焗豬扒飯

今日有兩開心事.

第一, 我媽咪成功幫我從香港Zara買到一條我睇中好耐的裙.  同一條裙在呢邊賣香港幾乎兩倍價錢, 就算減價都仲貴過香港正價.  香港Zara同呢邊同日開始減價, 我即刻叫媽咪去太古廣場幫我買, 上星期去無我size, 昨日媽咪唔死心再去幫我揾居然到幫我買咗, 開心死我喇!  媽咪太好了.   仲有媽咪下個星期就過嚟探我喇, 我又有機會痴住佢嘞, 非常期待哩.

第二, 今日工作上完成了一個令我緊張了幾日亦花了幾個月去準備的重要任務, 計劃順利通過, 感謝主, 值得今日獎勵自己准時放工 (前幾日都準備到好遲先走).

講完開心事, 講番之前姐姐煮的焗豬扒飯.

我諗緊要唔要開多個"姐姐靚餸"嚟記錄姐姐啲作品.

之前Daddy順口話要食焗豬扒飯, 姐姐某日就真的煮了.  姐姐自己係唔食焗豬扒飯的, 佢話好怕啲炒飯撈埋啲茄汁一pat pat咁喎.  所以佢只係煮俾我哋食, 自己食白飯配炸豬扒.

咁啱有mozzarella, 就加埋上面焗.  細佬鐘意食芝士, 大佬唔食, 所以一兜有芝士, 另一兜無.

姐姐炸豬扒好好味, 個個食到lam lam 脷.

姐姐專為Daddy而煮的焗豬扒飯, Daddy當晚居然臨時話唔返嚟食, 唯有留返佢嗰份俾佢第二晚才食.