契爺到訪(2)

6月25日, 星期六, 日間要湊囝囝哋去返興趣班, 要夜晚先可以再約契爺一家.

老巴刹(Lau Pa Sat)是來新加坡必到之地, 夜晚旁邊的其中一條路會唔俾車行, 跟住就擺晒枱凳俾人露天開餐, 旁邊就有成排沙爹檔用炭火烤沙爹, 風味絶佳. 

今次撇低兩個囝囝, 只有我和daddy兩個輕輕鬆鬆的去赴約.

雞肉, 羊肉和牛肉沙爹串, 全部都好好味, 一啲都唔韌, 用炭火烤的特別正.

德國人口味比較重, 最鐘意濃味嘢食. 就算啱啱前一日食完, 都要再叫bbq seafood.  又嚟sambal sotong (辣椒魷魚), 唔錯, 但之前一日的好食啲.

佢哋未試過貢貢, 叫嚟俾佢哋試.  其實以佢哋口味, 見到咁白雪雪都冇咩興趣, 但都客氣咁話我食.  呢次啲貢貢唔多掂, 唔係隻隻新鮮, 仲要煮耐咗, 有啲韌.

炸魷魚仔, 我最唔鐘意食的, 但呢邊人好鐘意.  魷魚仔炸到脆之後撈啲甜甜哋辣辣哋的醬, 基本上食唔到魷魚味. 另外仲有香港無既"香港麵".  其實即係雜錦炒麵, 蛋, 叉燒, 洋蔥之類炒埋一碟, 唔明點解叫香港麵, 不過朋友好鐘意食.

又係馬來風光(馬拉盏炒蕹菜).

Frtiz 好叻仔, 對完我囝囝們一日, 就已經學識講啲啲英文啦.  佢會叫人"careful", 又會用英文數1, 2, 3 之類.  嗰晚佢話要買嘢飲, 跟住自己去叫, 自己俾錢再自己拎番位.  佢問佢爸爸拎錢時, 哈, 我聽得明佢爸爸講乜呀!  佢話: "Du hast Geld", 我完全100%明晒, 原來我係咁見錢耳開架.

食沙爹, bbq嘢梗係要配啤酒啦, 我哋飲咗至少兩jug, 太開心喇!  咁當然Daddy一啖都冇得飲啦, 佢要駕車, 我抵諗啲飲埋佢嗰份.

第二朝星期日要返教會, 而佢哋就下晝機去巴里島, 所以約佢哋食lunch.  今次揀了Raffles City Shopping Centre裏的老香港傳奇, 第一次去, 原來啲點心好好味哩, 仲有呢邊好少見的潮州粉果同咸水角添, 以後一定要再嚟幫襯.  朋友一家對食物有讚無彈, 佢哋尤其鐘意潮州粉果, 咸水角同腸粉. 可惜, 就响嗰時我個相機突然罷工開唔到, 只可以用手機, 都無咩影低啲嘢食.

Fritz 超鐘意食啲點心, 每樣點心上桌時佢都第一時間去拎, 攪到佢父母有啲唔好意思要叫住佢.

叫了半隻北京鴨, 非常有水準. 

食完呢餐就要講bye bye了, 真係有啲唔拾得.  希望不久將來可以帶囝囝哋去德國行下探佢哋啦.