香港迪士尼

農曆新年返香港時, 打算年初二去迪士尼, 但當時得幾度, 凍到騰騰震, 最尾都冇去.

今次返香港因為答應咗囝囝, 唔去都唔得.

以前去過Florida的Disney World, 雖然知道香港既會細好多, 但始終都有少少期望.

在欣澳轉車時, 見到迪士尼線地鐡到時, 大家都好興奮, 因為啲車窗係米奇標誌的.  入到車廂入面, 連手挽都係米奇, 嗰刻我仲諗不如等日得閒就算唔入迪士尼, 淨搭呢線地鐡過吓癮都好噃.

一到大門口, 兩個囝囝見到gate上面隻Mickey己經Yeah! Yeah!咁興奮地叫.

到時己經幾孚十二點, 諗住趁少人快啲揾地方食午餐先.  一係美心酒樓, 一係Corner Cafe, 諗住留到八點睇煙花, 都係留番晚餐食美心, 午餐就揀Corner Cafe.  仲早, 午餐人潮未到, 所以等一陣就有得坐低.  但奇怪係我哋入到去時原有好多空枱噃, 但點解要我哋喺外面等呢?

嘢食好貴吓, 不過都預咗既.  大仔要個fish & chips兒童餐, 我要柱候牛腩飯, daddy食日式咖哩雞扒飯, 兩個大人餐都跟餐湯, 我哋揀雜菜湯.  味道不過不失啦, 但咁既價錢外面可以食到好好多既嘢.

食完嘢啱啱好响Main Street, USA, 的Stitch Summer Dance Bash開始, 我哋就坐响路邊度睇.  囝囝們幾開心.

睇完巡遊同跳舞後, 就去Tomorrowland.  裏面有好大既Buzz Lightyear, 我好想同Buzz影相架, 但要追住兩個囝囝, 停唔到落嚟影相. 

第一樣玩既係Autopia, 條隊鬼咁長.  其實咪揸玩具車咁, 冇乜好玩, 但啲細路就玩得開心.

跟住就去同Buzz打招呼, 去玩Buzz Lightyear Astro Blasters.  Daddy 同大仔好努力咁去射, 我就啩住影相.  結果走時daddy俾工作人員截住話佢射出全日最高分喎, 叫我哋5.45pm去唔知邊度領獎喎.  攪笑, 亂咁射都叫最高分.  最尾又攰又熱, 我哋都費事返轉頭去領咩獎.

大仔話佢要玩Space Mountain, 我再三問佢係咪真係要玩, 佢話係.  好, 我當年响Disney World最鐘意既就係Space Mountain, 啱晒.  條隊又係勁長, 期間仲有同志們打尖, 真激氣.  有得坐呢隻過山車好開心, 但囝囝就驚到不停咁大叫, 幾孚要喊添, 之後猛話以後都唔坐過山車.  如果係我自己去, 我一定玩唔止一次, 我最鐘意過山車.

我哋仲玩咗其他嘢, 但都冇影相.  另一個我鐘意既係It's a small world.  裏面啲公仔好得意, 囝囝猛咁叫我影低Toy Story 的Woody 和 Little Mermaid 的Ariel.

响Adventureland坐Jungle River Cruise, 都好玩.  大仔以為啲動物, 火之類係真既, 驚到要踎低匿埋. 

細佬學人打鼓, 跟住當條木係咪, 對住嚟唱歌, 笑死我.

玩到六點度, 又熱又攰, 兩個囝囝都唔肯再行, 但只有一架bb車, 唯有推一個抱一個咁離開.  仲話留到八點睇煙花, 好彩冇去美心度訂位食晚飯啫.  細佬返屋企途中就瞓著, 連晚餐都冇食.

大仔臨瞓前話: "Disney is not fun, so much walking and waiting, it was so tiring.  I think Ocean Park is better".  其實我都覺得海洋公園好玩啲.  香港迪士尼太細太逼.  响美國Disney雖然樣樣都係排好長隊, 但啲人係好守規矩, 好有耐性唔會打尖.

講真都算好玩, 但見唔到我最愛的Belle就有啲失望.