今次成家人一齊返, 囝囝上個星期已經開始倒數, 佢話今日要自已執行李喎, 不過佢執既係只係自已啲書和玩具.
上次(兩個月前)返香港親自下廚煮的晚餐, 拖到依家都未出post, 如果今日再唔出睇怕要變倉底貨了.
之前為咗氹細路, 買了忌廉來整strawberry panna cotta 和 blueberry yought mousse cake, 剩下的忌廉就用來煮白酒忌廉花甲意粉.
原來在香港酒係免稅的, 真好, 價錢比在呢邊的便宜一大截. 在百佳買了一瓶平價南非白酒, 反正用來煮的, 沒必要買貴價的.
煮意粉唔需要用一整瓶, 於是一邊煮, 一邊飲. 自從由英國返嚟後都未試過咁豪地一邊煮一邊飲, 因為新加坡啲酒比較貴. 雖然係平價酒, 但都好好飲, 下次都會再買呢隻酒.
做法好簡單, 先爆香洋葱碎, 洋葱開始變透明時加入蒜蓉, 炒一炒, 落花甲, 炒幾下, 洒入香草碎, 倒入白酒, 冚蓋, 煮到花甲熟, 加入忌廉, 用鹽和黑胡椒調味, 最後加入已煮好的意粉.
為了遷就我媽咪, 今次意粉煮得好淋身, 如果係al dente會更好味. 媽咪話好好味, 仲留起一碗第二日晏晝食添.
除了意粉, 還煮了金銀蒜粉絲蒸帶子, 正! 呢碟帶子在街市買才不過港幣四十大元, 抵食.
還有奄仔蟹, 第一次食奄仔蟹, 原來咁細隻蟹都可以咁多膏, 咁鮮味的.
細妹話蒸蟹一定要翻轉來蒸, 即肚向上, 如果唔係啲膏會漏晒出嚟喎.
碟菜心係細妹主埋, 我唔可以叫呢碟做油菜, 因為細妹一滴油都冇落, 齋白灼. 不過啲菜心真係好靚, 唔落油都唔會嚡, 又甜又嫩.
依家正在盤算今次返香港煮咩俾屋企人食, 要諗啲可以用白酒紅酒之類既, 等我又可以一邊煮一邊飲先.
No comments:
Post a Comment