Thursday, 22 December 2016

兩姊妹首爾行Day 1 (人蔘雞, 生蠔菜包肉)

每年最期待就是年尾和兩個妹妹一齊去旅行.  可惜二妹沒空, 只有我和三妹兩個去首爾玩.

上年去日本九州因為三姊妹都未去過, 所以觀光為主, 還要換幾次酒店, 朝早要趕火車等, 都幾辛苦.

我和三妹都去過首爾, 所以今次主要去飲飲食食, 只包括了幾個之前未去過的景點.

安排行程時, 三妹一直說要食呢樣, 要食嗰樣, 邊個邊個朋友話邊間邊間好食. 於是我就盡量將所有要食的編入行程.  真的太多嘢想食, 編到入宵夜. 下面就係原來的行程. 我都預咗無可能跟到, 我同三妹講應該食到第三日就已經好漏食唔落. 結果, 係到咗第二日我細妹已經舉白旗.



回帶到11月13號, 星期日.  我特登坐下晝機返香港, 可以參加完崇拜才離開.  五點幾到香港, 妹妹妹夫來接機.  返到屋企, 媽咪已經煮好晚餐了, 有温暖住家飯食, 好幸福呢.  簡單的家常菜式, 但味道一流呀.


沖個涼, 執執行李, 十一點幾又去機場了.  我們坐韓亞淩晨一點半的飛機.  以為可以瞓少少, 原來機程比由新加坡飛香港更短, 只小睡了一粒鐘就要起身. 朝早六點幾到仁川機場, 先去攞在網上預訶的wifi egg, 然後再慢慢去坐機場巴士去酒店.

今次住Hotel PJ Myeongdong, 雖然酒店名有明洞兩個字, 但實際上並不在明洞, 地點不在大街上, 但由機場巴士站行去也只不過五分鐘左右, 附近有三個地鐡站, 所以都算好方便.  酒店以後才介紹.

6015 和6001都能到酒店, 剛好6001先到, 於是就坐6001. 但這是錯誤的選擇, 因為6015較多遊客坐, 每個站都會有人上落車, 車上廣播亦好清楚.  但6001少人坐, 司機會飛站, 車上廣播和所到車站唔同, 過咗忠武路站廣播才播出站名, 所以我哋就過咗站嘞. 同司機講, 佢叫我哋落車行返轉頭(都幾遠下).  差啲要拎行李時, 佢又改變主意叫我哋上車.  其實6015 同6001都係會喺明洞地區loop一圈的.  忠武路站就係loop前的一個站, 所以巴士回程去機場時會返到同一個站的對面車站.

好事多磨, 有個乘客落車時漏低手機, 之後打電話去巴士公司問, 巴士公司再打俾個司機問.  其實我哋過咗站時落車再上番車時, 我見到第一排座位有部電話, 都覺得奇怪.  我當時坐第三排, 第二排有對鬼鬼男女(皮膚較深色, 估計南美洲地區來的), 應該係留學生, 會聽和講少少韓文. 司機忙住揾手機時, 呢對男女就急急腳落車走人.  我好懷疑部手機係佢哋兩個拎咗的.  不過, 一來無證據, 二來我同司機雞同鴨講, 所以我都無出聲. 因為咁, 拖咗幾耐先再開車.  跟住司機就勁失魂, 到咗忠武路站又再忘記停車, 好彩我認得地方, 即刻叫住佢, 如果唔係都唔知又去咗邊.  所以本來70分鐘車程, 我哋坐咗幾乎兩個鐘, 去到酒店都成十一點.

放低行李就出門去景福宫, 因為都成十一點幾, 索性唔食早餐, 直接去土俗村蔘雞湯食午餐. 細妹第一次來食, 我已經食第三次了.


我每次都食蔘雞湯, 但其實我最鐘意係佢啲泡菜同蘿蔔.  唔知係咪因為第三次食有啲厭, 或者真係水準跌, 覺得無以前咁好味.


妹妹的烏雞蔘雞湯.  我見到黑色唔敢食.

原本係要行景福宫和民俗博物館, 然後去三清洞, 仁寺洞等順路再返酒店.  但當日一直落雨, 唔想擔住遮周圍行, 於是跳過這些景點, 去Lotte Mart 買嘢.

本來仲有個backup plan, 係去故宫博物館行下坐下.  但原來嗰度逢星期一休館, 想入去歇下腳嘆下都唔得.

點解第一日就去Lotte Mart 呢?  以前一向都排到最後臨飛前先去, 將買咗啲嘢pack 入紙箱check in上機就得.  但今次發現韓國啲航空公司(大韓同韓亞)行李係件計唔係計重量, 每人只可以check in 一件23kg以下的行李, 就算兩件行李加埋少於23kg, 都會收你額外行李費.  所以要去韓國的朋友要注意啊!  就因為咁, 我哋就早啲去買嘢, 以確保夠行李位搬返嚟.


去完Lotte Mart就返酒店check in, 休息一會又出發去食晚餐.

呢餐我未出發前已經好期待的, 就是去鐘路三街的生蠔菜肉包街食生蠔菜包肉了. 這條生蠔菜肉包胡同(韓巢地圖上的譯名)其實只是一條小巷, 但小巷裏開了8間賣同樣食物的店, 一到夜晚就好熱鬧.

地方好易揾, 1號線鐘路3街站15號出口, 直行第一條巷口(旁邊有間藥房)左轉, 生蠔菜肉包胡同就喺右手邊, 好窄的一條巷, 但夜晚燈火通明, 一定揾到.


這個blog有好詳細介紹, 你哋可以去參考下.

網上睇到似乎每一間店都有各自捧場客, 最後我哋揀咗將軍菜包肉.  招牌無中文的, 但只要認住장군굴보쌈就無問題.


呢度係非常地道韓國人來食的舖頭, 所以菜牌全韓文(掛在牆上的).  唔知侍應識唔識中文或英文, 因為我用韓文點菜.  (我係唔識韓文的, 只識拼咅同幾句好簡單的)


不過, 唔識韓文都唔驚, 其實都好簡單.

第一樣굴보쌈就係我要食的生蠔菜包肉了,  굴=生蠔, 보쌈=菜包肉. 價錢旁的就是份量, 估到估到, 소=細, 중=中, 대=大.

第二樣왕족발=漢方豬腳

굴보쌈반 +왕족발반 =生蠔菜包肉半份+ 漢方豬腳半份, 半份即係幾多我就唔知, 睇價錢估應該係大份的.

낙지벆음=炒八爪魚(鱆魚)

감자탕 = 薯仔排骨湯

中間細字係extra (追加?), 其實套餐份量好多, 除非好多人食或好大食, 相信都唔會需要追加任何嘢.

最右邊7000-8000won的是午餐.

登登登登, 生蠔菜包肉就係咁嘞.  我哋叫細份都仲係好多. 啲生蠔好新鮮好正, 三層肉肥瘦相間, 爽口的, 還有泡菜和醃蘿蔔.

套餐附送的薯仔排骨湯, 無加辣椒醬, 但上面有大量黑椒, 驚辣的記得要趁湯未滾時將部份黑椒取出. 

還有碟辣炒魷魚, 只是微辣帶甜的, 還有焦香味, 真係好好好好味!  仲好大碟添. 呢樣韓文係오싱어볶음.



套餐就是這樣, 中間白色一片的是實豆腐, 蒸熱的, 用旁邊的沾醬點又幾好味喎. 旁邊橙橙哋色的是有蝦仔的蝦醬, 用嚟點三層肉食的.

薯仔排骨湯裏有大量菜, 還有紫蘇葉和大大舊的排骨.  雖然三層肉都食唔晒, 但都忍唔住食埋排骨, 因為又香又滑.  成煲湯被我飲晒.


用生菜葉包住三層肉, 生蠔, 泡菜等來吃, 人間美味呀!


呢餐我哋兩個好努力都無辦法食晒, 仲要加埋一支馬格烈酒, 食到飽到上心口.  埋單都只係26,000 won.  我哋到時仲未到晚飯時間, 即刻有位坐.  到我哋食完時, 餐廳已經滿座了, 而且全部係本地人.

食到咁飽, 要做下運動, 所以行路返酒店. 都幾近, 十五分鐘左右就到.  路過大街見到好多大牌檔, 全部都好吸引.


好有特式的大牌檔, 可惜已經食唔落.


途中還行了一少段的清溪川, 不過這段好幽靜, 無咩燈.


返到酒店, 諗諗時間仲早, 不如去明洞逛逛, 坐酒店的免費接駁巴士就去到. 都只係逛逛, 買了少少嘢.

份生蠔菜包肉實在太大份了, 見到美食當前都無辦法試.



14 comments:

  1. 餐飯真係好大堆頭,我諗加多兩個人都夠食喎

    ReplyDelete
    Replies
    1. 我哋餐餐都食唔晒呀, 要多啲人一齊去先掂.

      Delete
  2. 哈哈,咁食法唔滯已經好叻。

    ReplyDelete
    Replies
    1. 第二日已經好滯啦, 不過都係繼續食.

      Delete
  3. 去玩都咁認真,自己寫行程表?我地好隨意,瞓醒先算。

    ReplyDelete
    Replies
    1. 個行程表其實只係個rough guide, 我哋都係瞓醒先決定去邊.

      Delete
  4. 人多好辨事,要多幾個人一起吃就好

    ReplyDelete
    Replies
    1. 真係要多啲人一齊去先食到多啲嘢

      Delete
  5. 我好鍾意食韓國啲生洋蔥

    ReplyDelete
    Replies
    1. 係呢, 唔知點解嗰度啲生洋蔥無辣味又好甜喎.

      Delete
  6. 份量好多呀!!!可能4個人去會食到多D野...
    嘩,你地好犀利!我已經頂唔順坐零晨機然後即刻去玩架喇...去歐美地方冇法,但可以亞洲都好少咁... 雖然真係多左成日,多左好多時間玩,但我頂唔到...

    ReplyDelete
    Replies
    1. 我都好怕坐淩晨機架, 但如果坐日頭機要貴幾百蚊, 一早到又無得check in 咪焗住要去玩囉. 本來我都以為我會頂唔順, 但後尾又OK喎, 有得玩就精神.

      Delete

Related Posts Plugin for WordPress, Blogger...