甜品餐

上星期四無端端俾大老闆"欽點"代佢去參加一個committee meeting, 個committee係同我既工作一丁點關係都冇既.  好慘呀, 以後幾個月每兩, 三個星期就要去開一次會.

每次開會都會係committee chairman個office度開, 係CBD範圍, 去又麻煩, 走仲煩, 因為會撞着放工時間, 會塞車.

上星期四個會應該係四點鐘開到六點, Daddy 懶得煮飯(係淨煮飯啊, 餸我已經之前煮好) 就帶埋兩個囝囝去Raffles City Shopping Centre 會合我食晚餐.  結果個會拖到六點九先完, 去到Raffles City Shopping Centre 已經人山人海.

帶住兩個囝囝揾食真係唔容易, 好彩俾我哋揾到間無乜人既餐廳, 可能因為喺响新既extension 內, 冇咁就腳.

間餐廳叫Aerin's.  拎部相機出嚟, 點知居然冇電, 所以只好用手機影.

個餐牌內啲食物都好吸引, 不過最後只揀了啱兩個囝囝食既嘢.  問個侍應份量大唔大, 個侍應話都好大吓, 叫我哋叫兩個主菜就夠.

就睇吓有幾咁大, 原來係咁"大". 呢碟係Banger and mash, 兩條英式香腸加薯蓉.

兩條腸仔都幾乎全給兩個囝囝食晒, 我只係食薯蓉咋.  腸仔我試少少, 覺得味道幾淡吓, 我記得以前喺英國時食既都冇咁淡, 不過都好既, 細路仔唔應該食太咸.

第二碟主菜都係咁"大"份, cheeseburger. 當然大仔獨霸個漢堡, Daddy就食薯條.

食完兩個主菜, 我和Daddy都覺得冇咩落肚, 但又唔想再叫主菜, 於是就叫甜品啦.

大仔要心太軟, 因為有齊佢鐘意既朱古力和雪糕.  個心太軟個心只有少少流出嚟, 差咗啲但味道都還可以.

Daddy 要的Rum and Raisin Cheesecake.  餅底和芝士層中間夾Rum and Raisin, 都好重酒味, 但可惜個cheesecake好似食唔到芝士味.

但細佬都好鐘意食呢個cheesecake, 拎住私伙叉係咁撩嚟食, 食到成隻花面猫咁.

最後係我揀的pavlova, 勁正, 帶酸的熱情果和raspberry剛好中和meringue的甜.  值係讚既係佢哋放咗都幾多新鮮生果, 尤其新鮮raspberry和blackberry喺呢度都係勁貴架嘛, 所以佢哋都好大方吓.  細佬好鬼精, 揀晒啲黑莓和藍莓, 因為呢兩樣真係好甜.

呢度啲檸檬茶買一送一.

呢餐係名符其實的甜品餐, 兩個主菜加三個甜品, 食完好滿足.  埋單好似七十幾蚊, 都算係咁啦.

呢間餐廳都好child-friendly, 一坐低侍應就拎紙和顏色筆來給兩個囝囝填色.