香港機場新體驗

時光倒流至2月10日, 我和姐姐帶住兩個囝囝返香港過年 (Daddy 因工作關係要遲少少才飛).

臨飛前一朝, 細佬突然發高燒, 成40度咁滯, 睇兩次醫生, 醫生話係假痲, 會燒四至五日.  機票訂好晒, 焗住都要飛.

Daddy 話發燒飛唔飛得, 我話依家呢邊機場都冇check體温, 香港嗰邊都取消咗健康申服, 應該沒問題.

原來我係錯嘅, 香港機場仲有check體温.  我哋即刻俾人截住, 嗰兩個職員用對講機call佢哋啲同事話呢邊有case.  咁我哋一行四人就儍更更咁企喺度等佢同事過嚟.  嗰時已經夜晚十點, 兩個囝囝都好眼瞓. 


可以唱完幾次陳潔儀首"等了又等"後, 終於一個女職員施施然咁散步到, 以為就地解決啦, 點知佢目無表情咁叫我哋跟佢行去佢啱啱行過嚟嘅地方.  吓? 咁點解原先佢兩個職員唔可以其中一個帶我哋過去咩? 一來一回, 嘥時間啫.  我囝囝仲要又攰又發緊高燒架.

嘩, 原來要去嗰度要行好鬼耐, 幾孚係由機場一邊行到另一邊, 仲要搭扶手電梯落一層添.  我推住架bb車架, 又無人帮手, 搭扶手電梯落去好危險, 點解佢哋咁唔considerate呢?

好嘞, 到佢office, 坐低答問題: 幾時開始燒? 有冇睇醫生? etc....

個女職員填好張form, 以為攪掂, 點知佢話要等個nurse落嚟check check 先可以走.

又再等了又等, 個nurse落嚟, 攞個儀器响細佬身上量幾吓, 跟住又問問題:

nurse: 上機前知唔知佢發燒? 幾時開始燒?

我: 知, 噚日開始, 張form咪寫咗囉.

.........

............

nurse: 好啦, 都係循例問吓啫. 如果過幾日仲燒, 就要喺香港睇醫生喎.

我: 哦. 

我心諗如果我個仔燒咁多日, 唔駛你叫我都會帶佢睇醫生啦.

之後佢哋終於放我哋走, 去到行李帶度只剩我哋嗰兩件行李, 見到有個staff喺度等緊, 我諗再遲少少出嚟要去報失度領行李.

其實健康檢查緊張啲都係為市民着想, 我都可以理解.  但個步驟可唔以簡化少少, 為旅客嘅方便着想吓呢, 例如, 機場兩邊都設office, 唔駛旅客行咁遠.

查實一落機未被衛生局截住前, 己經一肚氣.  一出機我就快快手咁出閘, 想快啲去到我爸爸屋企俾細佬休息.  我手抱住細佬, 身上只揹住個手袋.  一出機就問地勤去邊度領bb車, 沿途問咗三個地勤, 都叫我向前行.  最尾行到check體温度都冇人拎bb車出嚟, 於是我又跑返去閘口, 都好遠距離架, 跑到我索氣.  再問過, 原來就係喺閘口領. 

嗰陣真係成肚火, 鬧個地勤做咩之前點我行前, 個地勤居然話以為我問佢推行李啲車!  大佬, 我抱住個細路, 手上無行李, 問你攞架行李車嚟做乜呀? 自己點錯人都唔認, 仲用啲咁嘅藉口, 最後連sorry都冇一聲.  依家諗起都仲好嬲! 

點解香港機場啲地勤咁差呢?  我唔係問一個喎, 係問足三個, 居然都答錯, 咁樣點可以俾旅客一個好印象呀?  而且幾乎每個地勤都完全冇笑容, 希望有關方面好好檢討吓.