囝囝當花仔

上星期六 (7月31日), 教會好友結婚, 囝囝有幸被邀請做花仔, 他的好朋友就當花女.

囝囝第一次做花仔, 著起老西一副正經樣,  拖住花女笑得幾開心.

佢做花仔我仲緊張過佢, 怕他行太快, 又怕他亂跑亂跳亂講嘢.  其實佢好細個己經有朋友想揾佢做花仔, 但他實在太佻皮, 怕他拿了介指走佬, 所以都沒成事. 

好彩花女己經有豐富經驗, 簡直係專業水平, 所以我叫囝囝望實花女, 花女行一步佢就行一步, 咁就包冇錯.

正在等walk down the aisle, 花女真係太可愛啦!  囝囝都俾我攪到幾緊張吓, 佢怕行行吓會跌咗個介指枕頭落地, 所以捉到好實.

個婚禮成個幾鐘, 要佢坐定定係冇可能, 我和伴郎用盡方法叫住捉住佢, 好在到佢要出場遞介指和最後和新娘新郎離場時, 佢都會一本正經.

好開心能夠在好友婚禮上帮忙, 新娘我識了十幾年, 好似由細睇到佢大, 佢仲係我大學師妹添, 我當佢係自己妹妹咁.  依家見佢結婚, 進入人生另一階段, 我都好替佢開心.  祝佢和新郎新婚快樂, 白頭到老, 早生貴子. 

禮成之後, 囝囝第一時間除低件褸同背心, 跟住拉件裇衫出嚟去食嘢, 成個飛仔咁.

同妹妹仔玩得幾開心, 唔知人哋媽咪會唔會嫌佢教壞佢個女呢?

順便提埋晚上既晚宴, 在Orchard Mandarin請飲, 勁好味份量亦好足.  唔好意思碟碟都影, 只影低幾味.

頭盆乳豬拼盆.

魚翅, 見唔見到面頭有勁大堆魚翅呀? 食落啖啖都有魚翅, 人人都食到舔舔脷.  最好笑有個朋友一見到堆翅, 就話: "嘩, 咁大堆頭, 慘啦, 唔知人情夠唔夠俾呢餐?!".

鮑魚冬菇扒菠菜.

仲有好鮮甜的大海斑, 辣椒大蝦, 燒鴨, 雞, 伊麵和楊枝金露, 食物多到食唔晒.  在呢邊飲食完都唔覺飽就試得多, 有嘢食剩都真係第一次咋.