印尼小食

噚日下晝印尼姐姐打電話嚟公司, 話細佬由highchair跌咗落地, 嚇到我成個人跳起, 即時撲返屋企.

一路揸車, 一路祈禱.

感謝神, 細佬只係頭起咗個細瘤, 冇乜大礙.

原來當時姐姐上厠所, 大佬好心想放細佬落地一齊玩, 就解開安全帶. 但佢又唔夠力抱細佬落地, 細佬就跌落地撞親個頭囉. 

最攪笑係細佬瞓响地度喊, 佢就企定定係旁邊話: 'Oh, no!'. 真係唔知好嬲定好笑. 

佢都知闖禍, 我返到屋企問佢 'What's happened', 佢淨係話: 'No blood'.

佢都唔係有心整跌細佬, 所以一輪訓話後就算, 只罰佢冇下午茶食.

今朝開咗個好長既會, 有個人將textbook嘢放上去present 咗幾孚成個鐘, 之前講明只可以半個鐘, 佢直情係考驗大家既忍耐能力.

今日下晝仲有多個會開, 呢個仲攞命, 五點到七點, 有冇攪錯揀星期五呢個時候開會!

冇乜 mood 之際, 好同事送來一包令我即時醒神既嘢.

就係呢包印尼小食喇.

佢响Surabaya (泗水) 帶返嚟. 我諗呢包係佢既私人珍藏, 但見我鐘意食就好糠慨咁送俾我, 真係多謝晒. 

食起上嚟好似食popcorn咁, 好脆, 甜甜地, 最特別係食完會有少少苦既after taste, 但又係好討好既苦味喎, 都唔知點形容, 總之好食啦!

香港既印尼舖頭都可能有得賣啩.