突然收到Daddy 的sms : 朋友D話之後一個月都唔得閒, 聽晚嚟食飯得唔得?
聽晚?! 但呢個朋友被公司派去美國兩年, 成家人一齊去, 點都要請人食餐飯架, 聽晚就聽晚啦.
臨時決定就唔可以要求太高, 隨便幾樣家常小菜就算.
鮑片扒西蘭花莧菜. 哈, 冇咁豪食鮑魚, 只係king oyster mushroom啫, 落油炒幾下, 加水加蠔油埋芡, 食落都幾好架, 個樣仲好見得人添.
花彫雞煲. 細細隻甘榜雞斬件, 加冬菇和紅棗用花彫酒去炆, 完全冇加水份, 好香好味.
粉絲蝦煲. 今次煮耐咗少少, 粉絲唔夠爽, 但索晒啲湯汁和蝦味, 人客最讚呢味.
例牌叉燒, 快趣易整.
其實仲有蓮藕鱆魚排骨湯, 一大煲湯我都未有機會影相就清晒, 剩番啲湯渣就費事影.
食完飯先醒起要影相, 杯盆狼藉....
朋友有一仔一女, 大仔同哥哥玩, 囡囡就同細佬玩, 幾開心.
細佬食得慢, 朋友囡囡就負責餵佢食, 一羮羮咁好有耐性地餵晒成碗, 都話女係乖啲既, 可惜天父只給我兩個囝囝.
七手八腳玩jenga
見到啲細路一齊玩得咁開心, 我哋都好開心. 其實我地兩家以前都時不時見面等啲細路一齊玩, 不過自從朋友囝囝上小學後比較忙就好耐冇一齊玩過. 囝囝知道佢哋要嚟食飯, 興奮咗成日哩.
我請客甜品不能少, 下篇post.
你又來大茶飯呀...好勁呀, 想請教你,粉絲蝦煲,啲蝦須要預先煎一煎痳?
ReplyDelete因為星期日AN啲family來食大餐..16人呀..我好驚搞唔掂..
[版主回覆12/02/2010 12:24:00]咁少人唔算大茶飯啦. 粉絲蝦煲我以前post過 做法 , 不過上次我整有啲泰式風味, 今次我就整中式, 冇落魚露檸檬葉之類.
唔駛驚, 煮大茶飯最緊要樣樣整大份, 咁就整幾樣就夠, 最好煮多幾樣炆既和冷盆, 咁可以一早煮定, 唔駛到開飯前先搞到手忙腳亂, 開飯前煮菜就搞掂.
花彫雞煲,諗起就流口水啦~~ 你真係好勁呀,話煮就煮...我煮野要培養情緒架,太突然我接受唔黎呀!!!
ReplyDelete[版主回覆12/02/2010 16:16:00]煮慣咗就得架啦, 迫出嚟既.
呢餐幾樣都係家常小菜啫, 一個鐘度就煮好架啦.
我好期待啲甜品呀
ReplyDelete** 我仲要打驗證碼呀 , 麻煩 add 我做 blog 友啦
[版主回覆12/02/2010 16:17:00]聽日會post架啦.
add 咗你啦.
流口水ing!
ReplyDelete[版主回覆12/02/2010 16:20:00]我呢啲普通小菜咋, 你煮嗰啲我就真係流口水嘞, 我仲未食到你啲bbq chicken wings.
突然間話要請客, 都咪話唔驚呀, 幸好你過到關~
ReplyDelete[版主回覆12/06/2010 11:45:00]呢次都ok因為同呢家人好熟, 幾道家常小菜就得.
家常小菜都咁正!
ReplyDelete[版主回覆12/06/2010 11:46:00]住家飯係最多味架.
真係高手!三兩下手勢就煮好一餐!
ReplyDelete[版主回覆12/06/2010 11:47:00]邊係呢, 普通菜式啫, 只係比平時煮大碟啲之嘛.
bbq chicken wings.... no problem, I will remember
ReplyDelete[版主回覆12/06/2010 11:47:00](Empty)
leaving for airport soon... thanks for everything
ReplyDelete[版主回覆12/06/2010 11:48:00](Empty)
我越黎越覺得星球人娶到我地呢香港女，係佢地既最英明抉擇，你太贊啦！I am proud of you!
ReplyDelete[版主回覆12/06/2010 11:48:00]哈哈, 你有冇咁同Matt講呀? 港女都唔係啲人講得咁差既.
嘩! 真利害！ 你出得廳堂，入得廚房，又係女強人，仲要照顧兩個小朋友。佩服！
ReplyDelete[版主回覆12/08/2010 10:05:00]全靠有個能幹的姐姐帮手啫. 我唔係女強人, 做工只係為兩餐啫, 我心目中正職係煮飯湊仔, 副業先係打工. 千祈唔好俾我老闆睇到我寫啲嘢.