Monday 28 February 2011

細佬三歲喇!

細佬噚日三歲生日, 佢自己都唔知咩叫生日, 反而屋企人比佢更興奮.

一早起身, Daddy就同佢講Happy Birthday, 佢只係望一望Daddy但就冇反應. 

星期五整的手指餅就是用來整呢個Charlotte Aux Fraises (strawberry charlotte)作為細佬的生日蛋糕. 


Sunday 27 February 2011

蛋糕日

星期五為了逃避公司的週年活動日,我請假一天留在家裏。

人家說賦閒在家,我在家比上班更忙。

清早起來就開始焗蛋糕,邊整邊發覺材料不夠,又下樓去買,總共下樓三次才買齊。

平日在家焗蛋糕最大的好處就是囝囝們都上學了,我可以專心的做。

第一樣烘的是手指餅,猜到用來做甚麼嗎?


第一次整手指餅,原來挺好玩的,食起來有點像雞蛋餅。

之後再焗了一個清蛋糕和一個無麵粉朱古力蛋糕,成品下篇再post.







Thursday 24 February 2011

桂花酒釀湯圓 (附做法)

上年返香港在二記買了一包乾桂花,主要目標是要煮桂花酒釀湯圓。

冬至時就想煮,但囝囝剛好那天病要看醫生,就沒吃湯圓。

元宵那天早上就打算放工食完晚飯就煮來應節,飯後趕着要督促大仔温習就忘了。

終於,上星期六告訴自已一定要煮。

這就是星期六的下午茶,滿滿的一碗,很滿足。


喜歡吃桂花酒釀丸子全因桂花的清香,小小的湯圓用糯米粉加熱水來搓成,吃起來煙煙韌韌,酒釀的味道我不會形容, 但就是喜歡。湯圓吃到一半,糖水就給我喝完,添糖水,再舀一大匙酒釀,我很貪心哩。

酒釀我在裕華買的,才兩塊多,不太甜,不錯。


做法:

1。慢慢將熱水加入糯米粉中,邊加邊用手搓勻成粉糰,搓成一粒粒小小的湯圓。

2。用小鍋煮熱水,加冰糖成糖水 (如酒釀較甜,糖要放少一點)。

3。乾桂花用水略沖洗,加入糖水中,不用開火煮,讓其浸在糖水中片刻便可。

4。用另一小鍋煲水,水滾加入湯圓,湯圓浮起就代表已熟,撈起,加入桂花糖水裏。

5。最後加入酒釀。

註:

1。搓湯圓所需水份量我從來沒量過,憑感覺加入水份量,總之搓好的粉糰應該不黏手,而碗邊都會是乾淨的。

2。酒釀不需要煮,要吃前才加入。

3。湯圓用冷水搓亦可,但用熱水搓會較煙韌。





Wednesday 23 February 2011

回港

前個星期為了爸爸的事返港, 美國的妹妹一家也回, 所以家裏很熱鬧, 可惜來不及跟爸爸影全家福.

無論怎樣, 一家人聚一起還是開心的.

爸爸有三個女一個仔, 三個女兒都嫁到不同地方, 我嫁來了新加坡, 二妹嫁去美國, 只有三妹留在香港.  剛好我們每人生了兩個, 年齡還很接近, 由三歲到七歲, 全部可以一齊玩.  當年我媽媽在六個月內飛三個地方幫我們坐月.

三個星期沒見, 媽媽足足瘦了一圈, 看了很心痛. 


要影一張六個小朋友的相難度極高, 這已是最好的一張.


我和二妹的囝囝都不會廣東話, 所以全部小朋友都用英語溝通, 連我媽媽都要講英文.  我常對媽媽說:好彩你識英文, 如果唔係你啲孫仔全部吱哩咕嚕都唔知點算. 

一家人圍在一齊吃火煱, 很熱鬧, 很開心.  很多年沒在港打邊爐了, 食物款式比這裏的多很多, 肥牛正, 豬頸肉勁爽, 炸魚皮卜卜脆, 生蝦真的生蝦咁跳, 吃得很滿足.


兩隻馬騮玩得很瘋. 他們都屬馬騮, 只差三個月出生.


最小的兩個喜歡一起玩.


一起爬


最大的三個男生也是整天在一起玩, 一起畫畫, 一起搗亂.  幾年前他們還小時, 在一起就會打架爭東西, 現在長大了, 懂得分享就相處融洽.


不知道幾時才會在聚在一起, 三個地方的人要約同一個時間聚在同一個地方真的不容易.

每次返港都要帶些自家出品來孝敬媽媽, 今次就焗了一大罐的腰果酥, 還有兩底蘿蔔糕和芋頭糕.





Monday 21 February 2011

奶奶受浸

令人沮喪的事情都過去了,終於等星期六的大喜事。

奶奶受浸加入教會!  太太太高興了!

為奶奶送上一束鮮花。


奶奶很開心, 一早就到教會預備。


Thursday 17 February 2011

爸爸

爸爸三年前被診斷出患上癌症

一直都堅強樂觀地去面對

經過一連串的治療

終於上個月安息主懷




十二月回港時爸爸身體已經很虚弱

但都沒料到會突然急轉直下

本來約好了在美國的妹妹一齊在農曆新年時回港影全家福

因為大家都知道這可能是爸爸過的最後一次農曆新年

一月頭爸爸入院了, 癌已入骨, 身體製造不了血小板

醫生說我們要有心埋準備

當晚就立刻買機票坐第二日第一班機返港

用最快的時間去到爸爸的病床邊

我仍清楚記得爸爸見到我的那一臉驚喜

他那一刻的笑臉永遠都會留我腦海裏

感恩我只需三個半小時就能回港

那時爸爸還算精神, 仍然可以聊天

第二日情況已經開始差, 連說話的力氣都沒有了

每日守在他床邊, 給他聽孫仔們的歌聲

差不多兩個星期後

他很安詳的離開了




爸爸的留院和後事的安排都見證着神的慈愛和恩典

爸爸多年前已受洗, 但很久沒有返教會

他受洗的那教會好像都已搬了或解散了

回港前我這邊教會的傳道便介紹了一位在港的傳道人給我

再輾轉的找到了一個上年才成立的機構叫"完美句號",

可以為沒有直屬教會的基督徒辦理安息禮拜.

感謝嚴牧師的幫忙

安息禮拜在莊嚴平和的氣氛下完成

未信主的親戚都說一入靈堂感覺詳和而沒有一貫的陰森感覺

牧師的分享亦給我們有很大的鼓勵.

雖然爸爸離去

但我知道爸爸現在去了天家在天父的懷裏

脫離了疾病的折磨

所以安息禮拜時我告訴自已不用哭

可是到最後瞻仰遺容時

牧師說這是最後機會, 蓋棺後就不能再看

想到以後再看不到

淚就不自主的缺堤



爸爸, 我愛你!

多謝你給我們的愛和照顧

多謝你的教導我們方能成才

你永永遠遠都活在我們心中

我們天家再見!



Thursday 10 February 2011

年初二

你哋睇緊呢篇時我已經番咗香港,下星期一返,留言我會遲啲先覆。

年初二的大事就係開年飯,在香港爸爸就會煮好多好多正餸。之前諗煮咩餸時,睇返上年返香港過年啲相,有爸爸煮的食物,有爸爸的笑面,就忍唔住流眼淚。

流完淚就要振作,我要好似爸爸咁煮好食嘅餸嚟開年。

下晝一點左右食五餸一湯的開年飯,因為夜晚仲有節目。


Wednesday 9 February 2011

年初一

年初一兩個囝囝都自己揀了紅色新年衫,同bear bear一齊影相。



今年雖然唔可以去拜年,但都要去奶奶屋企坐吓。囝囝們和嫲嫲,契嫲嫲,契爺爺合照。



Tuesday 8 February 2011

團年飯(二)

今年留在新加坡過年,年三十晚就叫奶奶嚟我哋度一齊團年。

其實奶奶有我呢個過江新抱都有些少唔好處,就係要隔年先可以年三十同個仔團年,因為我一向都係隔年返香港過年,一年一邊夠公平嘛。但奶奶只得Daddy一粒仔,佢兩個女年三十就返夫家,我哋唔喺呢邊,奶奶就只可以同工人食咋,諗落都有少少內疚的。

我的心情仲未百分百OK,所以就唔跟廣東式煮大餐,而選擇入鄉隨俗跟呢邊人團年打邊爐。


Monday 7 February 2011

團年飯(一)

每年都會食兩次團年飯,新年前的週末就和Daddy家人食,因為姑奶們年三十要返夫家團年。年三十呢,如果返香港就當然同香港家人食啦,如果喺新加坡就同奶奶團年。

上星期六第一餐團年飯在Sunset Way的鎮發活海鮮食,選了午餐時間食,因為奶奶晚上會太攰。

呢間餐廳裝潢都好靚架,牆上掛住部電視不停咁播住個老闆女同啲本地明星的合照,令我開頭對啲食物都有少少期望。

過年唔少得的撈魚生,侍應每加一樣配料就會講一句吉利說話,譬如淋甜梅醬就講甜甜蜜蜜,落薄脆時就講黃金滿地。但個侍應是菲律人,我哋就好好奇佢會點講,結果佢講完恭喜發財後就轉講英文,好搞笑。


Sunday 6 February 2011

應節小食

香港過年家家都會有個全盒,放糖果,瓜子,糖蓮子,糖蓮藕之類。

新加坡就好少見放全盒的,很少人食瓜子,更加少見糖蓮子之類。可能因為啲糖乜乜物物都唔會經得起這邊又熱又潮濕的天氣吧。

呢邊新年家家戶戶會準備一罐二罐的曲奇,鳯梨酥,炸腰果,蛋卷等等來招乎客人。

雖然今年唔會有人嚟我家拜年,但過節都要整啲啲嘢嚟應吓節嘅。

Miho Kitchen找到腰果酥的食譜,整了心心形的。因為心心太細,腰果要折半才放得下。


Wednesday 2 February 2011

蒸糕

做了網上失踪人口幾乎成個月, 農曆新年要到, 出來跟大家打招呼.

失踪原因以後有機會再講, 之前心情沉重, 完全提不起勁去做任何事, 連煮食的興致都盪然無存.  不過, 我現在心情已平伏, 一切安好, 朋友們請勿擔心.

好了, 先祝大家新年蒙恩!

今年在新加坡過年, 所以要自己蒸糕.  對上一次蒸糕, 好像已是兩或三年前了.

買了四斤蘿蔔, 二斤芋頭, 再加上臘腸, 臘肉, 冬菇和蝦米.  原本打算加江瑤柱, 但最後忘了.

蒸糕其實不難, 只是多功夫.  我和姐姐兩人刨絲, 切粒足足花了兩個幾鐘, 切到手軟. 我沒有大蒸籠, 用鑊蒸一個鑊只容得下兩底, 兩隻鑊一齊蒸都要花上四個鐘才蒸好.

上次整蘿蔔糕, 煮前沒有試試蘿蔔甜或苦, 結果糕出來有點苦澀味, 白白浪費一番功夫. 今次學乖了, 蘿蔔刨皮後先切一小塊生吃, 甜的才用來蒸糕.  而且今次刨成長粗絲, 煮完仍然見到一絲絲的, 口感更佳哩.

最後成品非常滿意, 共五底芋頭糕, 四底蘿蔔糕, 另外有剩的全放進一個細的糕盆裏變成迷你鴛鴦糕.


通常人家用來送禮都會撒上芝麻和葱粒, 但我則省去此步驟, 反正都是自用和給奶奶和姑奶, 放了葱花最後她們都可能會挑出來.





Related Posts Plugin for WordPress, Blogger...