簡單但美味的晚餐

Daddy出國的日子, 星期日就只有我和囝囝們, 一早起身返教會, 回到家都好攰了, 晚餐時間就會煮些簡單點的.

超市見到減價的flank steak, 於是煮了一小碟的清酒牛扒.  這菜以前煮過, 食譜可參考舊post.

之前醃好, 每面煎兩分鐘, 很快就完成. 煎牛扒鑊一定要夠熱, 所以我會用de Buyer鑄鐡鑊.  這鑊我其實好多少, 姐姐絶對不會用的(易潔鑊當然她是首選), 仍然未夠黑.

一塊二百幾克的牛扒, 我怕囝囝們不夠吃, 另外加多一小碟的蒸魷魚. 之前見Mommy Dearest 煮過, 有樣學樣, 不過我買不到BB魷魚, 用普通魷魚都OK.  魷魚加薑絲和蒜蓉來蒸, 蒸熟後將大部份水倒掉, 撒上蔥粒, 灒熟油, 淋點豉油即成. 清清哋都好好味, 細佬連蒜蓉和蔥粒都掃得乾乾淨淨.

晚餐我都不想吃太多肉, 所以預備兩碟蔬菜, 烚小棠菜和簡單沙律.  有些家庭姐姐放假那日都會出街食, 但其實自己在家煮也可以很快很方便, 又可以食得健康.

中秋節做節晚餐

昨天中秋節, 你們都有做節吧.  FB看到家家戶戶熱熱鬧鬧地做節, 桌上都有豐富菜餚, 很羡慕哩!

Daddy家人從來沒中秋節做節的習俗, 基本上除了團年飯之外, 就沒有其他的做節傳統.

我說中秋節要做節,然後到樓下去玩燈籠, 他的反應亦都極其冷淡.

所以我也不想大費周章煮大餐做節了, 反正今日仍然要返工.  新加坡是沒有中秋節假期的. 沒有慣常的雞, 魚, 燒肉等等, 只是煮比平常豐富一點的小菜.

四餸一湯, 白飯任裝.

為了用完剛買的金不換, 煮了泰式青咖哩海鮮.  第一次煮和吃青咖哩海鮮, 以前都只是吃青咖哩雞.  星期日晚煮了焗雞脾, 不想再吃雞, Daddy說煮蝦吧.  好, 就煮蝦, 再加青口和魷魚, 就成了青咖哩海鮮了. 這道菜快, 靚, 正呀!  用現成青咖哩醬, 加入海鮮快煮, 十分鐘以內就攪掂.

星期一晚餐精選 30 Jul 2014: 滑滑蒸水蛋, 薑蔥魚片, 豉椒炒青口

之前出日本遊記少了po住家飯, 現在補回.

7 月30日的星期一晚餐, 煮了很簡單的幾樣餸.

蒸水蛋, 由姐姐主理. 不得不讚姐姐有進步,  雖然邊邊有些微起泡, 但大緻上仍然非常滑.  最後由我淋熟油和豉油, 好味好送飯.

 薑蔥炒魚片, 用了生魚來炒, 貪其少骨和實淨, 不容易炒爛.

豉椒炒青口, 非常惹味. 料頭有蒜頭, 乾蔥和薑, 和豆豉一同爆香, 灒酒再加青口快炒, 加入調味料稍焗片刻即成.  調味也只是蠔油, 糖和鹽, 因為用已熟的急凍青口, 很快就煮好.

這餐還有一碟炒莧菜和蕃茄薯仔江魚仔湯.

辣椒螃蟹

囝囝們都很愛吃蟹, 每次和他們去買菜, 他們都會嚷着要我買螃蟹.

不過, 超市的蟹通常又貴又細隻, 所以幾個月沒買來煮了.

星期六見到大一點點(雖然還是不大)的, 價錢還可以, 就買兩隻來滿足一下他們.

之前去廣祥泰入貨時買了一包辣椒螃蟹醬, 就獻出我的第一次吧!

第一次煮辣椒螃蟹, 為了隆重其事, 我還把蟹件先半煎炸.  我最不愛煎炸, 以前炒蟹都會省了這步.

用現成醬料煮這道菜真的超容易, 最難的步驟大概是殺蟹. 

照着包裝上的做法, 先把蟹件炸熟(我先上點生粉才半煎炸至半熟).  另外再起鑊, 炒香乾蔥頭和薑片(包裝上做法是用洋蔥碎), 倒入醬汁炒一分鐘, 加入蟹件兜勻.  我覺得汁太杰, 自己加了點水, 加蓋轉慢火醬蟹焗熟, 最後打入一隻蛋兜勻, 即可上碟.

我怕兩隻蟹太少, 另外還加了些蝦. 蝦也是先上粉炸過, 煮出來真的又香又惹味.

薑蔥炒蟹

星期六在超市見到有便宜的螃蟹，S$11兩隻，即買。

Daddy 和囝囝們都不吃辣，只好煮薑蔥炒蟹。

每次吃蟹我都會很忙，兩個囝囝不停的叫我幫他們拆肉，我連自己的飯都沒空吃。

這兩隻蟹很生猛，肉也紥實和鮮甜，自己煮真的比外面吃划算很多哩。

酥炸生蠔

噚日嗰單嘢, 我越諗越氣頂.  雖然我知唔應該含怒到日落, 但呢啖氣真係噚晚下完, 今日諗返起又上番.

因為咁, 今日都冇咩心情做嘢, 尤其仍然要繼續做關於個合作項目既嘢.  雖然對方態度差, 又唔願俾錢, 但答應得既我都會盡力去做到最好, 我唔會學對方咁唔專業既, 只不過邊做邊會充斥着負面情緒.

廢話講完, 今日要寫酥炸生蠔, 其實係酥炸蠔仔, 因為啲蠔好細.  我今次只係實驗性質, 隨便在超市買包急凍蠔仔嚟玩下.

某一上youtube揾嘢時, 無意中揾到個酥炸生蠔的video.  好簡單, 於是抄低來試試.

最重要其實係個粉漿, 點樣先可以做到酥脆呢? 原來要用幾樣粉撈埋, 照着做炸出來真的非常酥脆, 就算凍咗都仲脆, 完全冇變腍.  下次要買大大隻的蠔來炸, 會更好味.

粉絲蟹煲

週末又要到了, 真開心!  今個星期只返了三日工, 呵呵, 太爽了, 每個星期都這樣該有多好! 

最近太少出post, 還有很多舊作未出.

某日和大仔在超市買東西時, 他突然說要吃蟹.  好吧, 看價錢也不算貴, 就買來煮來滿足他. 超市賣 S$19.9/kg, 在外面吃要至少S$50/kg (煮好的啦), 我這樣一大煲才差不多S$20.

京汁牛仔骨, 金銀蒜粉皮蒸帶子 (食譜)

最近極少下廚, 但星期一細佬生日, 點都要親自落廚煮幾味.  從冰箱裏挖出一包急凍牛仔骨和連殼帶子, 都是個幾月前買的.第一次在新加坡買到牛仔骨, 在Mmmm見到時, 多開心, 即刻買一包回家.其實我從來未煮過牛仔骨, 印象中也好像沒食過幾次, 最記得是以前的韓國藉老闆請食bbq時食過.之前和妹妹傾電話時, 她說剛煮了牛仔骨, 於是立即問佢點整.  佢話係我爸爸以前的煮法, 好好味的.  爸爸以前的煮法?  點解我從未食過呢?  唔公平呀!  一定係在我離開香港後才煮的.這就是經我妹妹口述我亂亂做出來的, 汁裏面有茄汁和喼汁, 就叫做京汁牛仔骨吧.