布吉遊(六) - 玩樂篇

終於講完食, 到講玩啦.

帶住兩個細路, 所以坐船, 浮潛之類就唔駛諗.  而且我同daddy第一次去布吉時都玩過, 此行以rest & relax 為主.

毎日早餐後, 兩個小朋友就去酒店既Kids Club玩. 裏面有玩具玩, 响特定時間亦有特別節目俾小朋友參與. 家長如果想有私人時間去外面玩, 可以將三嵗以上既小朋友留係度, 一入去時家長要sign in, 跟住工作人員就會將門鎖上, 唔俾小朋友自己出去, 要等家長返嚟sign out先走得. 三嵗以下就要有大人陪同下先可以入內.

兩兄弟係裏面玩到唔捨得走.

細佬仲學人油顏色添, 幾得戚!  嗰日走時唔肯放低支顏色筆, 最尾拎埋返新加坡.

玩一陣kids club, 消化完早餐就上房換泳衣去游水. 正確係玩水, 因兩兄弟都未識游水.

呢度有兩個兒童池, 响kids club既兩邊.

呢個係其中一個, 泥黃色部份係淺水, 藍色部份深啲, 適合大啲既小朋友.  泥黃色轉藍色地帶好滑, 要記得捉住扶手.  細佬好驚藍色地帶, 淨係肯企响淺水地帶.

另一個係toddler pool, 成個池都一樣深度, 比較安全.  呢度細佬就玩得開心嘞.

兩個池都有好多酒店提供既波波, 水泵之類既玩具.

其實大人池有一部份都適合小朋友玩既.

我哋仲有去Patong Beach行一行, 啲沙好滑好靚, 天色晴朗, 影相一流.

酒店和Patong Beach只隔一條馬路, 雖然好多車, 但酒店住客要過馬路, 個實Q都會去攔住啲車俾我哋過.  去完沙灘可以係門口特設既花洒沖吓腳同鞋.

呢啲都係上午既節目, 下晝就係大人時間了. 食完午餐, 送小朋友返酒店瞓晏覺, 由印尼姐姐陪住.  我和daddy 就出去行街, 購物, 按摩.

呢度好多按摩院, 但間間門口都有著低胸衫, 化行粧既小姐係度招客, 我哋唔敢入呢種, 怕入咗黑店.

最尾响Bangla Road揾到呢間寫明no sex既, 全部按摩帥都冇化粧既, 梯下先俾錢, 再上樓按摩.  唔好誤會瞓係度做腳底按摩嗰個唔係我, 我又邊有咁大隻呢?

第一日去, 俾咗錢做90分鐘Thai massage, 上去先做foot scrub, 同時有杯cold lemon grass drink送上, 好味.  跟住按摩.  個按摩師都冇出力. 仲奇怪係前後只有一粒鐘, 不過我哋無為意, 以為90分鐘係包埋飲嘢, 洗腳時間. 走前再送上一杯熱既lemon grass drink.

第二日又上去, 90 分鐘Thai massage 先500 baht, 咁抵, 梗要按多次啦.  今次按摩師開始時問我哋要細力, 中力, 定大力, 我哋當然要大力啦.  都好痛吓, 不過我死忍.  今次我哋望實牆上個鐘, 結果真係按足個半鐘噃, 唔通第一日呃我哋錢?

其他時間留兩個細路係kids club, 我地就可以relax 吓, 飲吓嘢. 呢度酒類比新加坡平好多.  提一提酒店房內雪柜係空既, 可自行到酒店G/F設的mini-mart買返房雪嚟飲.  不過建議大家去外面買, 7-11 就响酒店對面, 幾孚平成倍.

毎間房都送兩張welcome drink coupons, 係酒店裏面任何一間餐廳酒吧都可以用.  其中兩杯我哋係泳池旁游水時叫, 另兩杯check-out後等車時係酒吧飲.  酒吧天花板掛滿聖誕老人, 好得意, 見到都開心.

飲完呢杯就返屋企lu, bye bye Phuket!