用鹽同生粉去掉鱔身上面啲潺，跟住我爸爸就切開一碌碌同調味， 所以結果條鱔都唔係我煮嘅。

條多寶魚好正, 新鮮游水魚係唔同啲, 不過沒影相, 因為俾人激親!

嗰日下晝有個親戚嚟探我爸爸, 坐足成個下晝, 搞到我爸爸成日冇得休息, 仲留低食埋飯。 我煮嘢時又喺度指指點點, 我要煮豉油雞脾時, 佢就搶咗去煮。我都話整豉油雞脾咯, 咁將雞脾落鑊兩面煎一煎, 落水, 豉油, 糖, 加蓋燜咪得囉。佢話唔係咁煮, 佢將啲雞脾煎到出油, 跟住落生抽, 又唔落糖, 就冚蓋焗, 之後話唔夠味再落一大匙雞粉, 我啲雞脾之前用少少鹽醃過架, 想鹹屎人咩。跟住佢話熟啦, 剷起上碟. 斬開時當然係未熟啦, 要入微波爐叮熟。結果我一舊都冇食到, 我個印印姐姐好勇敢咁挾一舊, 咬咗一啖就唔食, 話超難食。

俾佢咁搞法, 我己經乜心情都冇, 求求其其煮埋其他幾樣餸就算, 所以一張相都冇影到。