父親節

噚日父親節, 本來想响香港陪爸爸過埋先返, 但機位勁爆, 訂唔到星期日下晝機, 咁唯有預先整定個蛋糕.

外甥仔話要食朱古力和士多啤梨味, 咁就整strawberry and chocolate mousse cake. 

香港屋企冇焗爐, 只可以整餅底, 今次用朱古力味餅底.  當然在百無情況下又貪方便响二記買包餅底碎用就算嘞.  我細佬上次借返嚟既餅模仲未還, 啱啱可以再用.  交帶佢帶塊方型咭紙俾我, 佢又唔記得, 好彩俾我見到個金莎朱古力既膠盒, 啱啱好用來墊底.

無氈無線, 神仙難變! 又費事特登去買嘢做裝飾, 用唔晒留低都冇人會接手.  於是就拜托細佬帶個父親節牌番嚟, 順便做埋裝飾.  我只係整蛋糕本體, 連模都未甩就留俾佢星期日自己攪, 不過我千叮萬囑叫細妹影低相俾我睇.

最後成品, 靚嗎?

側邊就係咁嘞

次次响香港整餅個餅底都係太厚, 因為份量次次都係求其. 細妹只有針磅, 仲要準確度係20g一格, 所以慕絲層啲糖係無用磅量的, 豉豉單單加幾羮糖, 邊加邊試味.  魚膠片平時用長型焗盆來浸軟, 在香港呢就用鑊浸.  嘻嘻, 我冇份食, 真係唔知咩味, 可能勁難食架. 

味道係其次既, 最緊要我爸爸開心啫, 話晒個蛋糕係我哋兩姊弟夾手夾腳整, 誠意搭夠.