兩姊妹首爾行Day2下 (奉恩寺, Goto Mall, Loco Loco 蒸貝)

食完馬場洞燒韓牛已經三點半, 坐地鐡去下個景點 - 奉恩寺(Bongeunsa, 봉은사).

奉恩寺在COEX的對面, 以前要坐地鐡去2號線三成站(Samseong)再穿過成個COEX Mall先去到.  依家地鐡開了個新的9號線奉恩寺站(Bongeunsa), 出口步行幾分鐘就到, 方便好多.

去到奉恩寺時已經四點半, 天色開始暗.

兩姊妹首爾行Day 2上 (慶熙大學, 馬場洞韓牛)

15.11.2016

今次首爾行是非常relax的, 雖然有plan 行程, 但根本沒想過要跟足, 最緊要唔可以趕.

所以每朝早都瞓要自然醒, 哈哈, 即係至少十點啦, 再慢條斯理梳洗, 十一點左右先會出到門. 因為有太陽時間短, 通常朝早節目會去景點把握時間影相.

呢日就先去慶熙大學 (Kyung Hee University) 參觀.  我識得幾個那大學的教授, 但就從未去過這校園. 好容易去, 坐一號線地鐡到回基站, 1號出口落樓梯, 旁就會有綠色一號巴士, 用T-money可以免費接駁(都記得要拍卡).  巴士只停三個站, 最後一個站就是慶熙大學.  校園大門我忘了影, 但唔緊要, 靚景在後頭.

近大門的一個紀念碑

兩姊妹首爾行Day 1 (人蔘雞, 生蠔菜包肉)

每年最期待就是年尾和兩個妹妹一齊去旅行.  可惜二妹沒空, 只有我和三妹兩個去首爾玩.

上年去日本九州因為三姊妹都未去過, 所以觀光為主, 還要換幾次酒店, 朝早要趕火車等, 都幾辛苦.

我和三妹都去過首爾, 所以今次主要去飲飲食食, 只包括了幾個之前未去過的景點.

安排行程時, 三妹一直說要食呢樣, 要食嗰樣, 邊個邊個朋友話邊間邊間好食. 於是我就盡量將所有要食的編入行程.  真的太多嘢想食, 編到入宵夜. 下面就係原來的行程. 我都預咗無可能跟到, 我同三妹講應該食到第三日就已經好漏食唔落. 結果, 係到咗第二日我細妹已經舉白旗.

小學詩詞美術展

12.11.2016

出發去首爾前一日, 即星期六, 本來節目已經排得密麻麻.  朝早要去街市買餸, 因為只係我一個人去旅行, 要儲定糧給三仔爺. 電工九點半來整燈(浴室燈壞了), 裝修公司十一點來傾裝修細節, 兩點我要返教會開會.

忙到氹氹轉時, 細佬才告訴我們當日他的小學在圖書館有個詩詞美術展, 十二點到兩點, 他說他班的作品有展出, 一定一定要去.  十二點半傾完裝修, 匆匆食個午餐再去圖書館轉一圈.

以為只是小二的作品, 去到才發現原來主角是小六生寫的詩和插圖, 小二作品只是作陪襯放在一個角落.  即係哥哥應該知道, 但他從沒提過, 因為他完全沒興趣.

美食推介 - Ilis 西餐廳

十一月和妹妹去首爾後在香港留咗幾日才回新. 容許我先跳過首爾遊記, 先出這篇.

今次想推介位於尖沙咀山林道的一間叫Ilis 的西餐廳.

Ilis

地址: Shop A1-A2, G/F, 13-15 Hillwood Road, Tsim Sha Tsui

         尖沙咀山林道13-15號地下 A1-A2號舖

電話: 2341 5628

Facebook專頁

有睇開我blog的朋友都可能會記得我細佬是蛋糕甜品師傅, 做了廿幾年的蛋糕甜品, 在原來公司已經晉升至幾senior 的師傅級別.  今年年中他決定辭去蛋糕師傅工作, 和兩個朋友一起出來創業開餐廳, 就是我想推介的Ilis 了.  原來我細佬除了整餅了得, 煮西餐都有一手, 是餐廳裏的主廚呢.

十一月前未試過, 不敢貿貿然介紹給你們.  今次返香港特別安排一家人去嗰度食晚飯慶祝大仔生日. 試食過後, 真心覺得好好味, 所以才敢响呢度理直氣壯推介.

蘑菇湯, 絶對真材實料, 沒加薯仔麵粉等, 用了大量蘑菇煮成的.

單親媽媽的家常便飯

最近兩個月都無時間寫blog巡blog, 因為:

1. Daddy 11月頭去美國公幹個半月.  Daddy飛的那日是哥哥升中試的最後一科, 本來算鬆一口氣, 但偏偏細佬要開始考試, 我啱啱攪掂哥哥考試, 又輪到督細佬温習. 哥哥考完試日日無所事事只顧住玩, 細佬當然就俾distracted, 放學返到屋企就跟着哥哥玩和睇電視, 要我放工返到屋企先嚟温習. 於是放工後和週末就要開turbo陪温書, 又要自己攪掂屋企所有嘢, 攰到無命.

2. 終於捱到細佬考完試, 又輪到公司有嘢要趕.

3. 趕完公司嘢, Daddy 返到嚟, 兩日後我就同妹妹去首爾玩. 呢兩日間要同裝修公司傾掂裝修項目 (囝囝們的房要油漆和裝入牆櫃), 又係趕趕趕.

4. 去完首爾, 返到新加坡要趕住做公司的年度工作表現評估, 至憎至憎做的. 不過慶幸今年公司份form 簡化咗, 寫少好多.

5. 之後就輪到奶奶的工人姐姐放假返鄉下五個星期, 我家姐姐要過去幫手, 於是囝囝們也要跟着過去奶奶家住, 我就日日要兩邊走. 同時我屋企裝修開始, 要清晒兩個房的物品, 拆和丟咗原先的櫃. 依家裝修攪掂了, 但之前搬出嚟啲嘢仍然一袋袋一箱箱喺廳, 屋企一片混亂.  裝修時地下一定污糟, 我日日返到屋企就要清潔, 洗衫等做到無停手. 星期日晚做都到十點半先停手咋.

多謝你哋咁有耐性睇到呢度.

首爾遊記我會盡快出, 唔會等一年的.

Daddy去了美國時, 我完全體驗到單親媽媽的辛酸.  星期日姐姐放假時, 三母子就食簡簡單單的家常便飯.

油菜, 皮蛋豆腐, 韓式炒豬肉(pork bulgogi) 和用清雞湯加廚餘滾的金菇豆腐湯.

2015年12月Bali Club Med (4)

2015.12.09

朝早食完早餐, 經過泳池邊見到這情景, 當時仍未有人游水的, 相信是某國人用嚟當晾衫架, 順便通宵霸位吧, 真丟架.

呢日我和Daddy玩得最多的一日, 將囝囝們放低喺kids club 和junior club 後, 我們就去了海邊報到學玩風帆. (要之前一日或大清早去先book 時間)  GO先在岸上教我們基本動作, 之後就輪流落水玩啦.  Daddy 運動從來都比我勁, 但今次我終於有一樣叻過佢啦!!!!  我全程無跌落水, 順利玩一圈回到岸上, 反而Daddy跌咗好多次呀, 可能我人矮重心低所以無咁易跌.  啲水清到見底架!

太好玩了, 玩完一個session即刻又book 多個下晝的來玩多次.

2015年12月Bali Club Med (3)

2015.12.08

等咗成年先寫呢篇, 好多嘢都唔多記得了, 不過都快手寫埋留個記念啦.

之前一篇都講咗嘢食麻麻, 呢朝食第一餐早餐, 真係唔知揀邊樣好.

好多時去旅行我都偏向揀日, 韓式的, 今次都一樣, 不過啲嘢食好唔掂.

2015年12月Bali Club Med (2)

2015.12.07

到埗check in 後就先去食午餐. 因為已過了主餐廳Agung 的用餐時段, 所以要去另一間近海灘的The Deck食. The Deck 是間有侍應服務的餐廳, 餐牌上有前菜, 主菜, 甜品, 每樣有幾款選擇. 全日都可以去食, 但晚餐就要先訂位. 雖說全日可以嚟食, 但如果下午茶時段想嚟, 個餐牌都係一樣, 無小食提供的, 無理由下午茶都食個炒飯或者大大個漢堡吧. 

吞拿魚他他

2015年12月Bali Club Med (1)

每次去完旅行, 我都會好想即刻寫blog分享, 想趁仍然記得時寫低, 以後可以再回味.

上年年尾的Bali Club Med之旅, 我卻沒甚動力去寫, 因為真係幾失望. 不過, 始終都去過, 都係有開心好玩的時候, 都係寫寫來做記念, 亦都給你們作參考.

全程最正就係沒下過雨, 藍天碧海, 好靚!

上次去Bintan Club Med坐船就到, 今次要坐飛機.  訂房時安排了Club Med 來接機. 過了海關拿了行李後, 就見到大堂, 但有欄杆隔住, 不過就見到好多來接機的人.  我們到處張望去找Club Med 職員, 找了很久才找到, 他示意我們在外面等. 跟着人群向前走, 才發現原來還要經過免稅店才能出外, 我還了第一次去過機場要逼人去行免稅店.  由免稅店出來後, 又要再重新揾Club Med 職員, 好煩. 去Bintan就方便得多, 碼頭就有Club Med office, 唔駛揾.

揾到Club Med 職員後, 又要再繼續等另一個家庭, 等來等去, 機場又無冷氣, 大家都有點不耐煩.  最後全部人到齊就行去坐專屬巴士.  車程好像是20還是30分鐘. 去到後就有三, 四個GO 來迎接.  Welcome的過程感覺和Bintan 差好遠, 很冷清.

我們的是interconnecting rooms, 一間有大床, 另一間兩張單人床, 房間是很典型的印尼木材風格.

好大的衣櫃, 裏面有保險箱. 門口旁還有一張小床, 不知道用來做什麽, 我們用來放袋和雜物.

我們一入房打開保險箱就見到有一個信封, 裏面有一叠Krisflyer 的禮卷, 總值幾百星元, 應該是上手住客不小心留下的. 雖然禮卷上印了名, 但似乎用的時候不用身份證明的.  我們本來想拿去reception, 叫他們還給上手住客.  但又怕他們會自己拿去用, 最尾決定帶回新加坡再郵寄去Krisflyer office, 叫他們還給物主, 希望最後有物歸原主啦.

涼拌珊瑚藻, 珊瑚藻紅棗糖水

我返嚟喇!

今年因為哥哥的升中試, 我日日都要督住佢温書做功課, 所以無時間亦無心機去寫blog. 今個星期終於考完, 我和Daddy都可以鬆一口氣.

不過, Daddy在哥哥考最後一科的淩晨就飛去美國公幹, 今次去一個月!!!  雖然哥哥考完, 但小二的細佬還未開始考呀, 所以我要都十月尾先可以真真正正放鬆.

幾個月前去廣祥泰買伊麵時, 發現有珊瑚藻賣. 我從來未見過未食過珊瑚藻, 只在網上見過, 就買一包來試.

打開包裝時有陣難聞氣味, 不過浸水後就沒有了.  有人叫珊瑚藻做海燕窩, 據說好有營養, 有豐富骨膠原, 但寒涼, 寒底人不宜多吃.

泡浸方法網上有好多資料, 唔詳細講了, 但切記唔可以用熱水浸, 會溶.

第一次整做最簡單的涼拌, 加了青瓜絲, 紅蘿蔔絲和車厘茄, 汁就用鎮江醋, 白醋, 生抽, 鹽, 糖和麻油混合的, 沒一定份量, 按個人口味調較.  撒些炒香白芝麻會更香, 但囝囝們唔鐘意芝麻, 所以無加. 雪凍食, 好清爽, 幾好味.  珊瑚藻本身無味, 一定要靠個醬汁先有味. 這盆時是詩班聚餐時帶去的, 很快被掃光.

浸完的珊瑚藻粗的部份仍然覺得有點硬, 於是只剪了軟的部份做涼拌, 硬點的就留來煮糖水.  基本上珊瑚藻遇熱會溶, 所以凍水落, 水滾加糖就可以熄火了, 所以紅棗我切成片, 可以快點出味.  這糖水口感真的很似燕窩, 唔怪得叫佢做海燕窩.

韓國牛骨年糕湯

以前去韓國時, 跟旅遊書在明洞試了神仙雪濃湯.  名字好神奇啊, 其實不過是牛骨湯. 可能我叫了百歲雪濃湯, 即有人參和紅棗的, 藥材味令湯頭味道和人參雞差不多, 所以當時對這牛骨湯沒甚麽特別感覺. 

但最近翻睇(睇過好幾時)Maanghi的牛骨湯video, 又令我想再試那牛骨湯的味道. 於是去凍肉舖買了1 kg 的牛骨加上兩條牛腱來煲. 第一餐煮了韓國餐, 有牛骨湯, 海鮮煎餅和豬腩肉bulgogi. 趕着開飯, 沒好好影相.

一大煲牛骨湯一餐用不完, 留了下來再加半公斤牛肉再翻煲, 煲好後的牛肉一半切片加入湯裏, 另一半手撕做醃牛肉.  湯裏再加上韓國年糕和大白菜, 就成了韓國牛骨年糕湯午餐了. 好好好好味, 好滿足的一餐.

天津(2): 衛鼎軒, 遊船河

26.05.2016

朝早八點會議正式開始, 於是七點半去食早餐, 即係六點幾要起身, 勁眼瞓.

雖然是五星級酒店, 早餐自助式的, 但不知是否我本身太攰無胃口, 總覺得無樣啱胃口.

午餐也是自助餐, 菜式和新加坡平常的到會食物差不多, 而且兩日都是一模一樣的菜式, 有些更明顯是早餐食剩的.

天津(1): 狗不理

上星期去了天津開會, 因為新加坡沒直航往返天津(廉航Scoot有直飛, 但唔係每日有), 要坐國泰去香港再轉港龍(其實是Air China 機).  上午6.45班機, 所以四點要起身, 攰爆.

好彩班機overbooked, 我幸運地被upgrade去商務位. 不過呢班機是舊機, 商務位實際上較似premium economy. 早餐先上水果盆和麵包, 麵包好味. 之後可以揀yogurt 或粟米片, 主菜就有奄列或粥. 我揀粥, 好杰撻撻, 我最憎食咁杰的粥.

蟲草花茶樹菇湯

某日正在煩惱要煲咩湯, 剛好去對面超市買嘢時, 見到有茶樹菇賣, 就煲茶樹菇湯啦.

上網見人加蟲草花粟米一齊煲, 我照跟, 於是就煲了煲好清甜的蟲草花茶樹菇粟米紅蘿蔔湯.

網上都是煲排骨或豬肉, 但我那晚還炆了牛筋腩, 不想一餐食太多肉, 於是用雞殼來煲.  還加了南北杏, 蜜棗和薑來煲, 湯真的好甜好好味.

不過, 茶樹菇煲了兩個鐘仍然有點硬, 煲前浸了十分鐘左右.  係咪應該到浸耐點才煲呢?

今個星期好忙好攰, 偏頭痛又發作.  因為Daddy又出trip了, 我一個對兩隻馬騮, 還要接送去補習, 要睇功課, 要買餸, 我完全沒時間做自己嘢.

豬肉雞脾菇串燒

兩個星期前食過日本串燒後, 囝囝們一直說想再食.

出街食一碟五串就要幾乎二十大洋(坡紙), 不如試試自己煮.

用火鍋豬肉片卷着切成粗條的雞脾菇, 用牙籤串起(家裏沒竹籤), 兩個一串, 用鑊煎至兩面金黃, 再加入照燒汁, 煮至收汁, 攪掂.

囝囝們大讚好味, 拍得住外面食喎.

真心講, 其實和外面賣的不一樣, 因為汁料不同, 我今次只是隨手倒一點現成照燒汁, 加點味霖和糖, 稍嫌鹹了點, 下次要認真點去煮個汁. 當然煎和炭火燒亦有一定距離.

以為不夠雞脾菇, 所以也切了一包金針菇, 結果雞脾菇都有剩丁點, 金針菇原封不動, 但開了切了不好再收, 於是用來煮韓國大醬湯.

這大醬湯湯底用了蝦殼和魚乾仔來煮, 湯料就有翠肉瓜, 蒜苗, 洋蔥, 薯仔, 蝦和豆腐, 好豐富哩.

十五分鐘煮好的午餐盒

我公司位處山旮旯, 方圓幾里都沒人煙的.  要揾食就只能到公司canteen, 就算食物差都無辦法.

當然可以自己帶飯, 不過每日放完工要督住小朋友做功課温習, 已經不想入廚房去預備第二日午餐. 點解唔帶隔夜餸呢? 因為姐姐煮的我真的唔想第二日再食.

最近我部門來了個新韓國女仔, 英文好差, 幾乎無法用言語溝通, 只能通過文字(email, whatsapp 等)傳逹意思. 她剛來時, 我的lunch gang (平時一齊食飯的同事)為表友好, 午餐時都叫她一齊食. 但幾餐飯後, 我們開始覺得難頂, 因為實在無法溝通 (文化, 習慣和語言), 每次食飯時大家傾計都要就住就住, 怕她聽不明白, 又怕冷落了她.

這幾日lunch gang 中的一個女同事去香港旅行, 另外的又不一定在office, 為免只有我和韓國女同事一齊食飯而相對無言, 我唯有逼自己帶飯.

廚櫃裏有一樽買了很久的pesto sauce, 老少爺們都不肯食加了pesto的食物, 於是就用來整pasta with pesto sauce 做午餐啦.

由煮pasta至入盒, 十五分鐘攪掂, 快靚正呀!

Pasta with mixed veg and pesto sauce

1. 煲滾水, 加鹽, 然後加入pasta煮至剛熟, 中途將蝦加入, 見蝦轉色後先撈起, 剝殼切粒. \
2. 煮pasta 時, 將雜菜切粒, 車厘茄切半.
3. 開鑊, 加少少油, 落青瓜和黃椒炒幾下, 加少許鹽, 然後加入車厘茄兜勻.
4. 將煮熟pasta倒入食物盒內, 加入炒好雜菜和蝦, 加些少橄欖油, 陳醋(balsamic vinegar), 鹽, 最後加適量pesto sauce, 撈勻即可.

註: 我這次用了青瓜和黃椒(雪櫃有乜用乜), 其實不用炒也可以, 不過我覺稍微炒一炒更香.  車厘茄稍加熱蕃茄味更出.  可以不加肉類, 我剛好那餐晚餐煮蝦仁炒蛋, 就偷了兩隻來用. 另一餐夜晚食剩白切雞, 於是就起出點胸肉切粒來加入, 都好好味的.

四寶河

冰箱裏還有兩包上次朋友由香港幫我帶回來的魚皮餃, 於是星期六就煮了四寶河做午餐.

兩個囝囝都不愛食湯麵, 所以我邊煮他們邊投訴.  不過抗議無效, 因為我真的好想食四寶河.

以前我每次回港都會嚷着要食雲吞麵, 爸爸都會帶我去西洋菜街(近花園街)的一間粉麵店食. 本來要食雲吞麵, 但我最後都會點四寶河, 然後"偷食"爸爸媽媽的雲吞麵. 自從爸爸回天家後, 我就沒再食過四寶河, 而那家麵店好像已經結業了.


所以四寶河除了好味外, 對我來說還有更深的一層意義.

湯底用江魚仔來淆, 還學麵舖用湯匙裝了冬菜和蔥花.  本來的四寶變成五寶, 因為哥哥不喜歡食魚蛋, 所以要加牛丸.  可惜那天買不到新鮮河粉, 用了乾河粉, 質感似米粉多點.

輕鬆星期六- 十年, 日式串燒

星期六全日最期待就是入戲院睇十年.

本來只有兩場, 但因為開賣半個鐘內所以飛被掃光, 所以主辦單位最後加多兩場, 不過聽講都一樣被秒殺.

好彩朋友眼明手快開賣後即訂飛才有得睇, 雖然都要坐第三行.

劇評我不會寫了, 只可以講絶對值得睇, 五個單元, 每個都有特色, 有些較輕鬆好笑, 但笑的背後其實好唏嘘 . 當中自焚者最震撼, 亦係我最鐘意的, 拍攝剪接都好好, 拍得好大膽, 怪不得大陸要禁. 好佩服這部戲的監製和導演們的勇氣和膽量.

完場後有個短暫的交流會, 有監製和其中兩位導演出席. 

餵人奶

這篇不適合男人, 請跳過.

最近在網上見到好多關於餵人奶的討論, 才知道原來在香港餵人奶是一件好困難的事.

當年我都有餵人奶, 大仔餵到六個月, 細仔就餵到七個幾月.

其實餵人奶是自然不過的事, 不明白為何會香港會有人歧視餵奶.

在餐廳內餵奶有問題嗎?

在街上餵奶有問題嗎?

你也不是在餐廳內用餐, BB 食奶為何不可?

你在街邊食臭豆腐, 煎釀三寶, 和BB在街上食奶又有什麽不同?

慶幸我人在新加坡, 這裏很鼓勵媽媽餵人奶的.  每個商場都有育嬰室, 有些公司(包括我的)也有集乳室, 上班時間可以泵奶.

當年我餵人奶時, 公司還未有集乳室, 但老板讓我用其中一間空房, 幾時用, 一日用幾次用幾耐亦從不過問.

雖然外面商場有育嬰室, 但有時候人多或我懶得找時也會邊行邊餵或找張櫈坐低餵.

在店內邊睇衫邊餵, 怎樣做得到?  哈, 全靠一件餵奶衫和揹帶.  餵奶衫在胸下邊旁邊會有個開口, 拉開就可以餵了.  BB latch on 後將開口拉下, 剛好可以遮到BB嘴仔和乳頭, 不仔細看的以為只是抱着BB.  手抱着會好攰, 所以加上一條斜揹帶就perfect 了.  我用的是sling, 像印尼人用來揹BB 的那種, 非常好用, BB可以躺下, 位置剛好是吃奶的.  BB latch on 後, 基本上就可以鬆手,  完全靠揹帶不用用手托着, 兩隻手一隻可以拎手袋, 另一隻就可以shopping了.

餵奶衫是這樣的

(Image from http://maternity-clothes-mytummy.com.au/)

揹帶 (baby sling)

(image from http://www.naturessway.co.nz/shop/Baby+Carriers.html)

我不喜歡用餵奶巾, 因為覺得BB被蓋住會好熱好焗, 尤其這邊天氣熱. 用餵奶衫BB就舒服好多, 只是BB埋身時可能要稍為用手巾遮遮, 

天婦羅蕎麥冷麵

不知何故, 囝囝們超愛食冷麵. 去日本餐廳一定要叫冷麵, 在家裏也整天嚷着要食.

平日午餐他們要食冷麵, 姐姐就最開心. 冷麵加上煎鯖魚或三文魚, 簡單快趣又一餐,

星期六要預備午餐時, 發現櫃內有包不記得幾時買的天婦羅粉, 要過期了, 還是快點把它消滅.

冰箱有盒多春魚, 就整多春魚天婦羅, 另外還炸了些南瓜和翠肉瓜, 每樣一些炸起來已經好多, 這裏只是其中一少部份.  第一次炸天婦羅, 都算合格吧, 至少炸得乾爽不會油淋淋.

蕎麥冷麵, 汁是自己用柴魚(鰹魚)昆布煮的. 這碟是哥哥的, 他不吃蔥所以汁裏沒加蔥.

自己在家煮這種定食真的很划算, 比到外面食經濟得多.

芒果腸粉

來了新加坡廿幾年, 對香港近年的食物真的無甚概念, 都是從internet看到相片, 但自己其實都未食過.

芒果腸粉好像是幾年前才有吧, 我未食過, 只見過相.

最近無意間在網上見到有食譜, 剛好又買了芒果, 就跟着做了.

似樣嗎?

用蒟蒻粉整的腸粉皮是好滑好滑的, 要將芒果捲起有相當難度, 食時亦都有點難,我們最後索性用手食. 我家沒有個食譜中一樣大細的長形盆, 於是隨意倒在兩個不用大細的盆內, 一半太厚了,一半則好像剛好. 原食譜還加上綠色燕菜粒扮蔥花, 我懶得整, 所以變成走青版腸粉.

老少爺們都讚好味, 只是嫌太滑有點難攪. 

新加坡華語電影節

來了新加坡廿幾年, 從來未注意過新加坡華語電影節.

但今年不一樣, 我一早就虎視眈眈, 因為有"十年"呀!

還要原汁原味播廣東話呢!  

這裏播的港產片一向都要配國語才能播, 不知道是不是因為是電影節關係而破例呢?

戲票今朝開售, 朋友一早說好又買飛一齊睇.  

今朝11點當我還在問Daddy要不要一起去時, 朋友發現第一場已經爆滿. 

他匆匆地訂了第二場的飛, 也不理座位位置差了. 

之後我立即去戲院網站睇睇, 居然只剩第一行位, 然後幾分鐘後就全滿, 好誇張呀!

在香港一票難求, 在這裏也是秒殺呢!

看看主辦單位會不會加場.

久休復出

好耐無搓包了, 都忘了對上一次自製麵包是幾時了, 至少一年吧.

沒有自製包包做早餐的日子, 只好到公司樓下canteen食, 但最近canteen 食物每況愈下, 實在忍無可忍, 要出手搓包.

我最鐘意的裸麥包, 簡單易整, 雖然是齋包, 但有裸麥香, 個人覺得好好味, 連細佬都鐘意.

哥哥不肯食齋包的, 所以整了腸仔包, 用了牛奶餐包的食譜, 甜甜的帶牛奶香.

可能太耐無整包, 明明剛剛食完飯, 麵包一出爐老少爺們都一人搶了一個來食.  剩下的就不夠之後一個星期的早餐了. 我都想整多幾盆, 但冰箱長年爆滿. 你們自己看, 這個冰隔是專門用來放早餐食品的, 上面兩底包放入去剛好塞滿, 再多就沒位放了.

一鴨四食

受難節時陪奶奶飲茶, 叫了一隻片皮鴨. 因為還有其他點心和菜式, 所以在酒樓只食了片出來的皮, 然後原隻打包回家.

因為酒樓真的只片了皮, 打包回家的根本就是原隻沒皮的燒鴨. 當日晚餐就將脾, 翼和一半的胸肉切出來食, 已經幾大碟. 啖啖肉, 囝囝們食得津津有味.

受難節陪奶奶飲茶

受難節朝早去完教會後就和奶奶去NUSS的秀才飲茶.

奶奶最鐘意去這間酒樓飲茶, 因為較靜, 坐得舒服, 最重要她上落車容易又近屋企.

流沙包好好味.

第一次煲素湯

常常見到EE, Samwei 和雀后煲素湯, 清清哋好吸引, 但始終都未試過.

終於為了一包乾雜菌, 我獻出了我的第一次 - 煲素湯.

這煲素湯用了一包乾雜菌, 蜜棗, 紅蘿蔔, 眉豆和薑片來煲, 煲好加少少鹽調味, 好清甜好好味.  雜菌煲完後仍然爽口, 還吸了蜜棗和紅蘿蔔的甜味, 只食雜菌我已經送完整碗飯.

那包乾雜菌是我前陣子去買乾貨時見到的, 好奇拿起來看, 旁邊有位女士見到就非常熱心地向我推介, 說用來煲湯好好味. 好吧, 買包來試, 連價錢都沒問就買了, 所以到現在我也不知道花了幾錢來買它.

一打開包裝就已經好香,我認得的就有猴頭菇, 雞脾菇,茶樹菇和草菇, 你們知道其他是什麽菇嗎?

下次再買到的話, 我想試試用來炆肉,應該會好好味的.

年假

昨日講到公司請人, 順帶和你們分享一下這邊的年假.

因為新加坡有不同種族的人, 華人, 馬來人, 印度人和歐亞混血, 所以公眾假期要顧及每個種族的人.  亦因為這原因, 華人的傳統節日就只有農曆新年的兩日假期, 其餘中秋節, 清明, 重陽, 端午等都沒假放的.

新加坡公眾假期一年有11日:
1. 新年
2. 農曆年初一
3. 農曆年初二
4. 受難節
5. 勞動節Labour day
6. Vesak Day (應該相等於佛誕吧)
7. Hari Raya Puasa (馬來人開齋節)
8. 國慶日
9. Hari Raya Haji (馬來人的節日)
10. Deepavali (Diwali or Festival of Lights, 印度興都教節日)
11. 聖誕節

基本上每個種族的人有兩日傳統節日假期, 都好公平, 不過一年只有十一日和香港比真的少好多.

好彩, 除了公眾假期, 有公司年假補上. 我公司因為算是半政府機構, 所以有多點鼓勵國人有work life balance的假期.


公司年假  25日
照顧小童假(childcare leave)  2 日
照顧父母假(parent care leave) 2 日
生日假  1 日

所以今年我有30日公司假, 另外如果囝囝們生病, 我也可以出示他們的醫生紙來請假, 兒女病假(childcare sick leave)總共8日.

Childcare leave 和parent care leave我覺得非常好, 囝囝考試時可以請假陪讀, 他們要見家長或學校有活動也可以請假去參加.  有年邁父母的, parent care leave 就可以用來陪睇醫生之類.

Childcare leave 的日數是決定於小朋友的歲數的, 只要有一個或以上七歲或以下小朋友, 每年就有六日.  今年以前我都有六日childcare leave 的, 但細佬今年八歲了, 就一下子減至兩日.

兒女病假亦不是固定的, 總之childcare leave 和childcare sick leave 的總數不能多於十日 (兩個小朋友的話), 所以上年我有6日childcare leave + 4日childcare sick leave, 今年則是2+8 了.

越南豬扒飯

小時候爸爸媽媽很少帶我們出外用餐, 所以越南食品只是我讀預科(只讀了一個月就來了新加坡)時午餐同學帶我去才第一次食. 之後暑假返香港做暑期工時亦有同事帶過我去中環的一些大牌檔(不記得街名了)食過, 印象中只記得越南札肉加煎蛋碟頭飯, 當時覺得好好味.

越南札肉這邊沒見過有得賣, 唯有煮越南豬扒解饞.  懶得煎蛋, 水煮蛋就算了. 家裏也沒生菜, 只有蕃茄, 將就點吧.  配上魚湯底紹菜蟹味菇湯, 就是方便的碟頭晚餐了.

越南豬扒我是跟這個video整的, 我的豬扒較細和較薄, 我已經縮短了焗的時間, 但仍然有點乾, 下次要再調較一下.  不過, 跟着這食譜的調味, 豬扒好香好好味的. 加上煎蛋會更好味啦, 下次還是不要太懶.

最近我部門要請人, 有兩個空缺. HR寄來一堆CV, 我們選了幾個, 叫HR安排星期五interview.  昨天收到HR的email, 真的O嘴了.

現在要請人真的很難.  星期五應該一個也不用見了.

舊衣變身

上星期是這裏學校的term break, 有一個星期假.  囝囝們放假我就最開心, 不用每日放工回家陪温書做功課, 輕鬆好多.

星期六朝早七點廿分, 全屋人都仍在夢中, Daddy的手機突然響起.  然後Daddy即刻彈起, "Oh no!".  嚇得我吖, 原來哥哥那天有校際scrabble比賽, 要七點三回校報到.

這種特別活動都是Daddy來負責的, 所以我跟本沒在意.  Daddy居然完全忘記了, 好彩學校打他的電話而不是我的, 因為我每晚都熄手機的.  於是三扒兩撥叫醒囝囝, 擦牙洗面換校服, 早餐就打包在車上食.  Daddy直接送囝囝到比賽場地, 剛好趕得切.

下晝Daddy帶細佬去學琴, 之後去接哥哥再去打golf.  於是我就有一個下晝獨處的時間.

哈哈, 難得的自己時間, 要好好利用. 先去搓包, 待麵團發酵時就把衣車抬出來車衫.

前一晚翻衣櫃, 見到這條以前在網上買, 但只着了一次的裙.  這條裙的吊帶是背外交叉的, 但吊帶本身縫得不好, 我自己修改過, 仍然無法令上身貼服.  而且有點露背, 要特別着nude bra才可以, 太麻煩了.  本來打算丟掉, 後來想不如把它改成半截裙, 不要浪費嘛.

潮式蒸魚

還有一篇十二月的遊記還未寫, 但寫遊記好花時間, 還是先寫簡單的住家飯.

同事問家裏晚餐是不是我煮, 答案是星期二至五由姐姐負責, 週末和星期一就由我煮.

同事聽到有點驚訝, 可能覺得既然有姐姐煮, 為什麽還要自己動手. 

理由好簡單, 因為每日食姐姐煮的真的會受不了.  一個星期的菜單幾乎是重覆又重覆.

所以週末我都會盡量入廚, 順便教教姐姐.

其實煮飯不難, 簡簡單單也可以好好味的, 也可以很快煮好的.

就像上星期日姐姐放假, 之前幾日食肉多了, 於是就食清一點的蒸魚.  懶得煮多幾味, 所以用潮式蒸, 加豆腐, 蕃茄, 冬菇, 鹹酸菜和鹹水梅來蒸, 蒸完加少許麻油即可, 連灒油都慳番, 少了油煙. 鹹酸菜和鹹水梅都帶鹹味, 所以蒸魚的湯汁已經夠味, 完全不用加其他調味料.

Daddy愛喝湯, 所以如果我下廚的話, 一定會煮湯.  今次就滾紹菜湯, 湯底用江魚仔來淆, 還加了魚皮餃.  魚皮餃是托朋友從香港帶回來的, 特別好味, 這邊買不到的.  這裏的魚皮餃根本就只是魚蛋, 和香港的是兩回事呢.

兩個小情人

妹妹一家初六半夜機回港, 踫巧Daddy也坐半夜機去美國公幹, 我可以一次過送他們全部去機場.

初七是人日也是情人節, Daddy 不在, 只有兩個小情人陪我過.

從教會回家後, 陪他們温習做功課. 情人節只留在家有點不甘心, 於是下午茶時間帶他們到家附近的Daily Scoop食雪糕. 

我的waffles 配salted caramel 雪糕, 好肥呀, 情人節就放縱一下吧.

只有我們三母子, 晚餐就懶得煮了, 搓點麵團和囝囝們整pizza.  他們有得玩有得食就最開心, 我也可以省功夫.

 沒有特別去買材料, 家裏有什麽就用什麽. 細佬用材料砌了一張笑臉, 好得意哩. 當然之後有撒上芝士才入爐, 不過成品就不放出來了 (普通pizza樣子啦).

三妹一家新加坡狂食狂玩之旅

每次一停寫blog幾日就會失去寫blog的動力, 怎樣才可以勤力點呢?

農曆新年時三妹一家來了新加坡玩, 真的好開心.  三妹夫一向很抗拒來新加坡, 總覺得這裏很悶.

今次肯來是因為姨甥女的同學的家長們組團來新馬玩, 所以才跟大隊過來.   他們的朋友住酒店, 三妹一家就來我家住, 省了一大筆酒店錢.

初三上晝到, 放下行李食完午餐就去科學館玩.  姨甥們去任何國家都要去科學館玩的.

新加坡科學館絶對值得去, 展品常常更新, 有得睇有得玩.  剛發現原來平日去, 新加坡公民和永久居民可以免費入場哩.  姨甥們玩了一整個下午, 若不是要關門了, 還不想離開.

芒果忌廉蛋糕

每次整生日蛋糕的後遺症就係要想辦法用完一盒1L的淡忌廉.

兩條彩繪蛋糕只用了不到400g淡忌廉, 還有半盒以上的淡忌廉要消滅.

最好消滅忌廉的方法莫過於忌廉蛋糕, 順便可以練習抆cream (一年練一次咁大把).

星期六焗了個好靚的海綿蛋糕, 打算星期日晚抆cream.  在新加坡整忌廉蛋糕一定要等夜晚太陽落山以後, 因為日間太熱, 未整好忌廉已經溶.

星期日晚食完晚飯後, 完全忘記要抆cream, 還坐在梳化上悠閒地睇書.  到八點幾才突然記得要處理那盒cream. 

快手快腳切芒果, 打忌廉, 抆cream.  本來雄心壯志玩擠花, 但抆完蛋糕後發覺忌廉已變軟, 草草用菊花嘴擠花再放士多啤梨上去當裝飾就算.  只用淡忌廉感覺忌廉不夠稳定, 加點甜忌廉入淡忌廉來一起打會較好, 忌廉吃起來亦較輕盈.  不過, 這蛋糕純粹是為消滅盒淡忌廉才整的, 無理由又買多盒甜忌廉嘛.

 囝囝們超愛吃, 但我一口都沒試, 想到那麽多忌廉就怕怕了.