香港行(3)

十二月十三日

上次帶囝囝返香港去了廸士尼, 囝囝話唔好玩, 去海洋公園好啲, 咁趁星期一人少就去啦.

我由細到大都好鐘意去海洋公園架, 有得坐纜車, 又有得睇魚, 仲有機動遊戲玩添.  個人覺得都係海洋公園好玩啲, 廸士尼樣樣嘢都排長龍, 成日都係得個等字, 海洋公園唔想排隊都可以去睇吓熊猫, 海獅, 魚之類.

坐地鐡去金鐘轉城巴, 到金鐘時己經午餐時間, 去海富中心的Spaghetti House食嘢先. 

呢間個經理我己經認得, 次次去都係佢, 好好招呼, 一坐低就拎啲玩具俾小朋友玩, 食完仲扭汽球俾兩個囝囝.

三個大人兩個細路叫了三個套餐.

燒雞配墨魚汁飯, 啲飯好好味.

Baby back ribs, 都好食, 唔肥又唔會太腍, 啱啱好.

龍脷魚柳配茄汁意粉, 魚柳ok, 個茄汁就太甜, 但最正係嗰三粒車厘茄, 有焗過的, 一放入口啲蕃茄汁就泌出嚟, 好甜.

食飽飽就上城巴去海洋公園, 車程其實好快, 坐一陣就到.

今次好似玩最多係我, 一去到就排隊玩過山車, 呢款係新開既, 都唔刺激, 冇360度轉, 但都好過冇啦, 好耐冇玩啦.

個餐廳經理就係扭咗呢兩隻汽球狗仔俾佢哋嘞.

入海洋館睇魚, 好開心.

最鐘意見到Nemo (唔知真名係乜, 但我叫佢哋做Nemo).  我好聽話架, 個魚缸上面大大個牌寫住唔好用閃光燈, 所以我冇開閃光燈影又冇腳架, 啲相少不免有少少矇.

又到我玩嘞, 呢個Flying Swing一啲都唔刺激的, 但响高空中打韆鞦, 涼風迎面而來的感覺真係幾舒服.  囝囝企响外面望住, 未開始時好緊張咁叫我捉緊啲扶手.  佢自從上次去廸士尼玩完Space Mountain之後, 所有機動遊戲都唔敢玩.

最開心坐纜車, 可以望到咁大個海, 囝囝們係咁週圍望哩.  我就一路同細佬講呢啲叫山, 呢啲係海, 因為响新加坡冇高山架.

囝囝們離遠見到呢個Merry-go-round 就衝去要玩, 呢個應該係新開的, 上年去時都唔見, 啲魚魚都好高吓, 大人細路都要綁安全帶.

兩個儍儍哋, 玩到坐喺地上面影相.

到兒童樂園時已經開始天黑.

細佬好勁呀, 學人攀石.

最尾都係唔夠力, 要Daddy推一推, 哥哥出手接.

入夜後的海洋公園又是另一番味道.