團年飯2016 - 自製盆菜

今日已經初八了, 先來個遲來的拜年.

祝新春快樂! 猴年大吉! 心想事成! 身體健康! 財源廣進! 小朋友聽教聽話, 學業進步!

今年團年飯決定試整盆菜.  其實我只食過三次盆菜, 最後一次食好像是十年前, 所以對盆菜裏面的菜式沒什麽印象.  看了Moonmoon的blog和向Mommy Dearest請教過後, 胆粗粗買齊材料開始煮, 好緊張呀!

只有我們一家, 奶奶和兩位姐姐一共七人, 用24cm Fontignac 鑄鐡煲容量剛好, 但上層面積有點細, 不夠地方砌面層的食材.  如果用LC Marmite會更適合, 但我的媽咪鍋是32cm 太大了, 砌滿一煲不知道要食幾餐才食得完.

成品就是這樣, 還不錯吧? 奶奶食得好開心呀.

另一角度

今次盆菜有:
1. 茄汁蝦碌
2. 炸鮫魚球
3. XO 醬炒帶子
4. 燒腩
5. 白切雞
6. 炆鮮鮑魚
7. 冬菇炆海參蠔豉
8. 南乳蓮藕炆豬手
9. 上湯炆枝竹魚肚
10. 上湯蘿蔔
11. 黃芽白
12. 拌碟西蘭花和甘荀花

全部食物都是自製, 誠意十足的啊!

網上見盆菜很多時都有鯪魚丸, 但這邊沒鯪魚賣, 於是改成鮫魚丸.  新年期間連鮫魚都難買, 找了幾日才在超市找到. 自己起肉加臘腸粒和芫茜碎來攪至起膠, 再撻它十幾廿下.  本來想整發財魚丸的, 但原來家裏沒髪菜了.

 炸成細細粒金黃色的魚丸, 見到都開心, 仲要好彈牙好好味的. 

燒腩當然自製啦, 因為在這邊好難買到靚燒味的.  今次燒得皮非常鬆脆.

白蘿蔔用雞湯煮至八成腍, 甘荀片也用雞湯稍煮過.

上湯炆枝竹魚肚

最底層是稍為炒過的黃芽白

然後是白蘿蔔

第三層是枝竹魚肚

第四層南乳蓮藉=藕炆豬手, 炆了一隻豬手, 好大碟, 只放了一點點入煲內, 其餘收起入雪櫃.

第五層冬菇炆海參蠔豉

最後上面排上蝦, 帶子, 雞, 炸魚蛋, 鮑魚和燒肉便大功告成.

原來盆菜也不難做, 和平常煮團年飯差不多, 只是全部放入一個煲內而不是分開一碟碟. 邊滾邊食熱辣辣, 底層的材料吸收了上面的精華, 好味到暈.