日本行(5) - 東京

第三日, 即星期日朝早就坐新幹線 (shinkansen) 由大阪去東京.

Nozumi 14 號車, 個車頭成隻扁嘴鴨咁.

在入閘前買了便當在火車上食, 呢份係波士既 - 牛肉飯.

初時我哋以為要快啲食, 怕凍咗唔好食.  佢打開個盒, 筷子都叉咗落去先發覺原來盒內另有乾坤. 白色兜下面有包好似暖包既物體. 撕開暖包上面密封膠紙後將兜飯放番上面, 岔蓋等五分鐘, 兜飯就熱到冒蒸氣添, 啲日本人諗得真週到.  當然俾價錢就貴啲啲啦, 盛惠1200 yen, 不過波士話唔錯.

呢個係我既, 平得多, 750 yen 啫, 但好好食.  左邊係有味飯, 裏面有野菜和荀.  右上角有煙三文魚, 煙鴨胸, 魚, 玉子.  右下角就有菜, 南瓜, 蕃薯等, 綠色嗰粒係甜品嚟既, 好似抹茶布甸.  成盒都感覺好新鮮, 最啱清淡口味既我.

到東京後去酒店check in, 休息一陣, 就決定撇低波士自己去行街.  酒店在新宿, 附近大把商場, 不過我無帶地圖出門, 自己亂逛.  四點出門, 六點返到酒店會合波士去食晚飯, 兩個小時我就掃咗三條連身裙, 兩件上衣和一個手袋, 仲搞埋退稅添, 我係咪好efficient呢?

日本人真係好細心, 商場女厠厠隔入面仲有個bb位, 大人上厠所時都唔驚bb會亂咁走或無人看住. 

晚餐選了在酒店附近的一間炭火燒烤店, 非常地道, 裏面全是日本人.  餐牌就全日文, 仲要冇display, 真係要靠估.  左下角用圖畫來教人點燒, 幾搞笑架, 幅圖話男士英勇啲, 要負責燒, 燒熟之後就各自夾嚟食, 或者好似最後幅圖咁由個女仔好温柔咁餵個男仔食. 

食燒烤梗要啤一啤啦.  啤酒係我既, 波士飲綠茶.

我哋叫咗個沙律, 係韓式醬汁, 幾refreshing.  啲豆豆係送既.

一個牛拼盆, 一個豬拼盆, 餐牌上只認得牛和豚兩個字, 都唔知叫咗啲乜.  原來有內臟, 牛腸, 豬脷, 豬肝.  好彩我都食內臟, 波士就麻麻.

成個炭爐上架, 個抽煙機响上面, 不過食完都成身味.  味道都係普普通通啦, 可能如果我哋識日文會叫到好食啲既嘢既.

仲有杏鮑菇.

食完即刻覺熱氣, 唔驚, 我早有準備, 帶了花旗參和甘草, 第二朝一起身就沖杯嚟飲, 熱氣全消.