至於主要目的, 梗係食嘢買嘢, 仲有陪媽咪啦. 我今次真係全天候廿四小時陪住佢架(除咗上星期五, 因為媽咪要湊細妹對仔女, 咁我就約朋友出街囉), 就算間屋有三間房, 我都係要同佢孖鋪.
返去前一星期, 我打電話返香港book位請媽咪去JW Marriott五樓的Marriott Cafe食buffet lunch補祝母親節.
上星期六朝早去灣仔攞passport, 跟住就同媽咪去Pacific Place行街等十二點上JW食飯. 一早去到Pacific Place, 冇乜人, 我哋逐間入去睇衫試衫, 媽咪同我一齊入試身室, 邊試邊影相, 好開心啊!
一到十二點就上去Marriott Cafe, 幫媽咪影張相. 媽咪拎住個小紙袋係我當日戰利品, 我好忍得手, 買咗一件tee咋.
好多好多嘢食, 每人盛惠HK$385但都滿座哩.
新鮮沙律, 美味魚生, 橙汁任飲.
見到成個山咁高既海鮮陣, 勁開心. 加菲蟹, 翡翠螺, 東風螺同蝦都好鮮甜, 青本瓜沙律夠醒胃.
羅宋湯好好味, 但另外個一個花生雞腳湯就好淡.
除了海鮮外, 一定要食炆花膠, 雖然是薄身細隻的, 但一樣有豐富骨膠原, 食咗皮膚都靚啲嘛. 由花膠起順時針係蒸石斑, 炒麵, 炆牛肋骨, 燒鴨, 中式牛柳. 除了炒麵外, 其他都是水準之作.
燒牛肉好淋好正, 入口即化咁濟. 燒羊架都幾好, 唔會乾身而且夠"騷".
食到呢度我已經勁飽, 但媽咪仲幫我拎多隻slipper lobster, 又彈牙又甜.
甜品選擇非常多, 可惜肚皮容量有限, 只試了幾款. 右上角的如果我冇睇咗錯係叫意大利米配黃梅, 出奇地好味, 唔太甜又好香酒味. 跟住係士多啤利意大利奶凍, 好滑好濃, cream份量肯定好重, 不過甜咗啲啲. 小小的朱古力撻好正, 黑森林蛋糕普通啦, 點飽都仲食得落的Haagen-Dazs.
媽咪的甜品, 最上面的是意大利奶凍, 意外驚喜是上面的兩小片糖漬薑塊, 配上甜甜滑滑的奶凍, 簡直一絶. 右邊的是蛋白souffle, 甜死人不償命之作, 不食也罷.
媽咪食得好開心呀!
呢餐食到超飽, 飽到晚餐我同媽咪都食唔落.
食飽飽後就要做吓運動, 送媽咪返屋企就和Po Po去葵芳血拼. 我哋兩個買呀買, 行咗成三粒鐘, 腳仔軟, 但收穫甚豐. 戰利品我唔會post出嚟, 除咗呢條裙. Show呢條裙係想話俾你哋知我媽咪好叻, 買完第二朝就幫我將條裙改好嘞. 一分錢一分貨, 平嘢手工自然差啲, v領位車得唔好, 着起嚟唔夠貼服. 媽咪就幫我拆開側邊响V領位每邊加條橡筋, 依家着起嚟就好貼服, 唔駛裏面打底都得. 我媽咪係咪好叻呢?
我同Po Po都有影相架, 不過佢話要打格仔, 我就索性唔放上嚟啦.
Po Po, 多謝你帶我去買衫呀!
我俾媽咪睇我哋既合照, 佢話你靚女呀. 
哈哈哈..我都想緊..我放..我個I-PHONE 張相...去BLOG到好唔好..因為比較模..當然..我要問過你先啦...你知..我地鐘意神祕D..咁你媽媽放心你同我依個綱友出街啦...哈哈哈...
ReplyDelete[版主回覆05/19/2011 14:32:00]你放囉，我唔介意架，橫掂嗰張咁矇。佢好放心，見你個樣都唔似好醒日識呃人啦。
咁勁...總知..我都叫你媽咪幫我改改..我都係自己加幾針...係呀呢條裙既胸部真係會離罩...但係....個V位又好靚...你下次著出來比影張相來睇.. 咁改左後..仲駛唔駛打底
ReplyDelete[版主回覆05/19/2011 14:34:00]我諗極都唔知點形容，係呀，就係“離罩”啦。 等有機會我會着嚟影低既，依家改咗，我可以唔着打底衫都得。
伯友笑得咁開心， 一定食得好滿足。
ReplyDelete[版主回覆05/19/2011 14:35:00]依家爸爸走咗，難得有人陪又食得咁豐富，佢真係好開心。
換passport, 網上申請, 一定要返香港攞架?
ReplyDelete[版主回覆05/19/2011 14:36:00]係，一定要返去拎，仲一定要去到灣仔。
真係孝順女一名！
ReplyDelete[版主回覆05/19/2011 14:37:00]趁媽咪仲行得食得，想陪佢多啲，帶佢去玩食好嘢。
伯母原來都好靚女喎!
ReplyDelete[版主回覆05/19/2011 14:38:00]咁佢個女都唔差既。 我會話佢知。
Woo~~呢條裙著上身一定好靚啊！
ReplyDelete[版主回覆05/20/2011 11:46:00]可惜我唔夠高又冇身材, 但見咁靚先忍唔住買咗佢.
good daughter !
ReplyDeleteJW Marriot 嘅自助餐唔錯環境好舒服，上次大少奶都係帶我來係這裡食！
PoPo ....咁靚女要打marker，激死我
[版主回覆05/20/2011 11:45:00]我咪就係睇得多大少奶去嗰度食先book嗰度囉, 嘢食環境都好好.
你跟伯有好相似呢！
ReplyDelete[版主回覆05/20/2011 11:44:00]有人話我似爸爸, 有啲人又話似媽咪, 我諗一半一半啦.
Mariott buffet lunch $385好貴呀 ! 去葵芳蒲呀! 收穫一定大啦 !伯母真係好針子嘞
ReplyDelete[版主回覆05/20/2011 11:43:00]媽咪食得開心, priceless!
媽咪針紙好叻, 以前家政堂啲同學個個上嚟我屋企揾佢請昌架.
著嚟睇吓吖
ReplyDelete[版主回覆05/23/2011 22:31:00]有機會先。。
popo果靚樣早就通晒天, 做乜要打格仔. 葵芳的衣服鞋等好像重平過旺角.
ReplyDelete[版主回覆05/23/2011 22:32:00]咪係囉，哈哈。 我諗平少少咁囉，不過要好好心機去慢慢揾。
兩母女感情真好 條裙好靚喎
ReplyDelete[版主回覆05/23/2011 22:35:00]我同爸爸媽媽都好close, 可能十幾歲就離家，冇咩機會有拗撬，見面機會少，就更珍惜見面既時候。 條裙我好鐘意，不過好似冇咩機會着。