墨西哥包, 蜂蜜西梅包

上星期一烘的包包.

給囝囝們當日做下午茶的墨西哥包.

一出爐囝囝已急不及待要食, 墨西哥包加果汁, 囝囝還要求影低包包的內心世界.

墨西哥包剛出爐食, 真的非常好味, 外脆內軟.

第二日輪到daddy留在家照顧兩個囝囝, 大仔叫daddy由冰箱拎個菠蘿包佢做早餐.  囝囝唔知呢隻包叫墨西哥包, 反正上面有層脆脆的佢都叫菠蘿包. 

菠蘿包和墨西哥包都有同一個問題, 一過夜面層就唔脆, 要入爐烘熱先會脆番.

Daddy梗係唔會開爐焗個包, 只用微波爐叮熱就算.  雖然囝囝都食晒個包, 但事後向我投訴話唔好食. 

另外再整多款帶返工返學食的蜂蜜西梅包.

原食譜是蜂蜜紅莓葡萄乾包, 家裏沒紅莓, 沒葡萄乾, 只有幾粒西莓. 

學人整花花做型, 但和Mommy Dearest啲花花包差得遠. 

本來以為囝囝對呢款包會沒興趣, 但佢見到花花樣就即刻要食.

第二日帶返學校, 仲好大方咁將個包包分俾同學仔食, 每個同學仔一瓣花瓣, 即係佢自己只係食咗一瓣花瓣. 返到屋企好似餓鬼咁, 俾佢激死.  分享是美德, 但分晒俾人自已無得食就唔好喇.

佢話每日要帶四個包包返學先夠, 如果唔係佢會肚餓喎, 佢真係以為我開包舖呀?.