冬至

終於interview 完! 感謝神, 非常順利. 

對住鏡頭居然沒怯場, 都算對答如流哩. 

講番噚日冬至, 補祝大家冬至快樂!

星期一先醒起第二日係冬至, 乜準備都冇.  嗰晚想去超市買隻雞, 但隻隻都皮包骨又唔新鮮, 於是今年冬至冇食雞.

噚日朝早返工前同姐姐講冬至, 求其拎起本節慶食譜, 叫佢煲花膠湯, 其他佢自己決定.

七點返到屋企, 佢已經煮好晒. 全自動波, 扢雪柜存貨都煮到三餸一湯, 勁呀!

花膠豬腱湯

酸甜石斑

鮑貝扒時蔬

蒜蓉粉絲蒸蝦

佢落咗好多粉絲, 好似粉絲蝦煲.  食譜書其實係蒜蓉帶子蒸粉皮, 屋企粉皮帶子都欠奉, 佢就自己改成粉絲同蝦.

撇開賣相, 全部都幾好食架.

佢一個人湊兩個細路, 仲咁俾心機煮餐冬至飯, 真係抵錫, 換轉係我, 都可能做唔到.  飯後當然仲有應節既湯圓, 但太飽, 毎人求其食一粒, 意思意思就算.

同場加映藍莓撻. 撻殼係星期日晚焗, 再掃一層朱古力, 放雪柜等朱古力硬番.  星期一晚出咗街, 所以噚晚先埋尾.  仔仔唔鐘意食吉士醬, 所以只係淡忌廉加糖打起做餡.  仔仔當啲忌廉做雪糕, 即刻話要食, 於是快手快腳咁帮我將啲藍莓放上面, 所以個個撻都唔同樣, 有啲得一粒, 有啲又好多粒.

呢三個係比較似啲樣既.  兩個仔仔都好鐘意食, 不過我覺得今次啲藍莓太熟太甜, 冇咁好味, 如果酸番少少, 整體味道會balance 啲.  新買嗰樽鏡面終於開張, 掃層鏡面影相都靚啲.