旋風訪港(3）15-16 May 2011

返香港第三日，即上星期六，全日留來買嘢。

一早和媽咪同細妹去花園街行，主要買玩具和衫給囝囝們。

午餐就去附近的太興燒味食， 叫了一個八寶飯，好多料好誇張。

另一碟乳豬拼燒鵝飯， 三個人分兩碟飯啱啱好。聽講太興燒味幾出名， 但呢間分迨就麻麻，我懷疑燒味在另一處燒好才送過來，細妹話旺角的那間好食好多喎。不過一餐食勻所有燒味，都已經好滿足， 呢邊食唔到架。

充完電，又再努力，行去朗豪坊行H&M。唔明點解旺角的H&M幾時去都咁人山人海，可能多同胞們去，好似前後左右都聽到人講普通話。

一入去，媽咪好醒目地話先去試身室排隊，叫我哋快啲揀好去試。媽咪好熟嗰度既架步哩，因為佢最近鐘意去嗰度睇衫。最後我同細妹都有收穫，好滿足嘞。

之後媽咪同細妹先返屋企， 我繼續去二記入貨，又多一大袋入行李。

返到屋企都未坐低，細妹又叫我一齊去買餸，佢嗰晚要煮俾佢老爺奶奶食，我就同媽咪和細佬食。次次响香港去街市我都會好迷惘，因為買唔慣，啲魚都唔知乜打乜，又多檔口，真係唔識揀。最尾買到大大隻花甲和幾大條的細鱗。

我細佬煮的清酒煮花甲，花甲夠鮮甜。

非常新鮮的細鱗，最開心見到舖滿莞茜蔥。

怕唔夠食，煮多味雪菜腐竹粉絲。今次失手，落太多雪菜，太鹹了。不過香港的腐竹真的比呢邊的香好多，亦厚身好多。

仲有媽咪煲的粉葛鰂魚湯，放了紅蘿蔔，赤小豆，扁豆和蜜棗一齊煲足四個鐘，又濃又甜。煲魚湯是我要求的， 因為呢邊冇鰂魚賣。

順便寫埋上星期五（13 May) 和媽咪撐枱腳的晚餐，兩個人食了大大條的多寶魚。

我炒的蝦醬通菜，又一失手之作，唔係用開的蝦醬，落太多，好鹹呀。 虧我成日响度post 住家菜，返到香港煮俾媽咪食就次次失手，真失禮。

上星期六食完JW豐富buffet, 夜晚約了細妹一家去打冷，去了在大角咀不知名的一間潮州菜館。

滿心期待的蠔仔粥，但我煮的比它好食得多。蠔仔又韌又無味，粥底亦唔鮮。

金銀蛋莧菜

蠔餅，和呢邊的蠔煎是兩碼子的事。味道嘛，食唔出咩味，只係脆口囉，可能因為我一向唔太鐘意炸嘢。

炸大腸，又乾又硬。很懷念小時候我家附近一間叫醉瓊樓的酒家，那酥炸大腸依家都仲回味， 可惜多年前已經執咗。

一口氣寫晒在香港食過的，但時間太倉促了，連食街邊嘢都冇時間食， 茶餐廳亦無機會去。

所以我唔甘心，到機場時都要去翠華食個菠蘿油和咖啡才上機。 短短三日半的行程，卡路里至少是平常的三倍，今次唔肥都難。