炒河粉

今日決定親自下廚煮午餐, 已經好耐冇入廚整中餐.

週未午餐都係簡簡單單炒粉麵, 碟頭飯之類. 

大仔最鐘意食炒河, 因為有豉油炒嘛.

姐姐唔食牛, 所以唔可以整我至愛既炒牛河, 就換成炒豬河啦.

自家煮既當然少油, 個樣冇外面賣既咁靚, 但健康好多, 至少唔會有飲油既感覺.  今次舊豬肉好淺色, 炒完都見唔到.

睇吓大仔食得幾開心, 佢食完呢碟仲再添多碟, 仲要係食得好快, 好少有架.

自細我就好鐘意食炒牛河, 細個去飲茶次次都要叫牛河, 俾我舅母話我點埋晒d cheap 野, 唔點好似福建炒飯之類既貴價菜.

到中學時家政堂教炒, 都不知幾開心, 記得老師教要用熟油撈豉油淋上去河粉到, 顏色就會均勻.  不過依家已經冇咁做, 太油嘞, 只係直接淋生抽老抽就算.

仲有一樣係嫲嫲教落, 一定要個鑊燒到出煙, 先加少少油, 等油熱再落河粉, 咁就點都唔痴鑊嘞.

坐一陣要入廚房整多次strawberry penna cotta, 因為大少落order.

佢一早起身開雪柜揾, 但噚晚daddy將最後一杯食埋, 佢以為姐姐食左, 居然走去 '質問' 姐姐, 話佢做咩食左佢既野, 姐姐都冇佢咁好氣.  跟住佢就呱呱嘈話要再食, 咁唯有再整囉, 難得大家咁捧場, 係咪?