氹細路

我成日都整嘢食, 但其實我香港啲家人都冇乜食過我煮啲嘢架, 因為我十幾歲就嚟咗呢度.

前個星期返香港時, 就決定整啲嘢嚟氹吓我姨甥和姨甥女.

佢哋睇我blog睇中strawberry panna cotta, 咁易既當然冇問題啦.  即刻去sweetie 同二記入貨. 

姨甥不知幾興奮, 一早打電話問我幾時去佢屋企整, 放學又再打, 我媽咪話如果我嗰日唔整, 佢成晚都唔駛瞓呀. 

一次過整夠十二杯, 大人細路都有得食.  成家都食得津津有味哩. 

跟住佢哋又响我blog睇中blackberry yogurt mousse cake, 咁又整埋.  呢個餅最啱响香港整, 因為細妹同我媽咪家裏都冇焗爐, 只可以用消化餅底. 

揾唔到blackberry, 改用blueberry.  細妹屋企揾乜冇乜, 膠刮? 冇.  Mixing bowl? 冇. 電動打蛋器? 冇.  手動打蛋器? 都冇.  好彩仲有支Braun既棒型攪拌器有個ballon whisk attachment, 都打到cream.

唧咀特登去買個, 其實同款咀, 我己經有大細兩個, 不過為咗呢個餅, 都再買多個.

唧袋叫我細佬帶俾我, 餅模叫佢去借返嚟, 裝飾用甜忌廉都叫佢打起埋拎俾我. 

左拼右湊下, 就攪咗呢個餅出嚟.  六吋正方形, 餅底厚咗啲, 因為費事剩餅碎.

咁啱有個朋友生日, 整多個四吋圓形送禮, 希望佢鐘意.

返到新加坡, 姐姐見到呢兩張相, 問點解我响香港整既靚過喺呢邊整既?  梗係啦, 一來香港生果平啲, 可以用多啲嚟裝飾, 二來, 有個專業蛋糕師傅(我細佬)從旁指點教路, 當然會靚啲啦.

我姨甥同姨甥女見到個蛋糕幾開心, 仲食咗好多添.  雖然無人生日, 但佢哋都唱完生日歌先切蛋糕, 細路仔都係咁.

食完之後兩個就猛攬住我, "姨媽, 姨媽, 你下次再整嘢俾我食", " 我下次要朱古力味", " 我要....", 氹得我幾開心.