滿足的泰菜

囝囝生日party後, Daddy話我哋响廚房攪咗成大半日, 晚飯唔好煮出街食.

我鐘意食泰菜, 所以揀了一間泰國餐廳, 叫E-Sarn. 

曾經一個泰國朋友講過E-sarn係泰北一個地方, 啲嘢食出名辣的.  好多年前呢間舖仍喺Sixth Ave時我和Daddy去食過, 真係好辣, 但好好味好地道.

最近經過發現呢間已經搬咗去Pasir Panjang, 店內裝飾和舊店差不多, 坐得都好舒服.

六點出少少我哋就到, 所以仲未有人客.

叫了一碗細的海鮮冬蔭公, 夠兩個人分, 我和姐姐的, 因為都好辣吓但好味道, 成碗都係料.

蠔油炒芥蘭, 夠鑊氣, 菜仍翠綠.

我想食好耐的泰式蒸魚, 其實應該有多啲汁, 但因為汁辣怕細路食唔到, 所以汁分開上, 要食時先自己淋上面.  魚蒸得啱啱好, 又滑又鮮, 加埋啲泰式汁料就perfect, 可惜唔記得影碗汁, 望落應該係有乾葱碎, 青檸汁, 糖, 青辣椒之類.

菜單上有粉絲大蝦煲, 當然要點. 上桌時仲滾緊的, 睇到啲煙嗎?  煲底有好多南薑, 下次我自己整都要加多多南薑.  味道ok, 但粉絲太淋太濕, 蝦就老咗啲. 我覺得我自己煮既仲好味啲.  原來呢張相影到少少配條魚既汁, 就係右上角有隻metal spoon嗰碗.

有囝囝在, 又點可以冇雞食呢?  Grilled chicken with Thai spicy sauce.  我冇試唔知咩味, 但囝囝一個人食了大半碟.

呢餐食得好滿足好飽, 盛惠S$89, 三個大人兩個細路食都算抵 (請唔好轉成港紙!).

食飽飽, 見餐廳隔離有間舊式雜貨舖賣泰國嘢, 入去逛逛.  入到裏面去似去咗泰國咁, 有10蚊條的牛仔褲, 幾蚊件的裇衫, 有好耐冇見到既細細支玻璃樽裝芬逹汽水, 牛柏葉, 香草(好似有臭草添)....

買了一包S$1.3的泰國茄子, 一大紮Thai Basil才S$0.7, 仲買了魚露和蝦膏, 如穫至寶.  全部加埋S$4.7, 我一定會再帮襯呢間嘢, 由我屋企去都好方便, 下次我去買臭草煲綠豆沙.

嘻嘻, 有茄子, 有basil, 可以整Thai green curry, 下次post成品.