除咗之前提過既第一晚响酒店食, 其餘兩晚晚餐都去外面explore.
其實成條大街間間餐廳都賣大同小異既食物, 除咗泰菜, 就係西餐, 印度餐, 但最唔明白就係點解會有咁多中東餐廳呢? 我又唔覺有好多中東嚟既遊客喎.
我對中東菜完全無趣, 聞到朕香料味都驚.
以前去曼谷時食過好好味既粉絲蝦煲, 呢次一心去布吉再食過. 行均成條街都揾唔到一間賣呢樣菜, 最後有一間叫Banana Phuket 既有賣近似既. 間餐廳响正酒店隔離, 賣泰菜和西餐, 門日放咗好多海鮮嚟引人.
呢個就係粉絲蝦, 不過碟上. 响布吉四日三夜都未見過有煲仔菜, 或者布吉係唔興呢味啦. 蝦算新鮮, 但味道麻麻, 偏甜, 有啲花生醬味, 怪怪咁.
另外仲叫咗粉絲豬肉碎湯, 炒雜菜, 腰果雞柳, 辣汁炒魷魚. 豬肉有陣豬肉味, 好難頂. 辣汁魷魚呃人既, 一啲都唔辣!
全部都麻麻, 另加一支啤酒, 兩支礦泉水, 盛惠一千baht 左右, 你哋話係咪响酒店食仲抵呀.
好啦, 第一晚咁差, 第二晚就行耐啲至决定. 揀呢間叫Pum Thai Restaurant and Cooking class. 既然教得人煮嘢, 唔差得去邊啩. 一入到去就有人非常友善咁招呼, 仲話呢到好free 架, 啲細路可以隨便周圍走, 我哋又可以隨便參觀. 第一印象好好. 開放式廚房, 成個地方都好乾淨.
我哋初到時, 有個鬼婆係度上緊堂添, 張相影得唔清楚, 因唔好意思行咁埋去影.
Menu 上無乜選擇, 都係嗰幾樣常見菜式. 啲飲品反而仲吸引, 左下係lemon tea, 右下係tamarind (中文應該係羅望子) juice, 另一杯係橙汁. 我杯tamarind juice勁好味, 酸酸甜甜, 夠開胃. 最欣賞其實係枱中間個杯仔, 裏面放片檸檬葉, 青紅指天椒各一隻, 就變成簡單別緻既table decor嘞.
希望越大失望越大. 一上菜所有分都扣晒. 擺明賺鬼佬錢, 全部碟頭上, 菜同飯同一碟, 邊有泰菜咁架! 諗住叫嚟share架嘛, 咁上碟頭我哋邊分呀? 好食就話啫, 全部都唔好食. 冬蔭公居然完全唔辣, 仲要只有湯, 幾隻枚枚地既蝦, 同一大堆唔吞得既香芧香葉, 連蘑菇, 茄子都冇粒, 收130 baht, 絶對揾苯!
差啲唔記得仲有碟雞肉沙爹, 因為佢哋居然落漏單, 要再催至嚟. 另外仲叫咗mango glutinous rice 和 creamy banana coconut soup 做甜味, 全部味道普通過普通. 因為實在太失望, 相都唔影啦.
呢間嘢有樣好奇怪, 除咗坐低時有人招呼, 其餘時間要揾人理都難. 所有人都好忙咁抹廚房, 執廚房, 但完全唔招呼客人, 眼尾都唔望一眼. 不過好肯定食物一定乾淨.
開頭勁友善個位小姐, 到埋單時就口黑面黑, 對眼都唔望我一眼呀, 咩態度呀?! 好彩我check吓張單, 個沙爹入咗兩次單呀 (即係其實冇入漏單啦
), 佢即刻扣番錢, 但個面口仲黑多錢.咁差點解我仲寫咁多呢, 其實要話俾大家知千祈唔好俾呢間嘢既外表呃. Cooking school 唔代表一定好食架.
No comments:
Post a Comment