好多菠蘿包

上星期日(31/10)焗了兩爐菠蘿包, 共三十六個.

焗第一爐時分咗心, 唔記得睇住, 焗過火咗少少. 

我又懶冇將做菠蘿皮的粉類 (低粉, 吉士粉, 梳打粉和臭粉)過篩, 第一輪的包個皮冇咁靚, 可能臭粉冇平均分配喺每個包上面.  焗第二輪之前再加些少臭粉落個皮料(之前已混合)再盡量搓勻, 所以第二輪既個皮靚啲.

囝囝好無聊咁一路話佢好悶, 唔知做乜好, 於是我就叫佢帮我手滾圓啲麵糰.  佢好小心咁摺疊緊舊麵糰.

囝囝都係碌咗一個咁多, 好好玩咁唔願放手.  碌一個都碌鬼咁耐, 我驚舊麵糰唔駛焗都俾佢摸到熟.

焗咁多包嚟做咩呢? 下回分曉.

整包包剩下蛋白, 不如整雙皮奶喇.

好耐以前抄低一個雙皮奶食譜, 記得整過一次, 但再睇返居然睇唔明點整.  算啦, 唔好咁煩嘞, 整鮮奶燉蛋白算了. 蛋白加牛奶加糖打勻過篩, 隔水蒸幾分鐘就掂.  整完三十六個包, 已經冇乜心機慢慢去摸, 求求其其, 冇睇時間又冇睇火, 所以就蒸老咗, 不過係個面似月球表面啫, 裏面都仲好滑滑架.