九月香港行 - 海洋公園

08.09.2011

呢日去海洋公園, 幾乎每次帶囝囝哋返港都會去的.  佢哋鐘意海洋公園多過迪士尼.上年才去過, 估唔到一年時間內變咗咁多. 一入門口已經唔同晒樣, 好似迪士尼或環球影城之類的theme park.  我諗如果迪士尼冇嚟香港, 海洋公園仲會唔會攪咁多革新呢?

 

兩隻超大熊猫喺屋頂啊.

新的海洋館, 可以摸海星, 但記得要先洗手才摸呀, 仲有唔好拎起隻海星.

我比較鐘意舊海洋館, 新既要時間接受.  咁啱有蛙人喺度清潔, 原來水裏清潔都係好似吸塵咁.

當日纜車維修冇得搭, 真可惜,  纜車係我去海洋公園既其中一個期待項目呢.  唯有坐ocean express上山去.

Daddy 和大佬玩呢樣唔記得乜名既嘢, 細佬未夠高唔玩得, 扭到飛起.

又曬又熱又餓, 海洋公園又變到七彩, 都唔知點去揾嘢食, 求其喺纜車站上面間餐廳食.  嘢食又貴又唔好食, 大佬食terriyaki chicken set, 啲椰菜花係酸架.

白汁雜菇意粉, 跟一杯細Haagen Das雪糕, 就百幾蚊.

沙律, 普通咁啦, 但50蚊.

最揾苯呢碗金邊粉, 加杯雪糕一set, 同上面意粉餐和雞扒餐一樣價錢.  啲乜丸物丸居然係粉既, 連細佬都唔肯食, 啲粉少到兩啖食晒.



呢度唯一好處係有冷氣同無敵海景, 但其實呢間都曾經風光過既, 記得廿年前响呢度食過自助餐, 幾好味架.

跟住去水母館, 呢個係我好鐘意架.  游水怕見水母, 但當佢哋被困住時我就鐘意佢哋, 因為好靚.

今次睇埋史前魚類 - 中華鱘, 好醜, 見到毛管戙.

當日我張飛最抵, 我幾乎玩晒所有機動遊戲, Daddy就負責陪囝囝哋玩啲適合小朋友既.

我玩過山車時, 佢哋去咗玩滑浪飛船, 淋到濕晒.

冇睇海獅, 但同佢哋影相.

終於影到張熊猫正正經經坐喺度既相, 唔記得佢係安安定佳佳呢.

最後去埋兒童樂園, 囝囝哋已經曬到變龍蝦仔了.

大佬下年可能太高呢種細路遊戲唔玩得了.

玩足一日, 細佬喺城巴上就瞓着.