Monday 30 August 2010

一波多折的生日蛋糕

上星期有香港朋友一家四口到訪, 可惜我的年假已用得七七八八, 只可以平日陪他們吃晚飯, 只有星期六日可以陪他們.  不過我亦給他們編了一個五日四夜的節目表作參考.  陪他們吃的那幾餐稍後再寫, 先post給她囡囡的生日蛋糕.

星期六碰巧是她囡囡八歲生日, 雖然他們已在出發前提前慶祝了, 但始終小朋友都會希望生日正日會有慶祝, 所以特地為她做一個生日蛋糕.  星期五晚我沒陪他們吃晚餐, 就為了要做蛋糕給他們一個surprise.

趕時間也沒機會去買材料, 就做回細佬生日時的白朱古力熱情果啫哩蛋糕.  放工回家快快用過晚餐便入廚房焗海綿蛋糕, 打開雪柜, 剛好有兩隻雞蛋, 還滿心歡喜剛好夠用.

焗蛋糕時, 再切開熱情果隔籽取汁, 用冰水浸魚膠片, 但魚膠片可能受潮, 浸完還有點硬, 不管了, 就放進已加熱的果汁.  攪來攪去, 等了又等, 部份的魚膠片還像塑膠片一樣, 只好撈出來, 再另溶魚膠粉, 但又不知道到底有多少魚膠片溶了, 魚膠粉份量只能靠估.  還好最後果汁都能凝固, 不過要特別多謝Vanlily之前的提點 (上次的蛋糕啫哩層變水).

好, 蛋糕焗好放涼了, 啫哩也預備好, 可以開始整白朱古力mousse.  先看材料, 白朱古力, ok, 牛奶, 有, 蛋黃一隻.... 噢, 蛋黃!  雪柜沒蛋了!  迫於無奈只好收工, 先瞓一覺再說.

星期六大清早起身叫姐姐去買蛋, 立即開工.  不敢再用魚膠片, 改用魚膠粉.  九點要出門帶細佬返playgroup, 快快的開火煮奶, 新爐太熱情了, 一眨眼牛奶己滾瀉, 要重新再量再煮.  牛奶蛋黃魚膠糊預備好, 放涼時打忌廉, 睇睇時間, 要九點了, 牛奶還有些少暖, 但沒法等了, 把忌廉混入, 埋餅, 放入雪柜.

Playgroup 回來打開雪柜, 蛋糕面上有大泡泡, 可能牛奶未凍就加入忌廉, 所以氣泡全浮上面, 連啫哩層都被推上面, 蛋糕失敗了. 

不想讓小朋友失望, 決定用鮮忌廉來遮醜.  呢邊天氣打忌廉做裝飾一定要坐冰, 開冰箱, 居然一粒冰都冇!!!!!  只好用冰水, 打呀打都只勉强能用, 而且mousse層亦似乎魚膠太少, 有少少溶, 一切要快速完成, 入冰格去雪實.  晚飯後, 用九秒九裝飾, 就送給朋友囡囡, 連吹臘燭都來不及.  這蛋糕唯一滿意的是我第一次玩朱古力轉印紙成功整了心心裝飾.  由雪柜拎蛋糕出來時, 居然插了手指入蛋糕邊, 臨尾都要衰多樣, 唉!


Friday 27 August 2010

釀豆腐, 鮫魚餅, 生菜魚丸湯

這已是兩個星期前煮的, 最近太懶疏忽了Blog.

每次見到靚鮫魚都會買, 除了可以起肉整魚蛋, 簡簡單單搽少少鹽來煎都很美味.

鮫魚在這裏叫tenggiri, 在網上找到這張相.


有另一種魚和它很近似, 叫batang, 通常較大條, 亦較貴.  個人偏愛tenggiri, 肉質較嫩滑.  我的囝囝們也只吃tenggiri, 用batang 來煎或起片煮粥, 他們都嫌肉"鞋"而不肯吃, 他們是很嘴刁的.

今次除了一貫魚蛋, 煎魚餅, 還做了釀豆腐. 

這是打好的魚膠.


Wednesday 25 August 2010

出土文物

今日雅虎儍咗, 留言有時唔駛輸入密碼, 跟住突然間我個blog消失咗, 嚇得我呀. 

好彩一陣間個blog又完好無缺咁開得番.

搬屋時揾番好多好耐冇見過既嘢出嚟, 直情可以用出土文物來形容. 

呢set茶壼是好朋友當年由英國郵寄來的結婚禮物, 十年來都未用過.  真係好靚, 只係daddy對茶沒興趣, 沒有閒情日誌去嘆茶.


送我這禮物的那男生是香港人在英國讀書時識的, 和我同年同月同日生, 又叻又靚仔, 和我非常投緣, 可惜一點火花也沒有.

除了舊禮物, 亦有我中五時的紀念冊.  我的班主任寫了: "你處理事情比對人的能力强, 以後不妨考慮做研究".  我從來沒注意到這句, 廿幾年後的今日我真的選上研究為我的職業, 想不到他能一語中的, 太神奇了.  有機會要和他聯絡上, 一定要告訴他以前在我的紀念冊裏的預言是多麼靈驗, 我相信他自己可能也忘了曾經寫過那一句.

Monday 23 August 2010

日式芝士蛋糕

開爐第二擊, 整日式芝士蛋糕.

未搬前用剩半磚cream cheese, 有147g.  一個橢圓形模只需100g cream cheese, 另外47g 點算呢?

沒有細的非活動模, 唯有用兩個慕絲圈再包兩層錫紙喺底, 希望焗時水不會滲入.

每次都用周老師的食譜, 芝士味不會太濃, 出來蛋糕亦很濕潤.  這食譜唯一麻煩在於一定要有耐性等麵糊雪至杰身才混入打起蛋白.  之前試過沒耐性, 麵糊未杰身就加入蛋白, 結果, 邊拌邊消泡, 好明顯的看到氣泡不停地浮上面.  蛋糕焗好後係好有層次的, 上面多窿窿, 下面就實心.  所以今次我迫自己耐心地等, 不過蛋白打過頭了一點, 要拌久一點才拌勻, 好彩未消泡.

焗時麵糊升到快要溢出模外, 面層裂開了, 可能温度高了點, 新爐温度仍未掌握到.

橢圓形模在新加坡找不到, 上次返香港時買的.  除了那長長的裂痕外, 外貌和味道都幾似街外買的, 可惜我找不到橢圓形的蛋糕盒.


還有一個細心心型和圓型, 心心型給同事做遲到的生日禮物, 圓型送了給奶奶.



日式芝士蛋糕是daddy 的最愛, 第二日即刻要食, 入廚房問蛋糕在那裏, 我話只可以食橢圓形的那個, 心心要留給同事.  daddy 話有冇攪錯心心應該給他.  哈哈, 不好意思, 心心要給我的男同事.....和他的太太. 

最後daddy一口氣吃掉半個蛋糕, 其餘的細佬分幾日食完, 我才分得一小片.

當時仍未unpack完, 連絲帶都揾唔到來做裝飾就送人了.

Friday 20 August 2010

精靈

這年代的小朋友真的十分聰明, 十分精靈.

前晚我教大仔讀三字經, "人之初, 性本善, 性相近, 習相遠, ...". 

囝囝平時講英文, 很怕讀中文, 但我覺得始終作為炎黃子孫, 點都要識少少中國文化文學, 所以明知他沒興趣, 仍堅持教他讀.

我並不寄望他會明白那些句子的意思, 但至少識背幾句, 對三字經有少少印象, 以後大少少才去理解其中意思.  可惜, 現代小朋友比我們的年代的聰明, 以前我細個明唔明都會照背.  囝囝就打爛砂盆問到篤, 逐個字問點解, "之"係咩? 我點解釋呀!

勉強讀了幾頁, 囝囝說: "媽咪, 讀埋呢頁就夠嘞, 你太攰啦."

表面上幾體貼, 實際上係佢嫌悶, 但知如果佢話悶, 我一定唔會理繼續讀落去, 佢就用我來過橋, 你話幾醒呀!

結果, 我讀到口乾, 佢都仲未識背頭六個字. 

Daddy 亦非常"合作"地配合, 問:"What does "融四歲"mean?

我答: "孔融四歲的時候"

他說: "Then why can't they just write 孔融四歲的時候, so much easier"

我無言以對.



Thursday 19 August 2010

又試爐

設計師交屋時, 我第一時間check廚房, 再睇吓啲user manual (說明書)齊唔齊. 

煤氣爐, 抽油煙機都有manual, 居然我最緊張的焗爐個manual唔見咗, 有冇攪錯! 

個焗爐只有符號, 一個字都冇, 點知邊個掣打邊個掣呀? 

忍手忍了兩個多星期, 個設計師都未揾番份manual 俾我, 但真係再忍唔到手嘞, 決定撞吓彩, 睇吓自己禁唔禁啱掣用到個爐啦, 好彩俾我亂禁都開到用到.

開爐第一擊 - Basil, bacon and shallot bread.


新爐有個好處, 就係焗嘢時睇到裏面情況, 舊爐係睇唔到架.

睇成品, 似乎新爐太熱情如火, 焗得過火咗少少, 下次要較低温度.


整麵包整到有啲悶, 因為來來去去都係嗰幾個造型, 要諗啲新意先得, 但自己技術有限, 有idea都唔識整, 有冇人可以教吓我呀?

呢次我用了back bacon, 一啲都唔香, 下次要用番streaky bacon至得, 點都要有番啲肥肉先好食.

講番呢個焗爐, 覺得幾好用, 可以set開始和結束時間, 結束時間到會自動熄火, 唔記得睇火都唔驚會焗燶.  舊焗爐冇咁既功能, 只可以set alarm, 仍然要自己去熄火.  呢個爐有六個烤焗功能, 但講真有幾多個對我來說都分別唔大, 因為我都只係會用普通上下火加fan 和grill, 其他都唔知有乜用.  仲有defrost功能, 我真係唔知要嚟做乜, 要defrost我不如放入微波爐啦.

Wednesday 18 August 2010

試爐

原來唔經唔覺己經搬了成個月, 但我上個星期先開始入廚. 

姐姐一早己經開爐, 問佢新煤氣爐好用嗎, 佢話幾好.

咁幾好即係幾好? 

舊屋係用A字頭意大利牌子, 以為來路貨而且又喺M字頭舖頭買, 應該都唔錯啩.

結果原來一啲都唔掂, 個火向外的, 個鑊未熱, 菜未熟, 我隻手就先煮熟嘞, 仲要煮到滿頭大汗添.

所以今次點都唔會再買番同一隻牌子, 但呢邊真係冇乜選擇, 來來去去嗰幾隻牌子.

一開波就去Miele專門店睇, 諗住俾多少少如果好用既我都唔介意, 點知一問價錢, 原來唔係俾多少少, 係俾多好多倍.  一個爐頭(一個火)要成二千幾蚊, 嘩, 我唔係住豪宅, 唔駛咁貴既嘢.

揀來揀去, 最後選了林內.  到showroom睇時, 個日籍經理仲好好咁同我哋傾, 叫我哋要買made in Japan嗰隻, 好用好多雖然貴過中國和印尼出的.

果然冇介紹錯, 真係幾好用, 你睇個火係喺下面出的, 火力好集中, 煮嘢時個鑊好快熱, 但又唔會辣我隻手.



火夠大夠隻中, 炒菜一流, 睇碟腐乳炒通菜幾翠綠.


我對呢個新爐非常滿意, 所以和大家分享一下.  你哋如果以後要買新爐, 不妨考慮呢隻牌子, 但記得要買日本出嗰款喎.



Monday 16 August 2010

我的新廚房

新屋裝修我其實冇咩特別要求, 大致上都由室內設計師來設計, 唯有廚房我講明要和以前廚房差唔多的間隔, 因我用慣覺得好用, 而且一定要多地方儲物, 因為我實在太多嘢.

原本廚房很細, 我們把一幅墙拆了, 再起新的讓廚房大點.

爐頭, 抽油煙機和焗爐都花了很多時間去選.  乾碗機, 雪柜, 洗衣機和乾衣機就從舊屋搬來.



細佬正在諗緊點樣去攪個新焗爐.


設計師跟足我的要求, 儲物柜高上到天花, 最上一層我要擔梯先拎到嘢.



怕不夠位, 加了一張可拉出的活動枱面, 用來放出爐面包就啱啱好. 



全屋花最多精神時間去諗去改草圖的就是這廚房, 好彩出來效果都好滿意.



Thursday 12 August 2010

第一樽酵素

見人人都整酵素, 我又整埋一份.

玻璃樽買了幾個月, 拖呀拖, 拖到國慶日先下決心去整.

先整姜酵素, 姜比生果平, 用來當實驗, 失敗都無咁心痛.

玻璃樽洗乾淨後, 放鑊上用蒸氣消毒.  之後應該要風乾, 但我怕有入塵又怕乾唔透, 就貪方便, 放入部乾碗機內乾, 加埋uv消毒, 以策萬全.


姜洗乾淨後, 冇耐性等風乾, 又抄捷踁, 放入焗完包包但己熄火的焗爐內吹乾(fan still on).  嘻嘻, 如果用生果就唔可以咁嘞.

跟住姜切絲, 和冰糖同分三份, 一層層咁砌, 見人話唔可以放得太滿, 見己經大半滿就收手.


Wednesday 11 August 2010

兒童房

我媽咪話要睇我新屋的相, 先post住細路房.

未搬前大仔自己瞓一間房, 我就同細仔瞓.  今次搬屋就打算讓他們一人一間房, 於是就把兩間房佈置成兒童房.

之前在朋友家見到她的窗簾是Thomas & Friends, 很美, 囝囝亦很喜歡.  朋友說是在Spotlight買的, 可惜到我們去Spotlight找時, 己經沒貨, sales說不會再入貨.  我就不停的上網找, 希望能找到, 但原來卡通窗簾布是很難找的.  最後, 那朋友介紹帮她整窗簾的給我, 那人落力地帮我找到了Disney Cars 的窗簾布, 我們開心到飛起. 


找到了窗簾布, 之後就選床, 囝囝看中了跑車床, 一口氣買兩張, 大仔要紅色, 藍色的給細仔, 兩張都是子母床, 方便有客到訪或其中一個要人陪瞓.


Monday 9 August 2010

新加坡國慶日

今天是新加坡45歲生日, Happy Birthday to Singapore!


這是一年前的照片, 兩個囝囝好開心地揮着國旗.  今年我也買了兩支國旗給他們, 但國慶未到, 我也還未拍照留念, 他們就把旗整壞, 白白浪費了我S$4 (7-11 賣兩蚊支! 後來在超市見到, 才四毫子, 激死).

國慶在星期一, 我們就有long weekend, 而我的更是超長, 因為星期四下晝開始放病假.

一早daddy接奶奶來看我們的新屋, 坐一陣就出發NUSS食 brunch.  依家住得近NUS, 去那裏吃飯游水都非常方便.

在泳池旁食brunch真寫意, 奶奶選了三捞河粉.


Friday 6 August 2010

好久沒用衣車

終於忙完新屋裝修和搬屋, 雖然仍然有一箱箱未unpack, 但總算settled in.

大仔的小一學位申請亦己辦妥, 現在只等下星期五抽籤, 請各位為他禱告, 希望主為他安排合適的學校.

忙完一輪, 一放鬆, 全家都病了.  個個都咳, 先是細佬發燒傷風, 但都好得七七八八.  然後到我和姐姐喉嚨痛發燒, 噚日和今日我都拿了病假在家休息.

星期二趁細佬發燒我留在家裏照顧他時, 終於的起心肝做一樣想做好耐既事.

大仔暫時仍在用我好耐以前買的keyboard來練琴, 以前姐姐會用一塊布來冚住, 但久而久, 囝囝就懶, 練完後塊布就亂丟, 跟住就開始有啲封塵, 所以一直都想自己車一個cover.

搬了好久好久沒用的衣車出來, 再用舊窗簾布, 就車了呢個花花琴蓋了.


太耐沒車嘢, 車吓拆吓,  都車咗好耐吓.  但都好開心, 因為整完後好有成功感.  唔好睇好似咁簡單呀, 為咗遷就嗰條用來托住琴書既金屬條, 都有啲考功夫架. 

Wednesday 4 August 2010

囝囝當花仔

上星期六 (7月31日), 教會好友結婚, 囝囝有幸被邀請做花仔, 他的好朋友就當花女.

囝囝第一次做花仔, 著起老西一副正經樣,  拖住花女笑得幾開心.


佢做花仔我仲緊張過佢, 怕他行太快, 又怕他亂跑亂跳亂講嘢.  其實佢好細個己經有朋友想揾佢做花仔, 但他實在太佻皮, 怕他拿了介指走佬, 所以都沒成事. 

好彩花女己經有豐富經驗, 簡直係專業水平, 所以我叫囝囝望實花女, 花女行一步佢就行一步, 咁就包冇錯.


正在等walk down the aisle, 花女真係太可愛啦!  囝囝都俾我攪到幾緊張吓, 佢怕行行吓會跌咗個介指枕頭落地, 所以捉到好實.


Related Posts Plugin for WordPress, Blogger...