Student recital (學生音樂會)

不經不覺跟老師學聲樂已經有十年, 由未結婚就開始學. 

可惜中間有六年時間因為生兩個囝囝, 成日做逃學威龍, 所以學咗咁耐都係停濟不前. 

見到其他學妹學弟都考到八級, 實在覺得太慚愧.  好彩老師都仍好有耐心咁等我, 唔介意我打遊擊方式上堂, 一個月先去上一堂兩堂.

年頭老師問我要唔要參與學生音樂會, 當時都好猶豫.  最後答應咗, 主要係想俾自己一個動力, 逼自己勤力啲去上堂, 上練歌.  但當時唔知姐姐五月會返鄉下, 知道既話, 我一定唔唱.  就因為咁, 呢次實在太大壓力, 五月時要返工, 要湊仔, 要煮飯做家務, 已經攰到死仲要去上堂練歌, 真係好辛苦.

個音樂會响過去個星期日舉行, 呢張就係老師讀設計既囡囡整既poster. 

地點: YMS Arts Centre. 

Auditorium 裏面就係咁嘞.

除我以外, 當晚個個都唱得好好.  佢哋個個都好叻, 唱的都是大型作品, 如歌劇La Traviata (茶花女), Madama Butterfly (蝴蝶夫人) 之類.  我純粹客串性質, 間下場咁啫.

自知唔會唱得好, 所以在presentation方面下功夫.  出動細妹十年前訂做的伴娘裙, 再買對三吋半高的高跟鞋, 務求做到唔聽得都睇得.    大家唔駛擔心, 當晚我冇震碎玻璃.

朋友們送給我的花, 囝囝好開心咁拎住.  嗰晚囝囝一入到去場地, 好大聲咁叫"媽咪", 全場大笑, 我真係想揾窿"捐", 好彩表演仲未開始.

最後要多謝好友們冒住被我歌聲震穿耳膜, 震碎眼鏡玻璃的危險到場支持.