我啲愛心麵包似孚愈來愈被接受, Daddy只係行入廚房問吓我整乜, 我話麵包, 佢就"哦"完一聲行番出去, 以前實嘈我哦我架嘛. 今朝上機前(今個星期去香港公幹)居然問我攞麵包食喎, 真神奇.
連姐姐都話要學整, 雖然我都係半桶水, 但都係義不容辭, 佢識整我又可以做少啲.
全部用直接法, 貪快.
1. 菠蘿包.
晨早六點半起身搓, 十五分鐘就搞掂, 交帶姐姐讓麵糰留室温發酵一個鐘先放雪柜.
去完教會, 帶細佬去剪頭髮, 食埋晏, 三點返到屋企.
將麵糰由雪柜拎出嚟回温, 再繼續其他步驟. 以前跟的食譜不見了, 今次用我媽咪帮我從香港某份報紙剪出來既食譜, 包包都幾軟熟, 但個皮就唔夠香脆, 可能牛油分量唔夠, 要再揾過個食譜先得.
2. 南瓜小餐包.
以前整過一次, 好彩仲有食譜. 今次買的南瓜好甜, 用來整包真係一流. 包包主體加入南瓜蓉搓, 仲有牛奶, 又香又軟熟, 仲要麵糰勁好搓. 裏面包了南瓜餡 (南瓜蓉加少少蜜糖), 但今次南瓜蓉好水, 好難包, 包完之後都唔敢再滾圓, 怕餡會漏出嚟. 放紙托上面嗰三個就係有少少漏餡.
今朝食呢個包做早餐, 超好吃.
南瓜小餐包的內心世界, 以前整既所以有芝麻喺面, 今次冇放, 因為囝囝唔鐘意芝麻.
3. 士多啤梨乳酪麵包
自從上次跟愛美麗整士多啤梨乳酪麵包後, 成日想再整. 我自己又衰唔抄低食譜, 諗住隨時上網睇番就得. 點知噚日上愛美麗blog睇時, 個食譜俾雅虎食咗一半!
點算好呢? 求其揾另一個食譜改改, 加入士多啤梨乳酪, 姑且試試. 記得愛美麗是加水的, 而我就完全冇加水, 用牛奶代替, 變成有牛奶味而沒有士多啤梨乳酪香味. 
第一次自己改麵包食譜, 唔知會唔會成功, 於是就用嚟玩吓造型.
一個辫子型, 咩1-3, 4-2, 2-3...口訣, 整整吓都亂晒, 求其左搭右搭就算.
又試吓整花藍包, 點解成條尾咁既? 不過囝囝見到又好開心喎, 兩個花藍包都俾佢訂咗, 我哋個個都唔准食呀.
食起上嚟都幾好喎, 除咗個皮韌咗少少, 裏面都好軟熟, 又香牛奶味, 仲加重糖, 所以甜甜哋.
細佬噚日剪咗個新髪型, 個髪型師仲同佢gel起前面添, 夠型啩!
No comments:
Post a Comment