梅菜扣肉 (附食譜)

最近比較忙, 又懶, 似乎越來越少上菜. 

今個星期只上過一個豬肚肉骨茶, 今日就上多道梅菜扣肉啦.

今次用的湯碗底部是平的, 所以倒扣出來唔靚.

梅菜是同事由廣州帶回來送給我的惠州梅菜, 友人說今年的很新鮮.  比平時用的甜梅菜鹹.  我不懂梅菜怎樣算新鮮, 只知道這梅菜比平常用開的甜梅菜鹹.  我已經加多了糖, 仍覺太鹹. 

囝囝們見到深色餸又有肥豬肉就非常雀躍.

以為Daddy唔會食碟梅菜扣肉, 隨手炒碟甜豆炒青口.  單看顏色賣相就知道是求其之作, 反正只有他一個人食, 不用太講究了. 

我話俾Daddy知呢碟係佢一個人既, 佢話點解要另外整一碟俾佢, 我答:"你唔鐘意食梅菜扣肉嘛", Daddy居然話:"邊個話架, 我食.".

跟住拎起筷子, 夾起一舊豬肉和梅菜, 送進口裏, 說: "好味呀!".  我和姐姐看到目瞪口呆, 他平時唔食肥豬肉噃!  食完餐飯, 仲加多句, "今餐好味!".  我和姐姐你眼望我眼.

煲豬肉的水不要浪費, 用來煮了紫菜蛋花湯.  家裏連青蔥都無條, 真失禮.

我的簡單住家式梅菜扣肉做法, 豬腩肉不用炸過的.

梅菜扣肉

材料: 豬腩肉  480 g, 甜梅菜 100 g, 薑兩片, 老抽 2 tbsp, 糖 1 tbsp, 水 1杯

做法:

1. 梅菜先浸水一陣, 洗去沙泥, 榨乾水, 切粒.

2. 豬腩肉洗淨, 用熱水烚至七成腍, 撈起, 待冷後切片.

3. 燒熱鑊, 下油少許, 爆香薑片, 下梅菜炒香, 贊酒, 倒入水和調味, 炒勻, 水滾即可盛起.

4. 在碗裏排入豬腩肉片和梅菜, 最後淋下醬汁, 用另一隻碟蓋起(或用耐熱保鮮紙), 隔水蒸一個半小時至豬肉夠腍.

5. 蒸好後, 先小心將醬汁倒出, 然後用另一隻大碟蓋在碗上, 快手倒扣, 再將汁料淋於扣肉上即可 (想汁稠一點, 可以用生粉水埋芡).

註: 老抽作用只是用來調色, 鹹味大部份來自梅菜, 所以梅菜不可浸水太久.  不同梅菜鹹味會有出入, 糖和老抽份量要自行調較.