港式快餐廳

你哋睇呢篇時我已經身上咗飛機番香港了, 就快可以見到媽咪lu!

早排見到Hanrik哋都話响Triple One Somerset新開呢間呢嘢唔錯, 上星期六懶得煮午餐, 就索性去嗰度試下.

嘩, 一見到個餐牌即刻好興奮, 好似香港啲快餐廳, 第一次喺呢邊見到咁既格局哩!

影完呢張相時, 有個好重香港口音的男職員用普通話同我講: "不好意思, 餐牌有價錢, 不能拍照."  好彩佢講時好有禮貌, 亦冇要求我刪除張相.  張相放上網後咁細, 都睇唔到個價錢啦.

Daddy叫的焗豬扒飯, 好好味, 同香港食既味道一樣.  唯一要嫌的是豬扒太薄, 有點嚡.

囝囝必點的油雞飯, ok咁囉.

細佬要食麵, 所以叫了南乳豬手撈麵, 唔錯.  豬手係皮包骨冇肉的, 但正合我意, 連細佬都鐘意食.

本來我想叫四寶飯, 但臨時侍應掛個咖哩牛腩飯牌, 即時轉軚.  成餐最好食就係佢, 啲牛腩炆得夠腍, 而且咬落是爽口的, 個咖哩汁仲更加冇得彈.  姐姐和我share呢碟飯, 再食埋細佬食剩的麵, 大家都飽到上心口.  姐姐勁鐘意個汁, 將成碟汁清晒, 飯食晒都要埋啲汁.

左下角的是佛手瓜鱆魚瘦肉湯, 飲唔到鱆魚味, 但都好有老火湯feel, 飲唔到咩味精味.

囝囝哋食得好開心.

呢餐合共唔駛S$36, 食到勁飽又滿足, 好抵食!  姐姐猛讚啲嘢好食, 話以後唔好去食pizza, 嚟呢度食抵好多.  上個月某個星期六我哋去Pizza Hut食晏, 都係食咗三十幾蚊, 但全部人都食唔飽, 啲嘢又唔好食.

呢度同香港唔同就係俾完錢就可以坐低, 侍應會將食物送上, 唔駛自己去排隊攞架. 我哋啱啱坐低啲嘢食就陸續上, 拍得住香港啲效率.

雖然已經好飽, 但難得响呢邊見到有紅豆冰, 點都要叫嚟試試.  叫了一杯有雪糕紅豆冰, 一杯紅豆冰.

佢哋好大方, 成半杯都係紅豆, 飲到最尾係啜唔到要用羮畢.

星期六午飯時間去人客都好少, 有啲擔心佢哋維持唔到哩.  希望平日多啲白領去幫襯啦, 如果唔係好似以前大家樂咁廿幾年前開過但少人食執咗, 我哋就冇咗呢個好去處啦.