並非國家獨立日, 而是印尼姐姐放假日.
過去星期日, 正是十二月我家獨立日.
朝早去教會祟拜, 因姐姐放假, 所以我要陪細佬去兒童祟拜. 其實最enjoy, 因為可以知道兩兄弟在兒童祟拜做啲乜, 聽唔聽話.
祟拜完食早餐. 之後開車走. Daddy 問: '我哋依家去邊呀?' 我話唔知, 不如去shopping 啦. 我都未講完大仔就話去Centrepoint, 好啦, 就去Centrepoint, 橫掂好耐冇去過.
入停車塲時, 大仔就話呢度有Sesame Street Show. 我問佢點知, 佢話睇電視廣告, 跟住仲話邊個邊個商場都有, 依家啲細路真係勁, 乜都知.
呢個商塲既聖誕裝飾好靚, 攞奬架.
一點先係show time, 食晏先. 去咗一間日本餐廳食. 我叫咗個三文魚頭味噌湯, S$8.90. 以為細細碗, 再加碗飯, 我和細佬兩份食. 原來好大煲上, 好多好多三文魚, 仲要啖啖肉, 最尾都食唔晒. 啲魚好滑, 個湯都有魚味, 抵食. 可能因為新加坡大部分人都唔食魚頭啦, 難得有人叫, 咪俾多啲魚囉.
食完啱啱好show time, 大仔一馬當先逼去最前睇. 個show半個鐘, 幾好睇架. 平時俾錢睇live show, 都係一個鐘左右, 要成七十蚊坡紙.
高潮時刻 - Elmo 出塲, 啲細路都唔知幾興奮.
睇完show係時候返屋企. 兩個細路玩咗半日, 沖個涼後, 好快瞓著覺. 我休息一陣, 就準備晚餐. 本來打算煮牛扒, 但最尾冇機會去買, 加上餐晏真係食得太飽, 都係煮啲簡單, 清淡嘢.
最後整碟頭台灣肉燥飯. 影相角度問題, 碗飯冇相中咁大碗.
仔仔好鐘意食, 一路食一路猛話 'Nice, hmmm, nice', 'Thank you, mommy'. 煮完嘢, 有人讚, 心情都靚啲. 仔仔食得好快, 於是奬勵佢, 飯後食個迷你甜筒.
食完飯, 洗完碗, 姐姐啱啱好返到.
獨立日其實都唔係咁難過, 我又有機會霸番個廚房一日, 幾開心丫.
台灣肉燥飯做法
材料: 豬絞肉, 葱頭, 蒜頭, 蛋, 冬菇, 八角
做法:
1. 冬菇浸軟, 切片, 浸冬菇水留起備用.
2. 葱頭切片, 蒜頭剁碎. 雞蛋烚熟, 剝殼.
3. 燒熱油, 爆香葱頭, 蒜頭, 再落豬肉, 炒至轉色, 贊酒, 加入冬菇, 兜勻.
4. 加入八角, 以生抽, 老抽, 糖調味. 然後加入浸冬菇水, 適量清水, 最後放入雞蛋, 慢火炆三十分鐘, 生粉水勾芡, 即成.
* 家常便飯, 所有材料, 調味都隨心隨意, 沒有特別注意份量, 請自行試味.
** 真正台灣肉燥應該用黑醬油, 我改用老抽, 所以較淡色. 葱頭其實需要炸成葱酥, 但我個人不喜歡炸葱頭, 只略爆香. 想煮正宗台灣風味, 可參考小小米桶.
No comments:
Post a Comment