牛腩兩食

上星期好忙好忙, 工作忙, 放工後又有嘢做, 唔得閒update個blog, 今個禮拜希望可以勤力啲啦.

噚日姐姐放假, 我又可以霸番個廚房一日.

朝早去教會, 食埋午餐先番屋企, 咁可以煮少餐嘛. 

上星期日買定牛腩存入冰箱, 噚晚就整牛腩兩食 - 柱候牛腩, 蕃茄洋葱紅蘿蔔牛腩湯.

加埋白蘿蔔和百頁結嚟炆, 蘿蔔炆到入晒味, 好好味.  大仔從來唔食蘿蔔都食咗幾舊, 細佬都食得好快, daddy當然話好食啦, 佢鐘意食牛嘛.

咁少人食而且姐姐唔食牛肉, 所以放少啲水嚟煲. 煲湯好甜, 湯裏面啲牛腩仲好滑添, 不過湯太少有些少唔夠喉, 早知煲大煲啲.

成斤幾牛腩, 兩個大人梗係食唔晒, 入食物盒帶返公司做午餐.

今朝出門口時, 大仔見我放個飯盒入袋時, 就好緊張咁話佢又要, 佢驚我將全部牛腩帶走晒. 

跟住佢就同姐姐講今日唔帶麵包返學校做下午茶, 要帶飯同牛腩.  嗄?  牛腩飯做下午茶?  好似誇張咗啲噃.  不過佢要帶就由佢囉, 食飽啲都好, 因為佢平日喺學校食晏都食好少.  佢第一次帶飯返學, 希望佢真係會食啦.