風箏

上星期六去Marina Barrage 放風箏, 係教會既 International Student Outreach Program 既其中一個節目.

今年我哋參加咗 host family program, 要接待外國嚟既大學生, 讓佢哋嚟到陌生地方讀書都可以有本地家庭作照應.  自己都做過留學生, 好明白離鄉別井, 無依無靠既感受, 所以覺得呢個program 好有意義.  除咗俾佢哋少少家既感覺外, 亦希望讓佢哋有機會接觸福音.  由於係non-residential program, 啲學生係唔會嚟同我哋住, 只係定期約佢哋出嚟和maintain contact, 關心吓佢哋咁啫.

呢次放風箏, 有教會既朋友, 仲有我哋唔同家庭接待既學生, 大家都玩得好開心.  呢個係我今年接待既女仔, 由北京來的, 每次見到我兩個囝囝佢就會好開心.

嗰日設有自製風箏比賽, 佢呢隻用報紙整既攞第一添.

細佬見到成天風箏, 睇到入晒神.  大佬就學人放, 當然係放唔起啦.

細佬又學人放埋一份, 只係拎住梱線都好開心.

大仔拎咗我部相機去影相, 除咗自拍外, 就係影女仔嘞,    影佢响教會最friend個妹妹仔.

連小妹妹放隻風箏都影埋, 服咗佢啦.

晚餐食外賣pizza, 啩住食, 冇影相.  食完天開始黑, 大家執嘢走. 

大仔堅持要送小妹妹一家返屋企 (其實即係我哋送啦), 仲話要再約妹妹一齊去放風箏.

我都十幾年冇放過風箏, 真係好好玩, 一定要再去過.  不過下次要買啲好啲既風箏, 呢種膠既點都飛唔高.