Friday 26 March 2010

日本行(1)

今朝淩晨一點坐星航飛大阪, 上機時已經攰到死。

班機好滿, 所以啲空姐全程都好似好趕咁, 不過服務都仍然好好。

我一定要灌啲酒落肚先可以响飛機上面瞓著, 但又肚餓, 唔敢空肚飲, 就叫空姐拎個杯麵。

好大碗嘅杯麵呀! 旁邊就係每次長途機必灌嘅gin tonic.


Wednesday 24 March 2010

回憶

夢劇院的天生一對.

很舊的一首歌.



呢首歌每次聽都會令我諗番好多嘢.

當年初來時在宿舍成日聽的, 唔知當日借我這張專輯的朋友還記得嗎?

呢幾日好忙, 聽晚要飛, 响日本未必update到, 你哋等我返嚟啊!



Tuesday 23 March 2010

簡單宴客 - 3月20日

星期六請了我參與international student outreach program所照顧的學生來我家裏食晚飯.

她很高興, 說這是她來了新加坡年幾以來第一次到本地家庭作客.

之前一晚我瞓得唔好, 所以好攰, 都冇乜心機去煮呢餐. 好彩姐姐好帮得手, 洗洗切切全部事先搞掂.

自製燒肉, 今次失敗咗.  啲肉好味, 但皮好咸又唔脆.  以前整都係先用水烚, 醃, 風乾, 用粗鹽舖面焗, 最後刮走啲鹽繼續焗, 次次都成功.  今次諗住懶, 照T&P既方法, 唔駛出水, 點知就出事.  以後要請人食飯時, 千萬唔可以試新做法!


Monday 22 March 2010

Strawberry yogurt bread

最近幾日都瞓得唔好, 搞到好攰, 成個人渾渾噩噩咁, 心情亦都麻麻.

有啲人心情壞時會去shopping therapy, 我就選擇cooking therapy.  响廚房裏面整吓呢樣整吓嗰樣, 諗吓應該點整, 時間就會過得好快.

星期六晚有客人來我家晚飯, 讓我錯過了Mommy Dearest既麵包研習班.  噚日決定自己在家裏整, 順便整定啲存貨俾屋企人响我公幹時食.

見愛美麗post士多啤梨乳酪麵包好吸引, 囝囝又鐘意食strawberry yogurt, 就開爐整呢樣.

太耐冇整麵包, 每個步驟都要諗吓, 好彩最尾都記得.

糊裡糊塗地忘了用手搓要減水份, 照足愛美麗post的份量, 好濕的一pat. 搓呀搓都係痴到成手都係, 再咁落去啲酵母開始發酵就前功盡廢.  無計可施下, 拎部老爺打蛋器, 放上dough hooks, 姑且試吓.  部老爺機出盡九牛二虎之力, 個麵團終於似啲樣, 只出到少少薄膜, 都要停嘞, 因為部機已經開聲投訴, 機身都好熱, 再攪落去驚佢會燒.

邊搓邊聞到strawberry yogurt味道, 入爐後就更香.

出爐喇, 都幾靚仔既.   



Saturday 20 March 2010

Scones

今日好忙呀!

下個星期要飛日本公幹, 所以要先作準備.

每次去公幹前都會好忙, 要預備家裏食物, 為小朋友預備我不在時他們的茶點, 自己行李反而會是最後才打點,

一早陪細佬去上TumbleTots (Playgroup), 下雨天只有細佬一個去上堂.  四個老師對一個小朋友, 細佬都有點不知所措, 點解冇朋友仔呢?

上完堂又要去街市和超市買夠兩個星期的餸, 填滿整個雪柜.

食完晏, 稍作休息, 開始整scones.  今次是大仔落order的, 所以一次過焗一大盆, 可以放冰格慢慢食.

今次整得幾滿意, 雖然距離以前在英國時吃的還是差一點.

食譜取自Rachel Yau 的yogurt scone.


Friday 19 March 2010

十八年

Facebook 讓我和一個已失去聯絡十八年的老朋友再次聯絡上.

這個星期那朋友來新加坡公幹, 我哋有機會再見面.

十八年了, 好長好長的日子, 像做夢一樣居然會再遇上.

再見老朋友, 大家都老了, 身材走了樣, 頭上也都長出白髪.

未見面前其實心裏有些緊張, 不知道見面時該說什麼, 要帶他去那裏吃哩?  他喜歡吃什麼?  吃辣嗎?  我真的想不起他當年愛吃什麼, 只知道以前還是學生都是去hawker centre, food court 之類.

見面後發覺一切顧慮都是多餘的, 食物也是次要, 最重要的只是聊天聚舊一番.

晚餐到Plaza Singapura 的Thai Express, 芒果沙律, 綠咖哩, seafood Phad Thai, 全部都是Thai Express 的一貫水準.



Thursday 18 March 2010

燕皮雲吞

燕皮是福州特產, 以豬肉和甘薯粉制成.

我的舅母是福州人, 所以從小我就接觸到福州食品.  燕皮雲吞是我最愛的一道福州菜, 比起廣東式梘水雲吞皮, 我還是較鐘愛燕皮.

我從來都不知道燕皮要從那裏買, 因為舅母定時就有親戚從鄉下帶去香港. 

到了新加坡, 就更想念燕皮的味道.  近幾年有中國來的新移民來經營麵檔, 大部份都有賣燕餃, 但都是炸的, 少見放湯的.

終於偶然在Geylang 那邊找到燕皮, 開心得當場打電話回去告訴我爸爸.

這就是燕皮嘞.  因燕皮是用肉做的, 要存在冰格內.  打開盒子, 裏面是一片片好像紙的東西, 很乾很容易破.  要小心用刀切成所要的大小, 再用噴水壼逐片噴濕令其變軟身, 但注意不能太濕, 太濕會爛.



Wednesday 17 March 2010

舊作 - 菠蘿包, 椰檳

最近見blog友都整面包, 諗諗吓先醒起其實我都有啲舊作既相.

其實我開始時是先整面包的, 至細佬出世後才開始學整蛋糕.

曾經好勤力咁每日放工返屋企煮飯和焗面包, 大仔和daddy就食我既面包做早餐.  但初初佗住細仔時, 有少少流血, daddy 就下禁令, 唔准我再整嘞.  後尾有兩個囝囝之後, 又冇時間去整, 我諗真係要開始整番, 如果唔係就快唔記得點整啦.

先俾大家睇吓啲舊作.

菠蘿包, 冇落臭粉整既個面都會裂架.



Tuesday 16 March 2010

郊遊半日

今個星期這邊學生放一個星期term break, 昨日我就請假陪太子玩.

約了另外兩個家庭一齊去植物公園(Singapore Botanic Garden) 玩, 一行十人, 三個媽咪, 兩個工人姐姐, 加五個小朋友.

怕晏咗會熱, 約了九點開始, 大清早就要爬起身預備, 要叫醒兩位少爺都幾花工夫.

帶了兩條面包去餵魚, 細佬唔識將面包丟入池裏, 一陣間就冇興趣, 走去攪部賣魚糧機.



Sunday 14 March 2010

又嚟炒河

噚日午餐大仔又話要食炒河粉, 上次買一公斤半唔多夠食, 今次買夠兩公斤粉. 

由街市拎番嚟都好鬼重嘞, 炒時一大鑊 (其實已抽起咗些少), 嗰一刻覺得自己好似外面賣炒粿條個小販咁.




諗住唔落芽菜, 費事嘥時間摘, 但臨去街市前, 大仔話: "Mommy, I also want it with the white white thing".  White white thing 即係芽菜.  冇法啦, 個仔要到, daddy 就要努力咁摘芽菜嘞.







Friday 12 March 2010

福建炒飯

小時候和舅母去飲茶, 我每次都要求乾炒牛河, 但舅母話太cheap, 叫福建炒飯好了.

好久沒吃過這款飯, 因為在新加坡的酒樓好像都沒賣.

有天和同事閒聊時, 提起福建炒飯, 突然很懷念, 趁星期日煮來滿足一下.

煮了一大盆, 材料有瑤柱, 帶子, 蝦, 雞丁, 冬菇和芥蘭芯, 雞蛋炒飯底.


Thursday 11 March 2010

肥猫沖涼

我家除了有兩個囝囝外, 其實仲有多一個成員, 就係九歲既猫咪嘞.

係時候俾佢亮吓相.

係咪好英偉呢?  呢張相係好多年前影, 當時仲keep 得好fit.


Wednesday 10 March 2010

斑蘭戚風

上星期一個朋友猛話想整pandan chiffon, 搞到我都手痕.

星期六下晝決定開工整, 揾咗大少奶既食譜.

嗰晚要去Mommy Dearest度食飯, 諗住整好帶去做手信.  第一次整, 一定要自己試吓先俾得人食, 所以就一次過整兩個.

整時朋友亦來湊熱鬧, 佢想整但其實連sponge cake 同 chiffon cake 都分唔清, 所以要我示範佢睇.

一路整, 佢一路話點解唔綠, 話駛唔駛加colouring.  我堅持全天然, 所以出來顏色比較淡.  焗時好香, 但試食後覺得食到發粉味, 於是就冇帶去俾Mommy Dearest. 

奇怪地第二日再食時又食唔到發粉味喎, 只係斑蘭香味唔夠濃,  下次要加多啲斑蘭葉.

呢個係用來自己試既.



其實係淺綠色, 不過影相睇唔出.


Tuesday 9 March 2010

Blogger gathering (2)

飯後有超香甜的有機芒果, Daddy & Mommy Dearest 自家種的哩!

你拮我拮, 好快就沽清.  囝囝响屋裏面玩wii, 出到嚟淨係食到西瓜, 見到啲相時話乜嗰日有芒果咩?


Monday 8 March 2010

Blogger gathering (1)

星期六好榮幸受邀到Mommy Dearest屋企參加一個blog友聚會. 

I was so happy to meet Mommy Dearest, Daddy Dearest, Babe and Sonny in person at last.  响blog 度成日見到佢哋啲相, 第一次見面都唔覺陌生, 感覺好似識咗好耐咁添.

亦好高興識到好多blog 友, 好似愛美麗, Hanrik, Joanne, Natalie, Mr & Mrs Yeung Yeung.  唔好意思我唔係好記得每個人既名.  我記名係好差架, 如有錯漏請見諒.  世界真細小, Mr and Mrs Yeung Yeung 和我同我老公大學時都係讀同一科喎, 只係唔同大學啫.

今次出乎意料, 老公居然答應陪我去, 開心C我啦.  今次只帶大仔去, 第一次去人哋屋企, 費事細佬去到搞搞震.

Mommy Dearest 預備咗好多食物呀, 真係好佩服佢一個人整到咁多嘢, 仲咁有條理, 完全冇stressed既感覺, 俾着我就會打瀉籮蟹咁嘞.

Appetizer 有nachos with homemade avogado dip and salsa dip.  牛油果係响美國定加拿大拎番嚟, 特別creamy.  個salsa都好好味, 囝囝食到唔停口.  啱啱發覺原來冇影碟nachos.

跟住見到兩籃面包, 嘩, 正呀, 仲靚過外面賣嗰啲!  Foccacia roll, 好好好好味!!! 點解我跟同一食譜整但味道差咁遠呢?



Saturday 6 March 2010

三戰馬卡龍

上星期為了做Elmo cake 買了新的紅色food colour, 於是又想再試做馬卡龍. 

本來想整Elmo紅色, 諗住如果整得好可以用來做個Elmo cake 既圍邊裝飾.  但嗰日食完晚飯覺得好攰, 冇乜心機整, 求其加咗幾滴colour就算, 所以只整到粉紅色.

人攰真係唔適合整嘢, 嗰晚狀況頻生. 

1. 我居然用磅完杏仁粉的碗來磅加入蛋白既糖, 蛋白開始打時已覺怪怪, 好彩都打得起, 仲打太起添.

2. 忘記了加vanilla essence (雖然非必要, 但覺得加咗好味啲).

3. 顏色落太少, 做唔到預期既色.

上次整裙邊細細, 今次就試吓讓面層先乾才焗.  為咗快啲可以入爐, 我先預熱焗爐至80 度, 再熄火, 等焗裏面凍番少少再放盆macaron入去.  十幾分鐘後面層已經好乾, 可以開始焗.

結果成盆都出到裙邊, 每粒個面層都冇裂, 但因蛋白打過頭, 大部份面層都有肚臍, 不過我都已經好開心.



Friday 5 March 2010

Tiffin Room @ Raffles Hotel

星期三晚要應酬幾個由法國來的客人, 老闆親自選了Raffles Hotel裏的Tiffin Room 食晚餐.

Raffles Hotel 是一間好高級的酒店, 最平的套房都要成千蚊坡紙一晚.

Tiffin Room 是在酒店大堂旁的, 一定要先入大堂才可入內.  訂位時, 酒店講明一定要七時才能進入, 早到要在外面等, 夠晒大牌.  大堂外有大大個牌寫住"Residents Only", 我哋要同守門的講我哋訂咗位晚飯先俾我哋入去.

Tiffin Room 夜晚只供應 North Indian Cuisine, 可以選buffet 或 a-la-carte.  我們選了buffet.  餐廳好靚, 裝潢好有殖民地感覺.

打開drinks menu 一睇, 即時儍眼, 一杯果汁要S$20, 最平既可樂都要S$9一杯! 仲未講個buffet 盛惠每位S$65++.

總共有三個station, 呢個係cold appetizer.  全部都麻麻, 我每樣都攞好少好少.  選擇幾少吓, 但醬汁就有七種, 不過我一啲興趣都冇, 因為我好怕印度香料味. 



Thursday 4 March 2010

元宵晚餐

我知元宵節要吃湯丸,  但忘記以前在香港時有否做節. 

不管了, 反正我最愛大時大節煮好吃的, 就趁機煮好一點的.

那天適逄星期日, 要去教會, 又要去買洗衣機, 乾衣機 (家裏洗衣機壞了), 回到家己經很遲, 就只簡單的煮三菜一湯

豉油雞, 煮了一隻細的, 只斬了半隻, 剩下半隻星期一吃.  還有蘆筍炒帶子, 今次買到挺粗的蘆荀, 很甜.  帶子是急凍貨, 細細粒但味道都還可.



Tuesday 2 March 2010

滷鴨舌

今次返香港過年因為天氣凍和細佬病, 所以很少出外食嘢, 連最愛的街頭小食都沒吃到.

但仍然有食我每次返港爸爸都會特地煮的滷鴨舌.

在新加坡要吃滷鴨舌不容易也很貴, 所以爸爸次次都一定預備一大碟給我享用.

爸爸的愛心出品當然美味非常, 我吃了很多很多, 大仔第一次食但完全停不了口, 連印尼姐姐都食到舔舔脷.  大仔食完話要再食, 可惜新年期間凍肉舖都未開市, 唯有下次回港再吃.

嘻嘻, 掛住食, 成碟食咗一半先記得影相.



左下角影到少少係蒸紅衫魚, 我印象中好似未食過蒸既, 仲要咁大條.  我只記得細個時食煎紅衫魚, 不過我爸爸媽媽話我細個時都有蒸喎.  我諗我真係冇係香港太耐嘞, 乜都唔記得lu.  呢條魚好鮮甜呀, 新加坡冇紅衫魚賣架.



Related Posts Plugin for WordPress, Blogger...